Home တၢ်ကစီၣ် တၢ်ဒီသဒၢခိ၀ံၣ်အဂီၢ် ကလုာ်ဒူၣ်ဆူၣ်ချ့ကရၢတဖၣ်ဒီး(NUG)ပဒိၣ်ဆူၣ်ချ့၀ဲၤကျိၤ ကပာ်ဖှိၣ်မၤသကိးတၢ်

တၢ်ဒီသဒၢခိ၀ံၣ်အဂီၢ် ကလုာ်ဒူၣ်ဆူၣ်ချ့ကရၢတဖၣ်ဒီး(NUG)ပဒိၣ်ဆူၣ်ချ့၀ဲၤကျိၤ ကပာ်ဖှိၣ်မၤသကိးတၢ်

301
0

လါယူၤလံ ၂၂ သီ ၂၀၂၁ နံၣ်၊ ခ့ၣ်အဲးစံၣ်

ဒ်သိးတၢ်ကတြီဆၢဒီသဒၢခိ၀ံၣ်တၢ်ဆါအဂီၢ် ဒီကလုာ်ဃူဖိးပဒိၣ်(NUG)ဆူၣ်ချ့ကိတိာ်၀ဲၤကျိၤဒီး ကလုာ်ဒူၣ်ဆူၣ်ချ›တၢ်ကရၢကရိတဖၣ်ပာ်ဖှိၣ်ထီၣ်သးဒီး ဒုးအိၣ်ထီၣ်၀ဲတၢ်ဒီသဒၢခိ၀ံၣ်–၁၉ကရူၢ် Covid-19 Task Force(CTF) အဂ့ၢ်န့ၣ် ဘိးဘၣ်ရၤလီၤ၀ဲဖဲတနံၤအံၤ(လါယူၤလံ ၂၂)သီအနံၤန့ၣ်လီၤႉ

ဖဲတလါအံၤ(လါယူၤလံ ၁၇)သီအနံၤ ကလုာ်ဒူၣ်ဆူၣ်ချ›ကမံးတံာ်ခိၣ်နၢ်တဖၣ်ဒီး(NUG)ပဒိၣ်ဆူၣ်ချ›ကိတိာ်တဖၣ် ပာ်ဖှိၣ်ထီၣ်သးဒုးအိၣ်ထီၣ်၀ဲ(CTF)ကရူၢ် ဒ်သိးကပာ်ဖှိၣ်တြီဆၢဒီသဒၢ ခိ၀ံၣ်တၢ်ဆါလၢအဘၣ်ကူဘၣ်ဂာ်အါထီၣ်လၢတကီၢ်ခါခဲအံၤအဂီၢ်လီၤအဂ့ၢ်န့ၣ် CTF ၦၤကတိၤတၢ်ပၢ ပဒိၣ်မါမါ စံး၀ဲဒ်အံၤန့ၣ်လီၤႉ

“လီၤဆီဒၣ်တၢ်လၢမုၢ်မဆါတနံၤညါအံၤ ထံကီၢ်ကိးဘ့ၣ်ဒဲးဘၣ်ကွၢ်ဆၢၣ်မဲာ်ဒီးခိ၀ံၣ်–၁၉တၢ်ဆါအဖီခိၣ်အံၤန့ၣ် ဒ်သိးတၢ်- တီဆၢဒီသဒၢဒီးကူစါအံးထွဲကွၢ်ထွဲကသ့အဂီၢ်န့ၣ် ပကဘၣ်မၤသကိးတၢ်အကပၤကပၤဃိ ပဒုးအိၣ်ထီၣ်၀ဲ(CTF)တၢ်မၤအကရူၢ်တခါအံၤလီၤမီၤနီၤႉ ပမ့ၢ်တ-တီဆၢဒီသဒၢလီၤတံၢ်လီၤဆဲးဘၣ်န့ၣ် ခါလၢကဟဲၦၤဘၣ်ဒိဘၣ်ထံးၦၤသံကဟဲအါထီၣ်န့ၢ်ဒံးအခဲအံၤအဃိ ပပာ်ဖှိၣ်မၤသကိးတၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

(CTF) ကရူၢ်လၢတၢ်ဒုးအိၣ်ထီၣ်အီၤအံၤ အကရူၢ်ခိၣ်န့ၣ်မ့ၢ်၀ဲ ကလုာ်ဒူၣ်ဆူၣ်ချ့ကမံးတံာ် ၦၤပၢၤလီၢ်ဆ့ၣ်နီၤ ဒီကထၢၣ်စ့ၣ်သံၣ်ယၣ်မီၣ်ဒီး ကရူၢ်ခိၣ်(၂)န့ၣ်မ့ၢ်၀ဲ(NUG)ပဒိၣ်ဆူၣ်ချ့ကိတိာ် ဒီကထၢၣ်စီၣ်၀့ၤစိန့ၣ်လီၤႉ လၢအမဲာ်ညါ ကပၣ်ဃုာ်၀ဲဒီးဆူၣ်ချ့ကိတိာ်၀ဲၤကျိၤၦၤဘၣ်မူဘၣ်ဒါလၢအအိၣ်တ့ၢ်တဖၣ်ႇ ကလုာ်ဒူၣ်ဆူၣ်ချ့တၢ်ကရၢကရိၦၤဘၣ်မူဘၣ်ဒါတဖၣ်ဒီး ၦၤသ့ၦၤဘၣ်ကရၢဖိတဖၣ်အဂ့ၢ်န့ၣ် ဘိးဘၣ်ရၤလီၤပာ်ဖျါ၀ဲန့ၣ်လီၤႉ

CTF ကရူၢ်အံၤန့ၣ် ကမၤဆိ၀ဲတၢ်လၢအရ့ဒိၣ်ဒ်အမ့ၢ် တၢ်ဟ့ၣ်ခိ၀ံၣ်တၢ်သ့ၣ်ညါနၢ်ပၢၢ်ႇတၢ်တြီဆၢဒီသဒၢတၢ်ဆါ အတၢ်နဲၣ်ကျဲတဖၣ်ႇကသံၣ်တၢ်ဒီသဒၢခိ၀ံၣ်ဃုာ်ဒီးဒ်သိးကဒိးန့ၢ်ဘၣ်တၢ်ဆီၣ်ထွဲမၤစၢၤလၢတၢ်ကဒီသဒၢခိ၀ံၣ်အဂီၢ် ကမၤ၀ဲတၢ်ထိၣ်ဃူထိၣ်ဖိးဒီးထံဂုၤကီၢ်ဂၤတၢ်ကရၢကရိတဖၣ်အမဲာ်ညါ ခိ၀ံၣ်တၢ်ဘၣ်ကူဘၣ်ဂာ်အကတီၢ်တၢ်က့ၤမၤဂ့ၤထီၣ်က့ၤတၢ်မၤတဖၣ်အဂ့ၢ်န့ၣ် ကရူၢ်အံၤစံး၀ဲန့ၣ်လီၤႉ

လၢန့ၣ်အမဲာ်ညါ တၢ်မၤအရ့ဒိၣ်လၢတၢ်ကမၤဆိ၀ဲတဖၣ် ဒ်သိးတၢ်မၤဖျါထီၣ်အမိၢ်လံၤမိၢ်ၦၢ်ကန့ၢ်အဂီၢ် (CTF)ကရူၢ် ဃ့ထီၣ် ဘီမုၢ်စၢဖှိၣ်ကရၢတၢ်ကရၢကရိဃုာ်ဒီးထံဂုၤကီၢ်ဂၤကရၢသဘျ့(INGO)ႇထံဂုၤကီၢ်ဂၤပဒိၣ်တဖၣ်ဒီး အၣ်စံၣ်ယၣ်ထံကီၢ်တဖၣ်လၢ ကမၤစၢၤ၀ဲခိ၀ံၣ်ကသံၣ်ဒီသဒၢတဖၣ်ႇတၢ်သ့တၢ်ဘၣ်လၢအလိၣ်တဖၣ်ဒီး ကျိၣ်စ့တၢ်ဆီၣ်ထွဲမၤစၢၤတဖၣ်လၢအဆိအချ့အဂီၢ်န့ၣ်လီၤႉ