KIC News

လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ပယီၤသုးတၢ်သမံသမိးတြဲၤလီၢ်တဖၣ် အိၣ်ခိးသမံသမိးလီၢ်က၀ီၤကမျၢၢ် လၢအဟးထီၣ်က့ၤလီၤတဖၣ်ဒီးတကးဒံးအမဲာ်ညါအ၀ဲသ့ၣ်ထၢစ့ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ သ၀ီလၢအိၣ်ကၠၤအ့စ့ၣ်ကၠံ၀့ၢ်ခိၣ်ဃၢၤကမျၢၢ်တဖၣ်ဖဲအ၀ဲသ့ၣ်လဲၤၦ့ၤတၢ်ဖိတၢ်လံၤလၢ၀့ၢ်ပူၤအခါန့ၣ် ပယီၤသုးဃ့အီၣ်စ့ဒိးသန့ၤထီၣ်သးလၢတၢ်ဖိတၢ်လံၤအါစှၤအဖီခိၣ်ဒီးခံပ့ၣ်ပၣ်သိစဲးတြီၢ်အကၣ်လၣ်(၅၀)ခံဖျၢၣ်န့ၣ် ဃ့၀ဲတုၤလၢ(၁၅၀၀၀)ကၠးညါအဂ့ၢ်န့ၣ် ကၠၤအ့စ့ၣ်ကၠံ၀့ၢ်ပူၤ ကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သိစဲးခံပ့ၣ်ပၣ်န့ၣ်အ၀ဲသ့ၣ်ဃ့၀ဲတကလးဘျဲၣ်ညါႉမ့မ့ၢ်ၦၤမဲာ်သီနါသီန့ၣ်အ၀ဲသ့ၣ်ဃ့အီၣ်၀ဲဆူၣ်မးႉ လၢက၀ီၤဒ့(၁)သွံၣ်ဃူဖိးမဲာ်ညါ တၢ်သမံသမိးတြဲၤန့ၣ်ရးဒိၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်လၢအဟးထီၣ်က့ၤလီၤလဲၤက့ၤဖံးမၤတၢ်လၢ၀့ၢ်ပူၤတဖၣ်အံၤမုၢ်ဆါခီန့ၣ်ပယီၤသုးသမံသမိးဃ့အီၣ်၀ဲစ့ဒီး ဒ်န့ၣ်အသိးလၢမုၢ်နၤခီန့ၣ်အ၀ဲသ့ၣ်ခးလီၤကျိဖးဒိၣ်ကိးမုၢ်နၤဒဲးအဃိလီၢ်က၀ီၤကမျၢၢ်တဖၣ်ဘၣ်ဟးထီၣ်က့ၤလီၤအိၣ်လၢတၢ်ပလီၢ်ပဒီပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါကျဲလၢအနုာ်လီၤလၢကၠၤအ့စ့ၣ်ကၠံ၀့ၢ်ပူၤတဖၣ်တနီၤန့ၣ်ပယီၤသုးမၤဟးဂီၤ၀ဲဒီး အ၀ဲသ့ၣ်အိၣ်ခိးသမံသမိးဃ့အီၣ်စ့တကးဒံးဘၣ်အမဲာ်ညါခးလီၤကျိဖးဒိၣ်ဆူသ၀ီခိၣ်သ၀ီဃၢၤအဂ့ၢ်န့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ်(ပအဖ)သိၣ်မှံၤ...

လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ်အပူၤ တၢ်စူၤခါအကတီၢ် ခီဖျိၦၤဃ့ၢ်မှံဟးဖျိးသ့ၣ်တဖၣ်အီဘၣ်ထံ တကဆှီဘၣ်အဃိ ၦၤဖိဒံဖိသၣ်တဖၣ်တၢ်ဟၢဖၢလူတၢ်ဆါကဲထီၣ်သးအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဖၣ်စံး၀ဲန့ၣ်လီၤႉ ကမျၢၢ်ၦၤဃ့ၢ်မှံဟးဖျိးလၢအိၣ်တနီသရံၣ်ကီၢ်ဆၣ်ပူၤတဖၣ်အါဒၣ်တက့ၢ်န့ၣ်သူအီ၀ဲဒၣ်ထံလၢထံကျိပူၤႇထံကစၢၢ်လီၤဒီး တၢ်စူၤခါအတီၢ်ပူၤခီဖျိထံတကဆှီဘၣ်အဃိၦၤဖိသၣ်(၅)နံၣ်ဒီးအနံၣ်တဆံဘျဲၣ်တဖၣ်အါဒၣ်တက့ၢ်န့ၣ်ဘၣ်၀ဲဒၣ်တၢ်ဟၢဖၢလူတၢ်ဆါအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တနံၣ်အံၤတၢ်စူၤစဲၤခံအဃိထံတဂ့ၤအါအါဘၣ်မီၤနီၤႉအ၀ဲသ့ၣ်အီဘၣ်ထံအံၤအဃိၦၤဖိသၣ်တဖၣ် အါဒၣ်တက့ၢ်န့ၣ်အ၀ဲသ့ၣ်ဟၢဖၢလူမီၤနီၤႉအဃိစှၤသီအတီၢ်ပူၤအံၤတၢ်ဟၢဖၢလူတၢ်ဆါကဲထီၣ်သးဟဲအါထီၣ်၀ဲႉမ့၀ံၤပၢၢ်တုၤလၢအဂံၢ်အဘါလီၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးတလါအံၤလါယူၤထီၣ်တၢတနွံအခါန့ၣ်လၢၦၤလီၢ်အိၣ်ကမှံလီၢ်ဖဲန့ၣ်တဖၣ်ၦၤဘၣ်တိးကွ့တၢ်ညၣ်ဂိၢ်တၢ်ဆါအိၣ်၀ဲအဂၤ(၃၀၀)ဘျဲၣ်ညါဒီးတကီၢ်ခါခဲအံၤအ၀ဲသ့ၣ်အီဘၣ်ထံတကဆှီ၀ဲဘၣ်အသိးခီဖျိတဒိးန့ၢ်ဘၣ်ကသံၣ်ကသီတၢ်ဆီၣ်ထွဲမၤစၢၤကူကူလၢလၢဘၣ်အဃိ တကီၢ်ခါခဲအံၤကသံၣ်ကသီလီၤတူာ်လီၤကၤထီၣ်၀ဲလံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ အ၀ဲစံး၀ဲလၢ“လၢအံၤတကပၤန့ၣ်ကသံၣ်ကသီတၢ်ဆီၣ်ထွဲမၤစၢၤတအိၣ်ဘၣ်အဃိတၢ်ကီတၢ်ခဲအိၣ်မီၤနီၤႉဖဲအအိၣ်န့ၣ်ပကူစါယါဘျါအီၤဒ်န့ၣ်လီၤႉခဲအံၤတၢ်ညၣ်ဂိၢ်တၢ်ဆါႇတၢ်ဟၢဖၢလူတၢ်ဆါကဲထီၣ်သးအိၣ်မီၤနီၤႉကဲထီၣ်တုၤလၢၦၤသံဒုတအိၣ်ဒံးဘၣ်ႉတၢ်ဆါကဲထီၣ်တနံၣ်ဒီးတနံၣ်န့ၣ်တဒ်သိးလိာ်သးဘၣ်ႉတၢ်စူၤနါက့စဲၤခံအဃိတနံၣ်အံၤနးဒိၣ်၀ဲန့ၣ်ႉမ့၀ံၤတၢ်အီၣ်တၢ်အီစ့ၢ်ကီးလီၤတူာ်လီၤကၤထီၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဟီၣ်က၀ီၤဖဲန့ၣ်အပူၤခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီဒီးကသံၣ်ကသီသ့ၣ်တဖၣ်အဃိ လၢၦၤဃ့ၢ်မှံဟးဖျိးသ့ၣ်တဖၣ်အံၤအဂီၢ်တၢ်အီၣ်တၢ်အီဒီးကသံၣ်ကသီလီၤတူာ်လီၤကၤထီၣ်၀ဲဒ်အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ လၢတနီသရံၣ်ကီၢ်ဆၣ်အပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၈၀၀၀)ဘျဲၣ်ညါဒီးတလါအံၤလါယူၤထီၣ်တၢတနွံအခါန့ၣ်လၢကီၢ်ဆၣ်၀ဲန့ၣ်အပူၤခီဖျိတၢ်ဒုးဆဲးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးတဖၣ်အဘၢၣ်စၢၤအဃိ...

လါယူၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် ကျိဖးဒိၣ်ပယီၤသုး(၃၁၈)သုးရ့ၣ်လၢအိၣ်တလၢၤကီၢ်စဲၣ် မူၣ်ဒိၤကီၢ်ဆၣ် အဘ့ၣ်သ၀ီပူၤတဖၣ်အံၤ ပညိၣ်လီၤကျိဖးဒိၣ်တဆၣ်ဆူကညီကီၢ်စဲၣ် နိၣ်တကီကီၢ်ဆၣ် ချၢၣ်တကူၣ်တၢၣ်သ၀ီဒီးကၠဲၣ်ကမီၣ်ဟီၣ်က၀ီၤပူၤ အဂ့ၢ်န့ၣ် ပယီၤသုးလၢအဟဲက့ၤစံၣ်ဖျိးထီၣ်တဖၣ် စံး၀ဲန့ၣ်လီၤႉ အဘ့ၣ်ကျိဖးဒိၣ်ပယီၤသုးကလၢၤအံၤပညိၣ်လီၤ၀ဲကျိဖးဒိၣ်(၁၂၂ မမ) ခံခိၣ်ဒီး(၁၂၀ မမ)ကျိဖးဒိၣ်ခံဖျၢၣ်ဆူ ချၢၣ်–တကူၣ်တၢၣ်ကရူၢ် ဒူသ၀ီတဖၣ်အပူၤဒီး ကၠဲၣ်ကမီၣ်ဟီၣ်က၀ီၤပူၤအဂ့ၢ်န့ၣ် ပယီၤသုးလၢအဟဲက့ၤစံၣ်ဖျိးထီၣ်တဂၤ စံး၀ဲန့ၣ်လီၤႉ ပယီၤသုး(ဆလိုင်းလက်ခိုလွန်း)လၢအဟဲက့ၤစံၣ်ဖျိးထီၣ်လၢအဘ့ၣ်သုးကလၢၤအံၤစံး၀ဲလၢ“လၢသုးကလၢၤန့ၣ်အ၀ဲသ့ၣ်ပညိၣ်လီၤကျိဖးဒိၣ်တဖၣ်မီၤနီၤႉသုးတြိၤမ့နဲၣ်လီၤတၢ်ကလုၢ်လၢခးန့ၣ်အ၀ဲသ့ၣ်ခးလီၤ၀ဲလီၤႉဟီၣ်က၀ီၤပၢၤကီၢ်၀ဲၤလီၢ်မ့ဃ့တၢ်မၤစၢၤန့ၣ်အ၀ဲသ့ၣ်ခးလီၤစၢၤ၀ဲလီၤႉတဘျီတခီၣ်န့ၣ်ဒ်သိးၦၤကသ့ၣ်ညါဘၣ်လၢအ၀ဲသ့ၣ်အိၣ်န့ၣ်အ၀ဲသ့ၣ်ခးပျံၤတၢ်အိၣ်ႉအ၀ဲသ့ၣ်ခးလီၤစိတၢ်လၢချၢၣ်တကူၣ်တၢၣ်ႇတီၤကလ့ႇကၠဲၣ်ကမီၣ်တကပၤန့ၣ်တလီၢ်လီၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါယူၤ ၁၆...

လါယူၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤထံး ဖလူ–ဂီၤလ့ၤကျဲ လ့က့ၣ်ကိာ်၀့ၢ်သီဒီးသ့ၣ်ဘီဘိသ၀ီတကပၤန့ၣ် တၢ်လီၢ်လၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်အလီၢ်တဖၣ်န့ၣ် ခီဖျိဟီၣ်လာ်မ့ၣ်ပိၢ်ဒီး ကျိဖးဒိၣ်အချံလၢအပိၢ်ဖးထီၣ်ဒံးဘၣ်တဖၣ်အံၤအိၣ်တ့ၢ်ဒံး၀ဲအဃိတၢ်ဘၣ်ယိၣ်အိၣ်၀ဲအဂ့ၢ်န့ၣ်  လ့က့ၣ်ကိာ်ၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ ဟီၣ်က၀ီၤဖဲန့ၣ်အပူၤခီဖျိခံခီခံကပၤတၢ်ဒုးဂၢၢ်ထီၣ်လံအဃိလ့က့ၣ်ကိာ်ဒီးသ့ၣ်ဘီဘိတၢ်လီၢ်တဖၣ်ၦၤက့ၤအိၣ်အိၣ်၀ဲတနီၤလံဒီးဘၣ်ဆၣ်လၢက၀ီၤဒ့ပူၤဟံၣ်ခိၣ်ဟံၣ်ဃၢၤကရၢၢ်ပူၤန့ၣ်ကျိဖးဒိၣ်အချံလၢအတပိၢ်ဖးထီၣ်ဒံးဘၣ်အံၤအိၣ်ဒံး၀ဲဒီး ဟီၣ်လာ်မ့ၣ်ပိၢ်လၢပယီၤသုးဒိးလီၤဃာ်၀ဲတဖၣ်စ့ၢ်ကီးအိၣ်ဒံး၀ဲအဂ့ၢ်န့ၣ် လ့က့ၣ်ကိာ်လီၢ်က၀ီၤကမျၢၢ်တဂၤ စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“လၢလ့က့ၣ်ကိာ်န့ၣ်ၦၤက့ၤအိၣ်တနီၤလံႉသ့ၣ်ဘီဘိနါက့ၦၤက့ၤအိၣ်တနီၤစ့ၢ်မီၤနီၤႉတၢ်လီၢ်လၢတၢ်ဒုးကဲထီၣ်လၢပယီၤသုးဒီးကညီဖီၣ်စုက၀ဲၤကရူၢ်အဘၢၣ်စၢၤတဖၣ်န့ၣ်နက့ၤအိၣ်တဘူၣ်ဒံးဘၣ်ႉၦၤဟံၣ်ကရၢၢ်ပူၤတနီၤန့ၣ်ကျိဖးဒိၣ်အချံလီၤတဲာ်အတပိၢ်ဖးထီၣ်ဒံးဘၣ်နါက့အိၣ်မီၤနီၤႉပယီၤသုးဒိးလီၤဃာ်မ့ၣ်ပိၢ်နါက့အိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်(၂၀၂၂)လါဒံၣ်စ့ဘၢၣ်အခါလၢလ့ၣ်က့ၣ်ကိာ်က၀ီၤဒ့ပူၤဒီး(ပန်းခြံကုန်း)တကပၤန့ၣ် ဖဲကမျၢၢ်က့ၤမၤရှဲလဲဒွဲၣ်အူအီၣ်တၢ်တၦီာ်အဆၢကတီၢ်ကျိဖးဒိၣ်လၢအတပိၢ်ဖးထီၣ်ဒံးဘၣ်အံၤပိၢ်ဖးထီၣ်အဃိ ၦၤပိာ်မုၣ်တဂၤဒီးပိာ်ခွါတဂၤဘၣ်ဒိဒံး၀ဲအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးတကီၢ်ခါခဲအံၤလၢလ့က့ၣ်ကိာ်၀့ၢ်သီ ထံမဲး၀ါခံသ၀ီဒီးသ့ၣ်ဘီဘိသ၀ီတကပၤန့ၣ်...

လါယူၤ ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် မၠၣ်၀တံၣ်၀့ၢ်ကလံၤထံးသ၀ီအဖျၢၣ်(၃၀)ဃၣ်ဃၣ်လီၢ်က၀ီၤကမျၢၢ်အဂၤ(၁၀ႇ၀၀၀)ဘျဲၣ်အဂီၢ် လိၣ်ဘၣ်၀ဲဂံၢ်ခီၣ်ထံး တၢ်အီၣ်တၢ်အီဒီးဆူၣ်ချ့တၢ်အံးထွဲကွၢ်ထွဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤ ၦၤမၤစၢၤၦၤဃ့ၢ်မှံဟးဖျိးတဖၣ်အအိၣ် န့ၣ်လီၤႉ မၠၣ်၀တံၣ်ကလံၤထံးလ့က့ၣ်ကိာ်၀့ၢ်သီဆၢခိၣ်တုၤဃီၤလၢဂီၤလ့ၤႇဆူၣ်ကလံၣ်ႇအိဖးဒီးကလီၤထီၣ်လီၢ်က၀ီၤဒူသ၀ီ တကပၤန့ၣ်ကမျၢၢ်လၢအဘၣ်ဃ့ၢ်မှံဟးဖျိးသ့ၣ်တဖၣ်အံၤတကီၢ်ခါတၢ်စူၤခါအကတီၢ်အ၀ဲသ့ၣ်က့ၤအိၣ်လၢအဒူသ၀ီတဘူၣ်ဒံးဘၣ်,ဘၣ်ဟးစံၣ်အိၣ်ကဒုသးအဖၢမုၢ်အဂ့ၢ်န့ၣ် ၦၤလၢအဆဲးကျိးမၤစၢၤၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်ႇကဘီယူၤစ့ၢ်ကီးဟဲဆှၣ်တၢ်အိၣ်ႉတနံၣ်အံၤယဆိမိၣ်ကကီဖးဒိၣ်ညါႉမၤအီၣ်တၢ်ဒၢးတသ့မၤအီၣ်ကျီးဒၢးတသ့ဘၣ်ႉၦၤဟဲမၤစၢၤတၢ်နါက့ဟဲမၤစၢၤ၀ဲတဘျီတခီၣ်လီၤမီၤနီၤႉက့ၤအိၣ်လၢသ၀ီဒုန့ၢ်မီၤနီၤႉဘၣ်ဆၣ်က့ၤအိၣ်တၢ်ဘံၣ်တၢ်ဘၢတအိၣ်ဘၣ်ႉပယီၤသုးအိၣ်လၢသ၀ီပူၤႇ(DKBA)နါက့အိၣ်စ့ၢ်လီၤႉကလံၤထံးအံၤၦၤဃ့ၢ်မှံဟးဖျိးကအိၣ်လၢအဂၤ(၁၀၀၀၀)ဘျဲၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးအပူၤကွံာ်လါမ့ၤတုၤလၢတလါအံၤလါယူၤန့ၣ်ခီဖျိတၢ်ဒုးကဲထီၣ်ဒံး၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်ႇကီၢ်သူလ့ၤသုးမုၢ်ဒိၣ်(KTLA)ဒီးပယီၤသုးအဘၢၣ်စၢၤအဃိလီၢ်က၀ီၤပူၤကၠိတဖၣ်အါဒၣ်တက့ၢ်န့ၣ်တက့ၤအိးထီၣ်၀ဲဒံးဘၣ်အသိးတၢ်ဆၢကတီၢ်စ့ၢ်ကီးဘၣ်လၢကဘၣ်မၤအီၣ်စံာ်လံဘၣ်ဆၣ်အ၀ဲသ့ၣ်က့ၤမၤအီၣ်စံာ်တဘူၣ်ဒံးဘၣ်အဂ့ၢ်န့ၣ် ဘျၢၣ်ဒိၣ်သ၀ီဖိလၢအဃ့ၢ်တၢ်ဒုးတဂၤ စံး၀ဲန့ၣ်လီၤႉ “ခဲအံၤလၢသ့ၣ်ဘီဘိဒီးဂီၤလ့ၤႇယသ့ၣ်ကူၤသ၀ီတကပၤန့ၣ်ၦၤတအိၣ်အါအါလၢၤဘၣ်ႉပယီၤသုးအိၣ်ဒံးမီၤနီၤႉ ၦၤဟဲခးအ၀ဲသ့ၣ်ၦၤဟဲတ့ၢ်လီၤအ၀ဲသ့ၣ်လၢဒြိမ့ၣ်ပိၢ်အိၣ်လီၤႉအဃိန့ၣ်အ၀ဲသ့ၣ်က့ၤခးလီၤကဒါကျိဖးဒိၣ်လၢသ၀ီပူၤတၢ်ဖံးအီၣ်မၤအီၣ်လီၢ်ကျဲမီၤနီၤႉအဃိၦၤဖိသၣ်တဖၣ်စ့ၢ်ကီးက့ၤထီၣ်ကၠိတဘူၣ်ဘၣ်ႉၦၤနီၢ်ဒိၣ်နါက့က့ၤအိၣ်က့ၤအီၣ်က့ၤမံလၢသ၀ီပူၤတဘူၣ်အါအါဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ စှၤသီအတီၢ်ပူၤအံၤလၢမၠၣ်၀တံၣ်၀့ၢ်ဃၢၤမဲၢ်ကနဲလီၢ်က၀ီၤကၠီၣ်မဲႇကၠီၣ်တီၤတကပၤန့ၣ်တၢ်ဒုးက့ၤကဲထီၣ်ကဒါ၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤဒီးမၠၣ်၀တံၣ်ပယီၤသုးခီၣ်သုးရ့ၣ် (ခလရ–၂၇၅)ခးလီၤကျိဖးဒိၣ်ဒီးကဘီယူၤစ့ၢ်ကီးဟဲခးလီၤတၢ်တပယူာ်ဃီအဂ့ၢ်န့ၣ် (KNLA)ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤႉ ဒ်န့ၣ်အသိးလၢကီးတရံးႇကြုၢ်တုႇကၠၤအ့စ့ၣ်ကၠံ၀့ၢ်ပူၤဒူသ၀ီတဖၣ်အပူၤစ့ၢ်ကီးတၢ်ဒုးက့ၤကဲထီၣ်ကဒါ၀ဲလၢ...

လါယူၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢကရ့ၣ်နံၣ်ကီၢ်စဲၣ်အဆၢ ယိၤဒိၣ်ကီၢ်စဲၣ်ကလံၤထံး မိဘၠဲ၀့ၢ်ပူၤန့ၣ် ခီဖျိပယီၤသုးခးလီၤကျိဖးဒိၣ်ကျိဖိအဃိ လါယူၤ ၆ သီ တုၤလၢ ၈ သီ လၢသၢသီအတီၢ်ပူၤ ကမျၢၢ်သံ၀ဲ(၂၆)ဂၤအဂ့ၢ်န့ၣ် (Free Burma Rangers-FBR) ထုးထီၣ်ပာ်ဖျါ၀ဲ ဖဲလါယူၤ ၁၃ သီအနံၤန့ၣ်လီၤႉ ကမျၢၢ်လၢအသံတဖၣ်အကျါ(၁၄)ဂၤန့ၣ်...

လါယူၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ဒီးမူကီၢ်ဆၣ်အပူၤ တၢ်ဒုးကဲထီၣ်လၢနၣ်သၤကွ့ပူၤ၀ံၤလီၢ်ခံ ခီဖျိကျဲတၢ်ဟးထီၣ်က့ၤလီၤကီခဲထီၣ်အဃိ ဂံၢ်ခီၣ်ထံးတၢ်အီၣ်တၢ်အီအၦ့ၤဒိၣ်ထီၣ် ကအိၣ်လၢခံဆးဃၣ်ဃၣ်ညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါယူၤ ၆ သီအခါ လၢနၣ်သၤကွ့၀့ၢ်ပူၤတၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ပယီၤသုးအဘၢၣ်စၢၤဒီးတိၤဟးဂီၤ၀ံၤလီၢ်ခံကမျၢၢ်တဖၣ်လ့ၢ်ထီၣ်လ့ၢ်လိၤက့ၤ၀ဲလၢချံန့ၣ်လီၤႉလၢန့ၣ်အမဲာ်ညါခီဖျိပယီၤသုးတပျဲၦၤစိာ်ထီၣ်စိာ်လီၤဟုသးလၢဟီၣ်က၀ီၤပူၤဘၣ်အဃိပနံာ်တၢ်ဖိတၢ်လံၤလီၤတူာ်ထီၣ်၀ဲလံအဂ့ၢ်န့ၣ် မူ၀့ၢ်ပူၤ ကမျၢၢ်တဂၤ စံး၀ဲဒၣ်န့ၣ်လီၤႉ အ၀ဲစံး၀ဲလၢ“လၢမူ–လၢၢ်ဒိၣ်ကျဲမုၢ်ကပၤန့ၣ်ကိညၢ်ဒံးႉမ့မ့ၢ်လၢကစၢၢ်ခီၣ်ထံးန့ၣ်ဟုသးၦ့ၤဒိၣ်ထီၣ်ညါႉ တိၤတဘိန့ၣ်ခီတန့ၢ်လၢၤဘၣ်အဃိဘၣ်လ့ၢ်လိၤလ့ၢ်ထီၣ်က့ၤလၢချံန့ၣ်လီၤႉဟုသးႇပနံာ်တၢ်ဖိတၢ်လံၤလၢအဂၤစ့ၢ်ကီး အၦ့ၤထီၣ်ခဲလၢာ်တကးဒံးဘၣ်တၢ်အီၣ်တၢ်အီလီၤတူာ်ထီၣ်လံအဃိတၢ်ၦ့ၤထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါအပူၤကွံာ်ဟုသး(၅)ကလးခိၣ်ဃၢၤတထၢၣ်န့ၣ်ခဲအံၤအၦ့ၤထီၣ်တုၤလၢ(၈)ကလးဘျဲၣ်လံအသိး...

လါယူၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤ တၢ်ဆၢကတီၢ်တုၤဃီၤ၀ဲလၢဘၣ်မၤစံာ်သူၣ်လီၤဘုလံဘၣ်ဆၣ် ခီဖျိကမျၢၢ်တဖၣ်ဘၣ်ယိၣ်၀ဲလၢတၢ်ဒုးကက့ၤကဲထီၣ်ကဒါအဃိ ဒူသ၀ီတနီၤတုၤလၢခဲအံၤအ၀ဲသ့ၣ်မၤစံာ်သူၣ်လီၤဘု တဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ မၠၣ်၀တံၣ်ကီၢ်ဆၣ် ကီၣ်ကီၤႇမဲၢ်ပျဲၤႇထံၣ်ခၠါရၤသ၀ီဖိတဖၣ်အံၤအါဒၣ်တက့ၢ်တၢ်စူၤခါန့ၣ်မၤအီၣ်၀ဲစံာ်ဒီးဘၣ်ဆၣ် တနံၣ်အံၤလါမးရှးအခါခီဖျိတၢ်ဒုးကဲထီၣ်၀ဲလၢပယီၤသုးႇသုးခိးကီၢ်ဆၢ(BGF)ဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိ ကျိဖးဒိၣ်လီၤတဲာ်လၢစံာ်ပူၤအိၣ်၀ဲဒီးတကးဒံးဘၣ်ဘၣ်ယိၣ်လၢတၢ်ဒုးကကဲထီၣ်ကဒါအဃိမၤအီၣ်စံာ်တဘူၣ်လၢၤဘၣ် အဂ့ၢ်န့ၣ် မဲၢ်ပျဲၤသ၀ီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤဖဲမဲၢ်ပျဲၤအံၤၦၤမၤအီၣ်စံာ်အိၣ်က့ၤထဲလွံၢ်ဂၤယဲၢ်ဂၤလီၤႉလၢညါခါသ၀ီပူၤအံၤၦၤလၢအအိၣ်ဒီးအစံာ်လီၢ်နာ်လီၢ်ညါန့ၣ်မၤအီၣ်စံာ်ကိးဂၤဒဲးလီၤႉဖဲလီၢ်ခံအံၤတၢ်ဒုးကဲထီၣ်ဘျီၦၤဘၣ်ပာ်အိၣ်တ့ၢ်တၢ်ခဲလၢာ်ၦၤဘၣ်စံၣ်ထီၣ်အဃိၦၤဘၣ်ယိၣ်လၢကျိၣ်စ့လၢၦၤဘျၢလီၤဃာ်၀ဲတဖၣ်အံၤကဆှူဂီၤအဃိၦၤတမၤအီၣ်စံာ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်သ့ၣ်တဖၣ်အံၤအါဒၣ်တက့ၢ်န့ၣ်မၤအီၣ်စံာ်သူၣ်အီၣ်ဖျးအီၣ်၀ဲဘုဒီးတကးဒံးအမဲာ်ညါ တၢ်ဆၢကတီၢ်မ့တုၤဃီၤတကတီၢ်ဘၣ်တကတီၢ်န့ၣ်အ၀ဲသ့ၣ်သူၣ်၀ဲပဲႇဘုခ့သ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲ န့ၣ်လီၤႉ ၀့ၣ်ရှါသ၀ီဖိ စဲကိၤကိၤ စံး၀ဲလၢ“ပသ၀ီအံၤတနံၣ်အံၤၦၤမၤအီၣ်စံာ်ဖိတဖၣ်လၢကမၤအီၣ်စံာ်အဂီၢ်န့ၣ်...

လါယူၤ ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ်ကလံၤထံးအပူၤ ခီဖျိလီၢ်က၀ီၤကမျၢၢ်တဖၣ်ဟးထီၣ်က့ၤလီၤဖံးအီၣ်မၤအီၣ်တၢ်ကီခဲထီၣ်အဃိ တကီၢ်ခါခဲအံၤအ၀ဲသ့ၣ်ဘုၣ်ဆါထိး ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢခူပူၤ၀့ၢ်ပူၤတၢ်ဒုးကဲထီၣ်၀ဲတလီၢ်လီၢ်ဒီး ကမျၢၢ်တဖၣ်စ့ၢ်ကီးဟးထီၣ်က့ၤလီၤ ဖံးအီၣ်မၤအီၣ်တၢ်တဘၣ်ဂီၢ်လၢၤဘၣ်အဃိလၢတၢ်လုၢ်အီၣ်နီၢ်ခိသးသမူအဂီၢ်န့ၣ်အ၀ဲသ့ၣ်ဘုၣ်ဆါထိးဟဲအါထီၣ်၀ဲအဂ့ၢ်န့ၣ် ကီးတရံးကီၢ်ဆၣ်ကလံၤထံး ယွၤသ့ၣ်သ၀ီဖိ နါမၣ်ထွ့ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်ၦၤဘုၣ်ဆါထိးတအိၣ်အါအါဘၣ်ႉခဲအံၤနကမၤအီၣ်တၢ်လၢအဂၤခီဒၢးတၢ်အိၣ်သးတဂ့ၤဘၣ်အဃိတဘၣ်ဂီၢ်ဘၣ်မီၤနီၤႉအဃိၦၤဘုၣ်ဆါထိးဟဲအါထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တချုးလၢသုးဟံးန့ၢ်တၢ်စိတၢ်ကမီၤဒံးဘၣ်အခါန့ၣ်လီၢ်က၀ီၤကမျၢၢ်တဖၣ်အ၀ဲသ့ၣ်ဟးၦ့ၤ၀ဲဒၣ်တၢ်ချံတၢ်သၣ်လၢဟီၣ်က၀ီၤပူၤ၀ံၤလဲၤဆါကဒါ၀ဲလၢကီးတရံးတၢ်ဆါတၢ်ၦ့ၤလီၢ်ဘၣ်ဆၣ်ႇသုးဟံးန့ၢ်တၢ်စိတၢ်ကမီၤ၀ံၤလီၢ်ခံဟးထီၣ်က့ၤလီၤကီခဲထီၣ်၀ဲဒီးကလဲၤဆါတၢ်ချံတၢ်သၣ်လၢကီးတရံး၀့ၢ်တၢ်ဆါတၢ်ၦ့ၤလီၢ်အံၤစ့ၢ်ကီးတညီ၀ဲလၢၤဘၣ်အဃိ ဘၣ်ဘုၣ်ဆါက့ၤထိးဒ်အံၤ လီၤအဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီး...

လါယူၤ ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံကီၢ်ဆၣ်အပူၤ ပယီၤသုးတၢ်သမံသမိးတြဲၤလၢအိၣ်ကျဲမုၢ်ဖီခိၣ်သ့ၣ်တဖၣ်အံၤ ဟံကွံာ်၀ဲကမျၢၢ်အဟုသးဒီးကျိၣ်စ့တဖၣ်ကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ လၢသၣ်တီၣ်ကၠံကီၢ်ဆၣ်အပူၤစးထီၣ်ဖဲပယီၤသုးတပျဲၦၤစိာ်ဟုသးႇကသံၣ်ကသီႇညၣ်ဃ့သ့ၣ်တဖၣ်အံၤ၀ံၤလီၢ်ခံန့ၣ် ဟုသးလၢကမျၢၢ်ဟဲက့ၤစိာ်၀ဲတဖၣ်အံၤပယီၤသုးတၢ်သမံသမိးတြဲၤလီၢ်တဖၣ်အံၤဟံကွံာ်၀ဲတကးဒံးဘၣ်ဟံကွံာ်၀ဲ ပၢၢ်တုၤလၢကျိၣ်စ့ညါအဂ့ၢ်န့ၣ် လီၢ်က၀ီၤၦၤပိာ်မုၣ်လၢအဘၣ်သဂၢၢ်ဒီးတၢ်ကဲထီၣ်သးအံၤတဂၤ စံး၀ဲန့ၣ်လီၤႉ အ၀ဲစံး၀ဲလၢ“ပလဲၤၦ့ၤဟုသးလၢတီအူလၢပဟံၣ်ပဃီကအီၣ်အဂီၢ်မီၤနီၤအ၀ဲသ့ၣ်တပျဲစိာ်၀ဲဘၣ်ႉ(စစ်တောင်း) ပယီၤသုးတြဲၤပံးဃာ်၀ဲႉနမ့တိနိၣ်ပယီၤသုးလၢအသးဂ့ၤဒုတနီၤန့ၣ်နၢ်ပၢၢ်န့ပဂီၢ်ဒီးဟ့ၣ်စိာ်ၦၤတထၢၣ်ဒ်န့ၣ်အိၣ်မီၤနီၤႉ ဖံသးၦၢ်လၢအလဲၤၦ့ၤကသံၣ်ကသီတဖၣ်န့ၣ်ပယီၤသုးမ့ထံၣ်အ၀ဲသ့ၣ်စိာ်စ့(၁)ကလီၢ်(၂)ကလီၢ်န့ၣ်တဲ၀ဲလၢ မ့ၢ်သုလဲၤမၤစၢၤ(PDF)ခီဧါမ့၀ံၤဟံကွံာ်၀ဲၦၤစ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်လၢအိၣ်သၣ်တီၣ်ကီၢ်ဆၣ်ပူၤတဖၣ်အါဒၣ်တက့ၢ်န့ၣ်အ၀ဲသ့ၣ်လဲၤၦ့ၤအီၣ်၀ဲဂံၢ်ခီၣ်ထံးတၢ်အီၣ်တၢ်အီ လၢတီအူ၀့ၢ်ပူၤဒီးဖဲအ၀ဲသ့ၣ်လဲၤၦ့ၤတၢ်အခါသၣ်တီၣ်၀့ၢ်ဒီးတီအူ၀့ၢ်ဘၢၣ်စၢၤ(စစ်တောင်း)တၢ်သမံသမိးတြဲၤႇ (၄)မဲၤတြဲၤႇ(၇)မဲၤတြဲၤဒီး(၁၃)မဲၤတၢ်သမံသမိးတြဲၤလီၢ်သ့ၣ်တဖၣ်အံၤအိၣ်ခိးသမံသမိးတၢ်အါမးတကးဒံးဘၣ် သ့ကွံာ်၀ဲကမျၢၢ်အဟုသးဒီးကျိၣ်စ့ကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအသ့ၣ်ညါဘူးလိာ်သးဒီးပယီၤသုးတဖၣ်တနီၤန့ၣ်အ၀ဲသ့ၣ်စိာ်ထီၣ်စိာ်လီၤဟုသးလၢတၢ်နၢ်ပၢၢ်ဖီခိၣ်ဘၣ်ဆၣ်ႇပယီၤသုးတၢ်သမံသမိးတြဲၤတဖၣ်အံၤနမ့တီၣ်ဟုသးတထၢၣ်န့ၣ်ဃ့အီၣ်စ့လၢအမၢတုၤလၢအကလးညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါလၢတၢ်လုၢ်အီၣ်နီၢ်ခိသးသမူအဂီၢ်လီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်အံၤ...