မုၢ်တြီၢ်ဟီၣ်က၀ီၤၦၤဃ့ၢ်မှံဟးဖျိးတဖၣ်အဂီၢ် လိၣ်ဘၣ်ဒံး၀ဲကသံၣ်ကသီတၢ်ဆီၣ်ထွဲမၤစၢၤ

လါယူၤလံ ၅ သီႇ ၂၀၂၁ နံၣ်ႇ ခ့ၣ်အဲးစံၣ်

ခီဖျိသုးမီၤစိရိၤအသုးဒီး ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၅)အဘၢၣ်စၢၤတၢ်ဒုးကဲထီၣ်အဃိ မုၢ်တြီၢ်ကီၢ်ရ့ၣ်ပူၤၦၤဃ့ၢ်မှံဟးဖျိးတဖၣ်အဂီၢ် လိၣ်ဘၣ်ဒံး၀ဲဂ့ၢ်ဂီၢ်အူကသံၣ်ကသီတဖၣ်အဂ့ၢ်န့ၣ် တၢ်ကရၢကရိလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

တကီၢ်ခါခဲအံၤတၢ်စူၤခါအတီၢ်ပူၤ ကမျၢၢ်ၦၤဃ့ၢ်မှံဟးဖျိးတဖၣ်အဂီၢ် လိၣ်ဘၣ်ဒံး၀ဲကသံၣ်လၢကကူစါယါဘျါတၢ်ညၣ်ဂိၢ်တၢ်ဆါတဖၣ်ႇတၢ်ဒီတဒၢပစိၤတၢ်ဖိတၢ်လံၤတဖၣ်ဒီး တၢ်ခိၣ်ဒုးႇယၣ်ႇပ့ၢ်ပီၤတဖၣ်အဂ့ၢ်န့ၣ် ကီၢ်သူလ့ၤဆူၣ်ချ့မၤစၢၤ၀ဲၤကျိၤ(KDHW)စံး၀ဲန့ၣ်လီၤႉ

KDHW တၢ်သိလိမူဒါခိၣ် စီၤဒိဒိၤအဲၣ်ကလုာ်စံး၀ဲလၢ“ခဲအံၤ ကီၢ်ပူၤၦၤဃ့ၢ်မှံဟးဖျိးတဖၣ်ဟဲက့ၤအိၣ်ကဒုတန့ၢ်ခဲလၢာ်ဒံးဘၣ်ႉ ဘၣ်ဟဲက့ၤခီခီဘၣ်က့ၤအိၣ်ခီခီအဃိန့ၣ် ပလိၣ်ဘၣ်တၢ်မၤစၢၤဃံးဃီၣ်ဒီၣ်ဒ်သိးလၢၦၤမၤစၢၤလၢအပူၤကွံာ်အသိးန့ၣ်မီၤနီၤႉ ခဲအံၤပလိၣ်ဘၣ်န့ၣ်မ့ၢ်၀ဲတၢ်ညၣ်ဂိၢ်ကသံၣ်ႇကသံၣ်ပစိၤႇကသံၣ်ပစိၤလၢၦၤဖူလၢလိၤတဖၣ်ႇပ့ၢ်ပီၤႇယၣ်တဖၣ်မီၤနီၤ”အဂ့ၢ် န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တကီၢ်ခါခဲအံၤ တၢ်ဆီၣ်ထွဲမၤစၢၤတဖၣ်လီၤစှၤ၀ဲဒၣ်အသိး ၦၤလၢအမၤစၢၤတၢ်လၢအပူၤကွံာ်လၢညါတဖၣ် ခီဖျိဆိမိၣ်၀ဲလၢဟီၣ်က၀ီၤတၢ်အိၣ်သးဂၢၢ်ကျၢၤဒ်ညီနုၢ်အသိးလံအဃိ တၢ်ဆီၣ်ထွဲမၤစၢၤဘၣ်လီၤစှၤ၀ဲလီၤအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ

ဒ်န့ၣ်အသိးဟီၣ်က၀ီၤဖဲန့ၣ်အပူၤ ဖဲအပူၤကွံာ်လါအတီၢ်ပူၤစ့ၢ်ကီး ကမျၢၢ်ၦၤဃ့ၢ်မှံဟးဖိးတဖၣ် ဘၣ်သဂၢၢ်၀ဲဒီးတၢ်ဟၢဖၢလူတၢ်ဆါဒီးတၢ်ညၣ်ဂိၢ်တၢ်ဆါအါအါဂီၢ်ဂီၢ်ဒီး ခီဖျိကသံၣ်ကသီတကူတလၢဘၣ်အဃိ ဖိသၣ်ဖိတဂၤသံကွံာ်၀ဲဒၣ်န့ၣ်လီၤႉ

တုၤဖဲအပူၤကွံာ်လါန့ၣ် လၢခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤတၢ်ဒုးဆူၣ်ထီၣ်၀ဲဒီး တၢ်ဟဲကွံာ်လီၤမ့ၣ်ပိၢ်ဒီးကဘီယူၤတအိၣ်လၢၤ၀ဲဘၣ်ဆၣ် ခီဖျိသုးမီၤစိရိၤအသုးပညိၣ်ခးလီၤကျိဖးဒိၣ်လၢ ဟီၣ်က၀ီၤကမျၢၢ်တၢ်အိၣ်တၢ်ဆိးလီၢ်ကျဲအိၣ်ဒံးအဃိ ကမျၢၢ်ၦၤဃ့ၢ်မှံဟးဖျိးတနီၤတက့ၤဘၣ်ဒံးလၢ အလီၢ်အကျဲဒံးဘၣ်အဂ့ၢ်န့ၣ် KNU သုးက့(၅)တကပၤ စံး၀ဲန့ၣ်လီၤႉ

KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး ၀ဲလၢ“ခီဖျိတနီၤန့ၣ်စံၣ်ဒံး၀ဲဒၣ်လၢၦၢ်ကျါဒံးအဃိ လိၣ်ဘၣ်ဒံး၀ဲကသံၣ်ကသီႇ ကသံၣ်ဒီသဒၢလၢအဘၣ်ဃးဒီးပစိၤတဖၣ်ႇထံအီတဖၣ်ဒီး တၢ်အိၣ်ဆူၣ်အိၣ်ချ့အဂီၢ် တၢ်ဒီတဒၢလၢအရ့ဒိၣ်တဖၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဒ်န့ၣ်အသိးတကီၢ်ခါဆၢကတီၢ်ခဲအံၤ ဟီၣ်က၀ီၤပူၤခီဖျိတၢ်ဒုးကဲထီၣ်အဃိ လီၢ်က၀ီၤကမျၢၢ်ထံဖိကီၢ်ဖိတဖၣ်သူအီၣ်ဖျးအီၣ်တၢ်တသ့လၢၤဘၣ်ဒီး လီၢ်က၀ီၤကမျၢၢ်ဒီးၦၤဃ့ၢ်မှံဟးဖျိးတဖၣ်အဂီၢ် လိၣ်ဘၣ်ဒံး၀ဲဂံၢ်ခီၣ််ထံးတၢ်အီၣ်တၢ်အီတဖၣ်အဂ့ၢ်န့ၣ် တၢ်ကရၢကရိလၢအမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ

တကီၢ်ခါခဲအံၤ ကညီကီၢ်စဲၣ်ဃုာ်ဒီး ကီၢ်ခီဒိၣ်အဂၤတဖၣ်ဒီး ကီၢ်စဲၣ်တနီၤအပူၤစ့ၢ်ကီး ခီဖျိတၢ်ဒုးကဲထီၣ်လၢဟီၣ်က၀ီၤပူၤအဃိ ကမျၢၢ်တဖၣ်ဘၣ်ဃ့ၢ်အိၣ်ခူသူၣ်အိၣ်၀ဲအသိး ကရ့ၣ်နံၣ်ကီၢ်စဲၣ်ႇခၠီကီၢ်စဲၣ်ႇစကဲကီၢ်ခီဒိၣ်အပူၤ လီၢ်က၀ီၤၦၤဃ့ၢ်မှံဟးဖျိးအိၣ်၀ဲလၢအကလီၢ်ဃၣ်ဃၣ်ညါဒီး လိၣ်ဘၣ်၀ဲဂံၢ်ခီၣ်ထံးတၢ်အီၣ်တၢ်အီဒီးကသံၣ်ကသီတဖၣ်စ့ၢ်ကီးအဂ့ၢ်န့ၣ် ဟီၣ်က၀ီၤတၢ်ကစီၣ်သန့တဖၣ်ပာ်ဖျါ၀ဲန့ၣ်လီၤႉ