လါစဲးပထ့ဘၢၣ် ၁၇ သီ, ၂၀၁၈နံၣ်, စီၤထိလ့
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၅) ဟီၣ်က၀ီၤအပူၤ ခံခီခံကပၤတၢ်ခးလိာ်သးကဲထီၣ် တၢ်ဂ့ၢ် အဖီခိၣ် ဖဲလါစဲးပထ့ဘၢၣ် ၁၂ သီတုၤ ၁၄သီအနံၤ တၢ်ကွၢ်ဟုၣ်ကွၢ်စုၣ်တၢ်ပတုာ်တၢ်ခးကမံးတံာ် (၁၈)၀ီ တ၀ီ တၢ်အိၣ်ဖှိၣ်အပူၤ တၢ်တဲသကိး၀ဲတအိၣ်ဘၣ်အဂ့ၢ်ကမံးတံာ်နဲၣ်ရွဲၣ်-၁ဒီကထၢၣ်ရွ့ၣ်ခါတဲ၀ဲန့ၣ် လီၤ.
“ဘၣ်ဃး သုးက့(၅)တၢ်ဂ့ၢ်အံၤ JMC_S( ကီၢ်စဲၣ်အပတီၢ်) တၢ်တဲသကိးအီၤဖးအါညါ, တဘျီညါအံၤတၢ်ပာ်ဖျါ ထီၣ်ဘၣ်ဃးသုးက့(၅)တၢ်ဂ့ၢ်အံၤ တအိၣ်ဘၣ်. ဘၣ်ဆၣ်လၢတၢ်တ့ထီၣ်၀ဲကျဲအံၤ အဖီခိၣ် တၢ်ဒုးသ့ၣ်ညါနၢ် ပၢၢ်၀ဲကမျၢၢ်သ့ၣ်တဖၣ်အဂ့ၢ် ပမၤဃာ်အိၣ်”အဂ့ၢ်န့ၣ်အ၀ဲတဲလီၤ၀ဲဖဲလါစဲးပထ့ဘၢၣ် ၁၄ သီအနံၤ ဖဲလၢ တၢ်မၤရှဲလဲပှၤကွဲးတၢ်ကစီၣ်ဖိအမူးအကတီၢ်န့ၣ်လီၤ.
လၢန့ၢ်အမဲာ်ညါကမျၢၢ်ကမံးတံာ်တဖၣ်လဲၤထံၣ်လိာ်သးဒီး(ခ့ၣ်အဲၣ်ယူၣ်)ခိၣ်နၢ်အဖီခိၣ် တၢ်ကဘၣ်က့ၤ ဘှါရှဲတဲသကိးအိၣ်အဂ့ၢ် ဒီကထၢၣ်ရွ့ၣ်ခါတဲအါထီၣ်၀ဲန့ၣ်လီၤ.
(ခ့ၣ်အဲၣ်ယူၣ်) သုးက(၅)ဟီၣ်က၀ီၤအပူၤ အပူၤကွံာ်စးထီၣ်လၢလါအီကူာ် ၂၈သီ န့ၣ်ကီၢ်ပဒိၣ်သုးတကပၤ ဟဲခီပတာ်၀ဲတၢ်ပာ်ပနီၣ်ဟီၣ်က၀ီၤအဃိ တၢ်ခးလိာ်သးက့ၤကဲထီၣ်သး အသီတဘျီတုၤလါစဲးပထ့ဘၢၣ် ၈ သီအနံၤအံၤ တစှၤန့ၢ် ဒံး (၅)ဘျီဒီး တၢ်ဘၣ်ဒိဘၣ်ထံးအိၣ်၀ဲအဂ့ၢ် ခ့ၣ်အဲၣ်ယူတဲ၀ဲန့ၣ်လီၤ.
JMC_U တၢ်အိၣ်ဖှိၣ်လၢတၢ်မၤအီၤယံာ်၀ဲ ၃သီအပူၤ တၢ်က့ၤသူၣ်ထီၣ်ကဒါက့ၤယိၤဒိၣ်ကီၢ် ကီၣ်ကး (RCSS) တၢ်ထၢအါထီၣ်သုးဖိတၢ်ဂ့ၢ်,လံာ်တၢ်တြီတဖၣ်,ဆူညါတၢ်မၤအကျဲ,ယိၤဒိၣ်,ကညီဒီးတလၢၤ(မိၣ်)ကီၢ်စဲၣ်သ့ၣ်တဖၣ်အပူၤ တၢ်ကဒုးအိၣ်ထီၣ်၀ဲလီၢ်က၀ီၤ အပတီၢ် တၢ်ကွၢ်ဟုၣ်ကွၢ်စုၣ်တၢ်ပတုာ်တၢ်ခး ကမံးတံာ်တၢ်ဂ့ၢ် သ့ၣ်တဖၣ် တၢ်တဲသကိးအီၤအဂ့ၢ်(JMU-U)အနဲၣ်ရွဲၣ်တဲ၀ဲန့ၣ်လီၤ.
ကီၢ်ဒီဘ့ၣ်အပတီၢ် တၢ်ခိးကွၢ်ဟုၣ်ကွၢ်စုၣ်တၢ်ပတုာ်တၢ်ခးကမံးတံာ်(JMC)အံၤ တၢ်ဒုးအိၣ်ထီၣ်အီၤလၢ ၂၀၁၅နံၣ် လါအိးကထိဘၢၣ်ဒီး လၢကမံးတံာ်အပူၤ ကီၢ်ပဒိၣ်သုးခၢၣ်စးတဖၣ် , ကလုာ်ဒူၣ်ဖီၣ်စုက၀ဲၤ ကရူၢ်ခၢၣ်စးတဖၣ်ဒီးခံကပၤတၢ်ဘၣ်သးကမျၢၢ်ခၢၣ်စးတဖၣ်န့ၣ်လီၤ.ကမံးတံာ်အံၤ ကပှဲၤထီၣ်သၢနံၣ်လီၤအဂ့ၢ် န့ၣ်လီၤ.
