လါယူၤ ၄ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤ(လါယူၤ ၄)သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် တၢ်ခးလိာ်သးကဲထီၣ်ဘူးလၢ ကညီကီၢ် စဲၣ် ကၠၤအ့စ့ၣ်ကၠံကီၢ်ဆၣ် ချၢၣ်=တကူၣ်တဲၣ်ပၢၤကီၢ်၀ဲၤလီၢ်တကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ် န့ၣ်လီၤႉ
ဘၣ်ထွဲဒီးတၢ်ခးလိာ်သးကဲထီၣ်အံၤ လီၢ်က၀ီၤဖိတဖၣ်ဆိမိၣ်တယး၀ဲကမ့ၢ်၀ဲဒၣ် သုးမီၤစိရိၤအသုးႇ ပၢၤကီၢ်ႇ BGF သုးပာ်ဖှိၣ်တဖၣ်ဒီး ဟီၣ်က၀ီၤ ခ့ၣ်အဲၣ်ယူၣ်ကရူၢ်တဖၣ်အဘၢၣ်စၢၤ ခးလိာ်သးလီၤဒီး နၢ်ဟူ၀ဲကျိဖးဒိၣ်သီၣ်ကအိၣ်၀ဲအဖျၢၣ် ၁၀ ဃၣ်ဃၣ်ညါအဂ့ၢ်န့ၣ် လီၢ်က၀ီၤသ၀ီဖိတဂၤ စံး၀ဲဒ်အံၤန့ၣ်လီၤႉ
“တနံၤအံၤမုၢ်ထူၣ် ၁၂ နၣ်ရံၣ်ဃၣ်ဃၣ်န့ၣ် တၢ်ခးလိာ်သးကဲထီၣ်လီၤႉ တၢ်ခးလိာ်သးကဲထီၣ်အံၤလိၤ၀ဲဒၣ် လၢပၢၤကီၢ်၀ဲၤလီၢ်တကပၤလီၤႉ နၢ်ဟူကျိဖးဒိၣ်သီၣ်ကအိၣ်လၢအဖျၢၣ် ၁၀ ဃၣ်ဃၣ်ညါလီၤႉ တၢ်တယး ကွၢ်၀ဲ လၢကမ့ၢ်၀ဲဒၣ် သုးမီၤစိရိၤအသုးႇပၢၤကီၢ်ဒီး BGF သုးပာ်ဖှိၣ်တဖၣ် ခးလိာ်သးဒီး ခ့ၣ်အဲၣ်ယူၣ်လီၤ” အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိတၢ်ခးလိာ်သးကဲထီၣ်အဃိ တကီၢ်ခါခဲအံၤ ချၢၣ်ဒီးတကူၣ်တဲၣ် လီၢ်က၀ီၤသ၀ီဖိတဖၣ် ခဲအံၤဟးပလဲၤအသးတစိၢ်တလီၢ်လၢသ၀ီချၢအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ဖဲအပူၤကွံာ် လါအ့ဖြ့ၣ် ၅ သီအနံၤ သုးမီၤစိရိၤအသုး ခလရ(၂၈၃)သုးရ့ၣ်ဒီး နီၣ်ဂံၢ်(၁၀၂၁) သုးခိးကီၢ်ဆၢသုးပာ်ဖှိၣ်တဖၣ် ဟဲအိၣ်ဆီလီၤသးလၢချၢၣ်=တကူၣ်တဲၣ်ပၢၤကီၢ်၀ဲၤလီၢ်အံၤဒီး ခီဖျိလီၢ် က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်အဃိ လီၢ်က၀ီၤဖိတဖၣ်ပာ်ဖျါထီၣ်သးဃ့ထီၣ်ဒ်သိး ကထုးကွံာ်အသုးဘၣ်ဆၣ် တထုးကွံာ်သုးအမဲာ်ညါ မၤအါထီၣ်သုးဂံၢ်ဘါကွ့ၢ်ကွ့ၢ်အဂ့ၢ်န့ၣ် ၦၤလၢအထံၣ်ဒီးအမဲာ်တဖၣ် စံး၀ဲန့ၣ်လီၤႉ
တၢ်ခးလိာ်သးအံၤမ့ၢ်၀ဲဒၣ် သုးမီၤစိရိၤအသုးပာ်ဖှိၣ်တဖၣ်ဒီး ခ့ၣ်အဲၣ်ယူၣ် စုဒုၣ်တီၤအဖီလာ် KNLA သုးက့(၆) အသုးရ့ၣ်(၁၆)အသုးတဖၣ်ခးလိာ်သးအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်တ၀ၢပူၤအအိၣ်ဘၣ်ဆၣ် တၢ်ကဲထီၣ်သးတၢ်ဂ့ၢ်လီၤတံၢ်လီၤဆဲးခီန့ၣ်တသ့ၣ်ညါဘၣ်ဒံးဘၣ်န့ၣ်လီၤႉ
