လါယူၤလံ ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ဃိၣ်သၢဖျၢၣ်၀့ၢ်ပူၤ ဖဲမဟါ(လါယူၤလံ ၁၈)သီအနံၤ တၢ်ခးသံ၀ဲကီၢ်စၢဖှိၣ်သွံၣ်ဃူဖိးပၣ်တံၣ်(USDP)ၦၤပၢၤလီၢ်ဆ့ၣ်နီၤ အူခဲၤ၀့ အဂ့ၢ်န့ၣ် သ့ၣ်ညါဘၣ်လၢပၣ်တံၣ်ကရၢဖိအအိၣ်န့ၣ်လီၤႉ
ဖဲအူခဲၤ၀့ဒီးၦၤအဂၤခံဂၤဆ့ၣ်နီၤလၢလးဖးထံကျးပူၤ ဖဲဃိၣ်သၢဖျၢၣ်၀့ၢ် နီၣ်ဂံၢ်(၃)က၀ီၤဒ့ န့ဆံၣ်ကျဲအဆၢကတီၢ် ၦၤလၢတၢ်သ့ၣ်ညါအီၤ(၂)ဂၤ ဟဲဒိး၀ဲဒီးဆဲးကဲးခး၀ဲဒီးကျိတဘျီဃီအဃိ အူခဲၤ၀့သံကွံာ်၀ဲဖဲန့ၣ်တဘျီဃီဒီး ၦၤလၢအဂၤ(၂)ဂၤစ့ၢ်ကီးဘၣ်ဒိဘၣ်ထံး၀ဲအဂ့ၢ်န့ၣ် ဃိၣ်သၢဖျၢၣ်၀့ၢ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ
အ၀ဲစံး၀ဲလၢ“တၢ်ခး၀ဲဒီးကျိအထံၣ်(၁၀)ညါလီၤႉ ၦၤခံဂၤစိာ်၀ဲကျိဖုၣ်တဂၤတခိၣ်ဒီးအိၣ်ခးဆိ၀ဲလၢဆဲးကဲးအခိၣ်လီၤႉ ဘၣ်၀ဲဒၣ်အူခဲၤ၀့အသးနါၦၢ်ႇအဟၢဖၢလီၤႉ ဘၣ်ဃုာ်စ့ၢ်ကီးအဖိခွါဒီးၦၤနီသိလ့ၣ်ဖိတဂၤဒံးလီၤႉ မ့မ့ၢ်အ၀ဲဒုသံ၀ဲတဘျီဃီဖဲန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
အူခဲၤ၀့အံၤ ဖဲအပူၤကွံာ် ၂၀၂၀ တၢ်ဃုထၢဖးဒိၣ်အခါ နုာ်လီၤဒိးတပြၢအသးလၢ(USDP)ပၣ်တံၣ် ဖဲကၠၤအ့စ့ၣ်ကၠံကီၢ်ဆၣ် ဒ်ကီၢ်စဲၣ်ဘျီၣ်ဒိၣ်ခၢၣ်စးအသိးဒီး အ၀ဲမ့ၢ်ၦၤလၢအနုာ်လီၤပၣ်ဃုာ်စ့ၢ်ကီးလၢဃိၣ်သၢဖျၢၣ်၀့ၢ် တၢ်တိစၢၤမၤစၢၤတၢ်သံတၢ်ၦၢ်ဒီးမုာ်သးမၤကလီ(နာရေးကူညီမှုနှင့်ပရဟိတလုပ်ငန်း)အပူၤတဂၤအဂ့ၢ်န့ၣ် သ့ၣ်ညါဘၣ်လၢအပၣ်တံၣ်ကရၢဖိအအိၣ်န့ၣ်လီၤႉ
ဃိၣ်သၢဖျၢၣ်၀့ၢ် သ၀ီသီအံၤ ဖဲအပူၤကွံာ်လါယူၤ ၈ သီအနံၤစ့ၢ်ကီး တၢ်ခးသံ၀ဲ မိၣ်ဃူဖိးပၣ်တံၣ် ဘျီၣ်ခိၣ်ခၢၣ်စးလီၢ်လံၤ မံၣ်၀့ၤသံၤဖၠိစ့ၢ်ကီးန့ၣ်လီၤႉ
