၀ီၢ်ရီကီၢ်ဆၣ် KECD တီၤထီကၠိ လိၣ်ဘၣ်ကၠိတၢ်သူၣ်ထီၣ်ဒီးကၠိတၢ်ပီးတၢ်လီတဖၣ်

လါယူၤ ၁၇ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ ၀ီၢ်ရီကီၢ်ဆၣ်(ကၠၤအ့စ့ၣ်ကၠံကီၢ်ဆၣ်) ပၠီၣ်သၣ်ယၣ်သ၀ီအပူၤ တီၤထီကၠိလၢကညီကူၣ်သ့ ဆဲးလၤ(KECD)အိးထီၣ်၀ဲအံၤ ခီဖျိတနံၣ်ညါအံၤကၠိဖိနီၣ်ဂံၢ်ဟဲအါထီၣ်အဃိ လိၣ်ဘၣ်၀ဲတၢ်သူၣ်ထီၣ် လၢကသိၣ်လိတၢ်အဂီၢ်ဒီး တၢ်သိၣ်လိတၢ်ပီးတၢ်လီတဖၣ်အဂ့ၢ်န့ၣ် သ့ၣ်ညါဘၣ်လၢကၠိၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ

“တနံၣ်ညါအံၤကၠိဖိအိၣ်တုၤလၢ ၂၀၀ ဘျဲၣ်လီၤႉ မ့ၢ်အ၀ဲသ့ၣ်ထီၣ်လၢပဒိၣ်ကၠိတဘူၣ်ဘၣ်ဧါႇမ့ၢ်တၢ်ကး တံၢ်ဧါဒုတသ့ၣ်ညါဘၣ်မီၤနီၤႉ ဟဲထီၣ်ဖှိၣ်၀ဲဖဲအံၤအဃိမံလီၢ်ႇတၢ်သိၣ်လိအလီၢ်ႇကၠိလံာ်ဖးတဖၣ်တ လၢ၀ဲလၢၤဘၣ်ႉ ကၠိဖိလွံၢ်ဂၤယဲၢ်ဂၤဘၣ်ကွၢ်ဖှိၣ်၀ဲကၠိလံာ်ဖးတဘ့ၣ်ဃီလီၤႉ ခီဖျိလၢတၢ်သိၣ်လိအလီၢ်အံၣ်အဃိ တၢ်ကီတၢ်ခဲအိၣ်လၢကသိၣ်လိတၢ်လီၤ” အဂ့ၢ်န့ၣ် ပၠီၣ်သၣ်ယၣ်တီၤထီကၠိခိၣ် နီၢ်အဲၣ်သးသီ စံးဘၣ်ခ့ၣ်အဲးစံၣ်ဖဲ(လါယူၤ ၁၄)သီအနံၤန့ၣ်လီၤႉ

ခီဖျိမံလီၢ်ဒီးတၢ်သူၣ်ထီၣ်တကူတလၢဘၣ်အဃိ ကၠိဖိလၢအအိၣ်ဟဲထီၣ်ကၠိလၢတၢ်လီၢ်အယံၤတဖၣ် ဘၣ်အိၣ်၀ဲဒၣ်လၢသ၀ီပူၤဟံၣ်ဃီလၢအသ့ၣ်ညါလိာ်သးတဖၣ်ဒီး ခီဖျိကၠိဖိအနီၣ်ဂံၢ်ဟဲအါထီၣ်အဃိ သရၣ်/သရၣ်မုၣ်တဖၣ်လိၣ်အါထီၣ်စ့ၢ်ကီးအဂ့ၢ်န့ၣ် ကၠိမူဒါခိၣ်စံး၀ဲန့ၣ်လီၤႉ

အတီၤတဆံကၠိဖိ နီၢ်ကီၢ်သယုၢ်ဖီ စံး၀ဲ“ထီၣ်ဘၣ်လၢပဒိၣ်ကၠိစ့ၢ်ကီးလီၤႉ ခီဖျိတၢ်ဂ့ၢ်အကလုာ်ကလုာ်အဃိ ခဲအံၤဆီတလဲထီၣ်က့ၤကညီကၠိလီၤႉ ဖဲအံၤတၢ်သိၣ်လိန့ၢ်၀ဲလံာ် ၈ ဘ့ၣ်လီၤႉ ပၣ်ဃုာ်၀ဲဒီး လံာ်ကညီႇ လံာ်တၢ်စံၣ်စိၤတဲစိၤလီၤႉ မ့ၢ်ဖျိန့ၣ်ကဆဲးထီၣ်ဖၠၣ်စိမိၤကၠိလၢကညီအိးထီၣ်၀ဲအံၤလီၤႉ ဒ်သိးပကညီကီၢ်စဲၣ် ကလဲၤထီၣ်လဲၤထီအဂီၢ်အဲၣ်ဒိးက့ၤမၤတၢ်လီၤ” အဂ့ၢ်န့ၣ် စံး၀ဲန့ၣ်လီၤႉ

ခ့ၣ်အဲၣ်ယူၣ် ၀ီၢ်ရီကီၢ်ဆၣ် ပၠီၣ်သၣ်ယၣ် တီၤထီကၠိလၢကညီကူၣ်သ့ဆဲးလၤ၀ဲၤကျိၤအိးထီၣ်၀ဲအံၤ တၢ်သိၣ်လိန့ၢ်၀ဲစးထီၣ်လၢကတီၤဆိတီၤဖုၣ်ကၠိတုၤလၢအတီၤတဆံဒီး မ့ၢ်ကၠိလၢဟီၣ်က၀ီၤကလုာ်ဒူၣ်ထူလံၤတဖၣ်ဒိးသန‹ၤထီၣ်အသးတဖျၢၣ်အဂ့ၢ်န့ၣ် သ့ၣ်ညါဘၣ်လၢကၠိဖိမိၢ်ပၢ်အအိၣ်န့ၣ်လီၤႉ