လါယူၤ ၂၂ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါလါယူၤ ၂၁သီအနံၤ တၢ်ပာ်လီၤက့ၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၇)သုးက့ခိၣ် သုးခိၣ်ကျၢၢ်ဖိ စီၤကၠီၤဖၠူၤ တၢ်ရဲၣ်တၢ်ကျဲၤ ဖဲဖၣ်အၣ်ကီၢ်ရ့ၣ် သုးက့ ၇ သုး၀ဲၤလီၢ်ခိၣ်သ့ၣ်တၢ်လီၢ်ဒီး ကမျၢၢ်လၢအကထိဟဲထီၣ်၀ဲအါအါဂီၢ်ဂီၢ်န့ၣ်လီၤႉ
သုးက့(၇)သုးက့ခိၣ် သုးခိၣ်ကျၢၢ်ဖိ စီၤကၠီၤဖၠူၤအံၤ လဲၤပူၤကွံ၁်အသးဖဲအပူၤကွံာ်(လါယူၤ ၁၉)သီ မုၢ်နၤခီ(၁၀း၅၀)မံးနံးအဆၢကတီၢ်လၢသးၦၢ်တၢ်ဆါန့ၣ်လီၤႉ
တၢ်လဲၤပာ်လီၤသုးခိၣ်ကျၢၢ်ဖိစီၤကၠီၤဖၠူၤအစိၣ်တၢ်ရဲၣ်တၢ်ကျဲၤအပူၤ KNU- ကညီဒီကလုာ်စၢဖှိၣ်ကရၢ ကရၢခိၣ် သုးခိၣ်ကျၢၢ်စိ စီၤမူၤတူစ့ဖိႇကရၢခိၣ်=၂ ပဒိၣ်စီၤကွဲၤထူ၀့ ဃုာ်ဒီးနဲၣ်ရွဲၣ်ခိၣ်ကျၢၢ်တဖၣ်ႇ KNLA သုးရိၣ်မဲ ခိၣ်ကျၢၢ် သုးခိၣ်ကျၢၢ်စိ စီၤကၠီၤနံၤ ဒီး လီၢ်ခၢၣ်သးသုး၀ဲၤလီၢ်ခိၣ်သ့ၣ်ခိၣ်နၢ်တဖၣ်ႇကညီကီၢ်စဲၣ် သုးခိးကီၢ်ဆၢ(BGF)သုးခိၣ်ဒိၣ်စိ စီၤခၠ့ၣ်သူၤ ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ခိၣ်နၢ်တနီၤဟဲထီၣ်၀ဲဒၣ်န့ၣ်လီၤႉ
ဘၣ်ထွဲဒီးသုးခိၣ်ကျၢၢ်ဖိ စီၤကၠီၤဖၠူၤ လဲၤပူၤကွံာ်သးအံၤ KNLA သုးက့ ၇ ဒုးယၤခိၣ် စီၤဖီဒိၣ် စံး၀ဲလၢ“ဆၢကတီၢ်ခဲအံၤခီဖျိမ့ၢ်တၢ်ဆၢကတီၢ်လၢအရ့ဒိၣ်အဃိ ပသုးက့ခိၣ်ႇပခိၣ်ပနၢ်ကဲထီၣ်သးဒ်အံၤ ကဲထီၣ်၀ဲဒၣ်တၢ်ရှူကွံာ်တခါလီၤမီၤနီၤႉ ပ၀ဲဒုခီဖျိခိၣ်နၢ်လၢအတီခိၣ်ရိၣ်မဲတၢ်အိၣ်အဃိ ပတၢ်ကရၢကရိတခါအံၤ ဒ်တၢ်တီခိၣ်ရိၣ်မဲအိၣ်၀ဲအသိးပကဆဲးလဲၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သုးခိၣ်ကျၢၢ်ဖိ စီၤကၠီၤဖၠူၤအံၤ အိၣ်ဖျဲၣ်ထီၣ်၀ဲဖဲဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် တဒွံခိၣ်သ၀ီဒီး အိၣ်ဖျဲၣ်ထီၣ်၀ဲဖဲ ၁၉၅၁ နံၣ်ႇလါအ့ဖြ့ၣ် ၁၀ သီအနံၤန့ၣ်လီၤႉ ဖဲ ၁၉၆၇ နံၣ်ႇ လါယူၤ ၁ သီအနံၤန့ၣ် နုာ်လီၤ၀ဲဒၣ်လၢကညီတၢ်ပၢၢ်ဆၢအပူၤန့ၣ်လီၤႉ လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးသ့ ၇ အပူၤ အ၀ဲဟံး၀ဲမူဒါလၢ သုးစကီၤႇသုးရ့ၣ်ခိၣ်(၂)ႇသုးရ့ၣ်ခိၣ်အပတီၢ်တဖၣ်တဆီဘၣ်တဆီဒီး ဖဲအဟံမူဒါလၢသုးက့ခိၣ်မူဒါအကတီၢ်လဲၤပူၤကွံာ်၀ဲအသးန့ၣ်လီၤႉ
ဖဲသုးခိၣ်ကျၢၢ်ဖိ စီၤကၠီၤဖၠူၤ လဲၤပူၤကွံာ်သးအဆၢကတီၢ်အသးနံၣ်အိၣ်၀ဲ(၇၀)နံၣ်ဒီး အ၀ဲမ့ၢ်စ့ၢ်ကီးတကီၢ်ခါ KNLA သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤကၠီၤနံၤအပုၢ်ဒ့ခွါန့ၣ်လီၤႉ ဖဲအလဲၤပူၤကွံာ်သးအဆၢကတီၢ် အမါနီၢ်ဘုဘိဒီးအဖိမုၣ်ဖိခွါ ၆ ဂၤအိၣ်လီၤတဲာ်ကွံ၁်၀ဲန့ၣ်လီၤႉ
