လါနိၣ်၀့ဘၢၣ် ၁၄ သီ၊ ၂၀၁၈ နံၣ်။ နါ၀့ၣ်ဖၠိစၣ်
တၢ်မုာ်တၢ်ခုၣ်တၢ်လဲၤကျဲကတီၢ်အံၤအိၣ်ဒံးဒၣ်လၢတၢ်ပတုာ်တၢ်ခးအပတီၢ်ဒံးလီၤအဂ့ၢ်(Karen Development Network-KND)ကရူၢ်အံၤ ပာ်ဖျါထီၣ်၀ဲ တၢ်လီၤဃိထံသံကွၢ်ကမျၢၢ်လံာ်တၢ်ပာ်ဖျါအံၤ ဖဲလါနိၣ်၀့ဘၢၣ် ၁၂သီအနံၤ ဖဲ၀့ၢ်ဖၣ်အၣ်(GABBNAR)ဘျီၣ်အပူၤန့ၣ်လီၤႉ
ကလုာ်ဒူၣ်ဖီၣ်စုက၀ဲၤကရူၢ်ဒီးကီၢ်ပဒိၣ်သ့ၣ်တဖၣ်ဆဲးလီၤ၀ဲတၢ်ပတုာ်တၢ်ခး၀ံၤအလီၢ်ခံကမျၢၢ်သ့ၣ်တဖၣ်အတၢ်အိၣ်သး၊ တၢ်ဘၣ်ယိၣ်၊ ဒီးအ၀ဲသ့ၣ်အတၢ်နာ်အိၣ်၊တအိၣ်သ့ၣ်တဖၣ်အံၤ ဒ်သိးခံခီခံကပၤဖီၣ်စုက၀ဲၤ၊ ကီၢ်ပဒိၣ်ဒီး ၦၤဟူးဂဲၤမၤတၢ်လၢကမျၢၢ်တၢ်ရၢကရိသ့ၣ်တဖၣ် ကသ့ၣ်ညါအဂီၢ် လံာ်တၢ်ပာ်ဖျါအံၤ ဘၣ်တၢ်ထုးထီၣ်ရၤလီၤ၀ဲအဂ့ၢ် (KDN)ၦၤနဲၣ်တၢ် Father မဲၢ်သရူအ့တဲ၀ဲဒ်အံၤန့ၣ်လီၤႉ
“လၢလံာ်တၢ်ပာ်ဖျါအံၤအပူၤကမျၢၢ်သ့ၣ်တဖၣ် အတၢ်ထံၣ်လၢအလီၤပလိာ်သးတခါန့ၣ် တၢ်လၢအဒိးန့ၢ်ဘၣ်အခဲအံၤ တမ့ၢ်တၢ် မုာ်တၢ်ခုၣ်ဘၣ်၊ မ့ၢ်တၢ်ပတုာ်တၢ်ခးပတီၢ်ဒံးလီၤႉ တၢ်မုာ်တၢ်ခုၣ်လီၤစိၤလၢအ၀ဲသ့ၣ်လိၣ်ဘၣ်အံၤတကနၣ် ၀ဲကမျၢၢ် သ့ၣ်တဖၣ်အကလုာ်ဘၣ်ဒီး ဖဲ၂၀၁၅နံၣ်န့ၣ်စးထီၣ်၀ဲသ့ၣ်လၢကလုာ်ဒူၣ်ဖီၣ်စုက၀ဲၤဒီး သုးသ့ၣ်တဖၣ်လီၤႉ ၀ံၤ၂၀၁၇နံၣ် မးက့ၤဟံးန့ၢ်၀ဲကမျၢၢ်သ့ၣ်တဖၣ်အကလုၢ်အဂ့ၢ်” Father မဲၢ်သရူအ့တဲဘၣ်ခ့ၣ်အဲးစံၣ်န့ၣ်လီၤႉ
ကတီၢ်အံၤတၢ်အၢၣ်လီၤဃာ်၀ဲတၢ်ပတုာ်တၢ်ခးလံဘၣ်ဆၣ် လၢတၢ်လီၢ်ဟီၣ်က၀ီၤတနီၤအပူၤ တၢ်ဒုးတၢ်ယၤတဖၣ်၊ တၢ်ဘၣ်ဂံာ်ဂူာ် တဖၣ်အိၣ်ဒံးအဖၢမုၢ်အဖီခိၣ် လီၢ်က၀ီၤကမျၢၢ်တဖၣ်တၢ်ဘၣ်ယိၣ်အိၣ်၀ဲအဂ့ၢ်ပာ်ဖျါဃာ်၀ဲလၢလံာ်တၢ်ပာ်ဖျါအပူၤန့ၣ်လီၤႉ
ဖဲလံာ်တၢ်ပာ်ဖျါလၢကဘျံးပၤအိၣ် (၁၃၈)ကဘျံးအံၤ ကညီ၊ တလၢၤ(မိၣ်)၊ ကခၠ့ၣ်၊ ကယါ(ကရ့ၣ်နံၣ်)၊ ကလံၤစိးယိၤဒိၣ်ကီၢ်စဲၣ်၊ ကလံၤထံးယိၤဒိၣ်ကီၢ်စဲၣ်တဖၣ်အပူၤကမျၢၢ်(၄၀၀၀)ဂၤဘျဲၣ်အံၤ အတၢ်ထံၣ်လၢကတီၢ်အံၤတၢ်မုာ်တၢ်ခုၣ်တၢ်လဲၤကျဲ၊ ကမျၢၢ်တၢ်ဘၣ်သဂၢၢ်၊ တၢ်တၤတၢ်၊ တၢ်မုၢ်လၢ်သ့ၣ်တဖၣ်လၢ၂၀၁၆နံၣ်တုၤ ၂၀၁၈နံၣ် အ၀ဲသ့ၣ်အတၢ်ထံၣ်လၢ အလီၤပလိာ်ဒီး တဒ်သိးလိာ်သးသ့ၣ်တဖၣ်ပာ်ဖျါဃာ်၀ဲဖဲန့ၣ်လီၤႉ
လံာ်တၢ်ပာ်ဖျါလၢအခိၣ်တီဒ်အမ့ၢ်“က့ၤဟ့ၣ်ပကမျၢၢ်တၢ်အိၣ်မူအိၣ်ဂဲၤ၊ ပတလိၣ်ဘၣ်တၢ်ဒုးတၢ်ယၤ၊ တၢ်မၤတရိတပါဘၣ်”အံၤ ကညီတၢ်ဂုၤထီၣ်ပ သီထီၣ်ဘျးစဲ(ကညီ)၊ (ကရူၣ်နၣ်ကီၢ်ပယီၤဘျးစဲကရူၢ်-ကခၠ့ၣ်)၊ တအီ-ပလီၣ်ကၠိဖိဒီး သးစၢ် ကရၢ-ကလံၤထံးယိၤဒိၣ်ကီၢ်စဲၣ်၊ ပၠ့ၣ်ည့သူၣ်ခး-ကလံၤစိးယိၤဒိၣ်ကီၢ်စဲၣ်၊ ကယါတၢ်ကွၢ်ဟုၣ်ကွၢ်စုၣ် တၢ်မုာ်တၢ်ခုၣ်ဘျးစဲ(ကယါ)ဒီးတလၢၤပိာ်မုၣ်ကရၢဘျးစဲ(မိၣ်)ကရူၢ်သ့ၣ်တဖၣ်လီၤထၢဃာ်၀ဲတၢ်ဂ့ၢ်တၢ်ကျိၤသ့ၣ်တဖၣ်အံၤန့ၣ်လီၤႉ
