Home တၢ်ကစီၣ် လ့က့ၣ်ကီာ်၀့ၢ်သီတၢ်ခိးကွၢ်ခိ၀ံၣ်အလီၢ် သဂၢၢ်ဘၣ်၀ဲဒီးအီၣ်ကစံၣ်ကၠံၣ်(oxygen)တကူတလၢဘၣ်

လ့က့ၣ်ကီာ်၀့ၢ်သီတၢ်ခိးကွၢ်ခိ၀ံၣ်အလီၢ် သဂၢၢ်ဘၣ်၀ဲဒီးအီၣ်ကစံၣ်ကၠံၣ်(oxygen)တကူတလၢဘၣ်

322
0

လါယူၤလံ ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်၀့ၢ်ကလံၤထံး လ့က့ၣ်ကီာ်၀့ၢ်သီအပူၤ တၢ်အိးထီၣ်၀ဲခိ၀ံၣ်ခွၤရထံ(Quarantine) အလီၢ်အံၤ သဂၢၢ်ဘၣ်၀ဲဒီးၦၤဆါအဂီၢ်အီၣ်ကစံၣ်ကၠံၣ်(oxygen)တကူတလၢဘၣ်တၢ်အိၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လ့က့ၣ်ကီာ်ခိ၀ံၣ်ခွၤရထံအလီၢ်အံၤ ၦၤဆါလၢတၢ်တယးလၢအိၣ်ဒီးခိ၀ံၣ်ဒီး ၦၤအိၣ်ဒီးခိ၀ံၣ်တၢ်ဆါ(၁၅၀)ဘျဲၣ်အဂီၢ် အီၣ်ကစံၣ်ကၠံၣ်ဒၢအိၣ်၀ဲ(၄)ဖျၢၣ်ဒီး တၢ်ကသါကလံၤအလီၢ်(၂)စူၣ်ႇ အိၣ်ထဲၦၤဆါ(၂)ဂၤအဂီၢ်လီၤဒီး ခီဖျိခိ၀ံၣ်ဘၣ်ကူဘၣ်ဂာ်တၢ်အိၣ်သးအဃိ မ့ၢ်ဟဲထီၣ်လၢကကသါအီၣ်ကစံၣ်ကၠံၣ်အဂီၢ်န့ၣ် သဂၢၢ်ဘၣ်၀ဲဒီးတၢ်ကူတၢ်လၢတအိၣ်ဘၣ်အဂ့ၢ်န့ၣ် လ့က့ၣ်ကီာ်၀့ၢ်သီ ခိ၀ံၣ်ခွၤရထံအလီၢ် ၦၤဘၣ်မူဘၣ်ဒါလၢအမၤစၢၤ၀ဲတၢ်အိၣ်ဆူၣ်အိၣ်ချ့တဖၣ် စံး၀ဲန့ၣ်လီၤႉ

“လၢပအိၣ်န့ၣ် ၦၤဘၣ်ကူဘၣ်ဂာ်လၢခိ၀ံၣ်အိၣ်(၄၃)ဂၤလံႉ ၦၤအဂၤတကယၤလၢအအိၣ်ဘူးဘၣ်ဒီးၦၤဘၣ်ခိ၀ံၣ်တၢ် ဆါတဖၣ်န့ၣ်စ့ၢ်ကီး တၢ်ပာ်အ၀ဲသ့ၣ်လၢခွၤရထံအလီၢ်လီၤႉ အီၣ်ကစံၣ်ကၠံၣ်အဒၢဆံးအိၣ်၀ဲ(၁)ဖျၢၣ်ႇ အဒိၣ်(၂)ဖျၢၣ်ဒီး တၢ်ကသါကလံၤအလီၢ်အိၣ်(၂)စူၣ်လီၤႉ ဖဲတဂီၤညါအံၤ ထီထီၣ်အီၣ်ကစံၣ်ကၠံၣ်ဟ့ၣ်ကသါၦၤဆါ(၂)ဂၤလီၤႉ ကသံၣ်လၢကဟ့ၣ်ဒုးအီၦၤဆါအဂီၢ်စ့ၢ်ကီးလိၣ်၀ဲလီၤႉ ဟီၣ်က၀ီၤပူၤၦၤဆါလၢကဟဲအါထီၣ်တဖၣ်အဂီၢ်စ့ၢ်ကီး တၢ်အိၣ်တၢ်ဆိးအလီၢ်တဖၣ်လိၣ်၀ဲလီၤႉ လီၤဆီဒၣ်တၢ် မ့ၢ်ဘၣ်ဟ့ၣ်ကသါၦၤဆါအီၣ်ကစံၣ်ကၠံၣ်မ့ဟဲအါထီၣ်န့ၣ် တၢ်အိၣ်သးအိၣ်လၢထံၣ်ဘၣ်၀ဲတၢ်ကီတၢ်ခဲတဖၣ်လီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ

ခီဖျိခိ၀ံၣ်တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်အဃိ ကျဲလ့ၢ်လိၤလ့ၢ်ထီၣ်ကျဲမုၢ်လၢလ့က့ၣ်ကီာ်၀့ၢ်သီႇ က၀ီၤဒ့ဒူသ၀ီခိၣ်ထိးလၢအအိၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၆)ဟီၣ်က၀ီၤအပူၤတဖၣ် တၢ်ထိၣ်၀ဲတၢ်ကိၢ်ႇတၢ်နီၤလီၤတၢ်ကးဘၢနါဒ့ႇသ့ဃၢၤကဆှီစုႇတၢ်သံဒိးသံကွၢ်၀ဲလီၢ်က၀ီၤဖိလၢအဟးထီၣ်ဟးလီၤတဖၣ်အဂ့ၢ်အကျိၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခဲအံၤ လၢလ့က့ၣ်ကီာ်၀့ၢ်သီအ့ရံၣ်ယၣ်အပူၤ ခီဖျိခိ၀ံၣ်တၢ်ဆါဘၣ်ကူဘၣ်ဂာ်ရၤလီၤသးအါထီၣ်အဃိ တကီၢ်ခါ လိၣ်ဘၣ်၀ဲဒၣ်တၢ်သူၣ်ထီၣ်လၢကအံးထွဲကွၢ်ထွဲၦၤဆါတဖၣ်အဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လၢတၢ်န့ၣ်အဃိ ခ့ၣ်အဲၣ်ယူၣ် သုးက့(၆)ဟီၣ်က၀ီၤသုးဖိသံၣ်ဖိဒီးလီၢ်က၀ီၤသးစၢ်သ့ၣ်တဖၣ်ပာ်ဖှိၣ်ထီၣ်သးဒီး တ့ထီၣ်၀ဲဂံၢ်ခီၣ်ထံးတစိၢ်တလီၢ်တၢ်သူၣ်ထီၣ်လၢသ့ၣ်၀ၣ်တဖၣ်ဒ်သိးကကွၢ်ထွဲၦၤဆါတဖၣ်လီၤအဂ့ၢ်န့ၣ် လ့က့ၣ်ကီာ်၀့ၢ်သီ ပၢဆှၢရဲၣ်ကျဲၤကမံးတံာ် ၦၤဘၣ်မူဘၣ်ဒါ စီၤထ့မၠ့ၣ်အီၣ် စံး၀ဲန့ၣ်လီၤႉ

တကီၢ်ခါတၢ်အိၣ်သးခဲအံၤ လၢလ့က့ၣ်ကီာ်၀့ၢ်သီအ့ရံၣ်ယၣ်အပူၤန့ၣ် ၦၤလၢတၢ်တယးကွၢ်၀ဲလၢအဘၣ်ကူဘၣ်ဂာ် လၢခိ၀ံၣ်အိၣ်၀ဲ(၁၁၁)ဂၤဒီး ၦၤလၢတၢ်ထံၣ်န့ၢ်အအိၣ်ဒီးတၢ်ဆါလၢတၢ်အံးထွဲကွၢ်ထွဲ၀ဲအိၣ်(၅၂)ဂၤဒီး ၦၤဆါလၢအအိၣ်ဃာ်ဒီးခဲစၢၢ်တၢ်ဆါဘၣ်ကူ၀ဲဒီးခိ၀ံၣ်သံ၀ဲ ၁ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ