Home တၢ်ကစီၣ် (Cable Car) လၢကထီၣ်၀ဲ ကွဲၢ်ကဘီလ့ဒီခိၣ်အဂီၢ်အံၤ တၢ်ကစးထီၣ် ဃ့ၢ်အီၤ လၢ ၂၀၁၉ နံၣ်လၢာ် ကတီၢ်အဂ့ၢ်

(Cable Car) လၢကထီၣ်၀ဲ ကွဲၢ်ကဘီလ့ဒီခိၣ်အဂီၢ်အံၤ တၢ်ကစးထီၣ် ဃ့ၢ်အီၤ လၢ ၂၀၁၉ နံၣ်လၢာ် ကတီၢ်အဂ့ၢ်

895
0

လါယနူၤအါရံၤ ၂၃ သီ၊ ၂၀၁၉နံၣ်။ နါဖီၣ်မွံၤရှၣ်

ကီၢ်ပယီၤအပူၤ ကမ့ၢ်၀ဲတၢ်အဆိကတၢၢ်တခါ လၢကညီကီၢ်စဲၣ် (Cable Car) ခ့ၣ်ဘၢၣ်သိလ့ၣ်လၢကထီၣ်၀ဲ ကွဲၢ်ကဘီလ့ဒီခိၣ်အဂီၢ်န့ၣ် တနံၣ်အံၤ ၂၀၁၉နံၣ်အလၢာ်ကတီၢ်မး တၢ်ကစးထီၣ်ဃ့ၢ်အီၤလီၤအဂ့ၢ် တၢ်တိာ်ကျဲၤၦၤဘၣ်မူဘၣ်ဒါလၢအမ့ၢ် စွဲကပ့ၣ် (ကွဲၢ်ကဘီ)မၠ့ၣ်ခ့ၣ်ဘၢၣ်သိလ့ၣ်တၢ်ဂုာ်ထီၣ်ပသီထီၣ်ခီပနံၣ်လံးမံးတဲး ၦၤနဲၣ်တၢ်အူဘညါစီၣ်စံး၀ဲန့ၣ်လီၤႉ

“ပတိာ်ဃာ်လၢတနံၣ်အံၤက၀ံၤလီၤႉ လၢအဖီလာ်တကပၤ၀ံၤ (၁၀၀)မျးကယၤလံႉ လၢအဖီခိၣ် တကပၤပစးထီၣ်မၤလံႉ မ့ၢ်မၤတခီ၀ံၤချ့လီၤႉ ကညီနံၣ်ထီၣ်သီ မ့တမ့ၢ် နံၣ်လၢာ်ကတီၢ်ဒုပကစးထီၣ်ထုးလ့ၢ်လိၤအီၤလီၤ”အဂ့ၢ် စံးဘၣ် ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ

တၢ်တိာ်ကျဲၤအံၤလၢတၢ်မၤဖျါထီၣ်အမိၢ်လံၤမိၢ်ၦၢ်ကန့ၢ်အဂီၢ် စွဲကပ့ၣ်(ကွဲၢ်ကဘီ)မၠ့ၣ်တၢ်ဂုာ်ထီၣ်ပသီထီၣ်ခီပနံၣ်၊ ခၠ့းလ့မၠဲၣ်တိၣ်ယိၣ်တၣ်ခီပနံၣ်၊ မၠၣ်မၣ်စၣ်တံၣ်မၠ့ၣ်လၢအဘၣ်ဃးဒီးခီပနံၣ်လံးမံးတဲး(ZMH Group of Company)သ့ၣ်တဖၣ်ပာ်ဖှိၣ်ဟံးမူဒါ၀ံၤ ရဲၣ်ကျဲၤဃာ်၀ဲလၢ ကစးထီၣ်ဃ့ၢ်လ့ၢ်လိၤ၀ဲ ခ့ၣ်ဘၢၣ်သိၣ်လ့ၣ်အံၤ ဖဲ ၂၀၁၉ နံၣ် လါမးရှး ကတီၢ်န့ၣ်လီၤႉ

“မ့ၢ်မၤလိာ်တၢ်ဖိတၢ်လံၤလၢ(စွံၣ်စလဲ)ကီၢ်န့ၣ်ကယံာ်၀ဲ ၂လါ၊ ၃ လါဒံး၊ ကတီၢ်အံၤစ့ပယီၤအၦ့ၤလီၤကတီၢ်လီၤႉ ပ၀ဲပဘျၢလီၤစ့လၢစ့ပယီၤအဃိ တၢ်လၢာ်ဘူၣ်လၢာ်စ့ၤအါ၊ စ့အလဲလီၤဆီလိာ်အသးလၢ (၃၀)မျးကယၤညါ၊ အဃိဒ်တၢ်တိာ်ပာ်ဃာ်အသိးန့ၣ် တၢ်ဆၢကတီၢ်ယံာ်၀ဲလီၤ”အဂ့ၢ် အူပညါစီၣ်စံးအါထီၣ်၀ဲန့ၣ်လီၤႉ

ခ့ဘၢၣ်သိလ့ၣ်တခိၣ်န့ၣ် အတယၢၢ်အိၣ်၀ဲ (၅)တၣ်ဒီး၊ ၦၤဒိး၀ဲန့ၢ် အဂၤ(၅၀)ဒီး တနၣ်ရံၣ်အတီၢ်ပူၤန့ၣ် လ့ၢ်လိၤ၀ဲကန့ၢ်(၁၂)ဘျီခဲလၢာ် တီဆှၢၦၤနီၣ်ဂံၢ် အဂၤ(၆၀၀)န့ၣ်လီၤႉ ခ့ၣ်ဘၢၣ်သိလ့ၣ်တၢ်ထီထီၣ် တၢ်ဖိတၢ်လံၤအံၤလၢဟီၣ်ခိၣ်ဒီဖျၢၣ်ထံကီၢ်လၢ မၤအီၤအဆိကတၢၢ်အမ့ၢ် (စွံၣ်စလဲ =( GARAVAVTA)ခီပနံၣ် အံၣ်ကၠနယၢၣ်ဒီး ကီၢ်ပယီၤမၠၣ်မၣ်စၣ်တံၣ်မၠ့ၣ်ခီပနံၣ် အံၣ်ကၠနယၢၣ်တဖၣ်မၤအီၤန့ၣ်လီၤႉ

ခ့ၣ်ဘၢၣ်သိလ့ၣ်တၢ်တိာ်ကျဲၤအံၤလၢ အတိာ်ပာ်၀ဲ တၢ်လၢာ်ဘူၣ်လၢာ်စ့ၤ ကအိၣ်လၢအမဲရံၤကၤ စ့ဒီလၣ် တစှၤန့ၢ်ဒံး (၁၂)ကကွဲၢ်အံၤ တၢ်ကတ့အီၤလၢအကဆူးတၢၣ် တပၣ်ဃုာ်ဘၣ်န့ၣ်လီၤႉ လၢ(၄)မံးနံးအတီၢ်ပူၤကလဲၤတုၤလၢ ကွဲၢ်ကဘီလ့ၣ်ခိၣ်ဒီ အဂ့ၢ်ခီပနံၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ