Home တၢ်ကစီၣ် ကီၢ်ပယီၤသုးပဒိၣ်ထုးထီၣ်၀ဲလံာ်တၢ်ပာ်ဖျါအံၤမ့ၢ်၀ဲတၢ်လိာ်ဘၢလိာ်ကွီၢ်လီၤအဂ့ၢ် ခ့ၣ်အဲၣ်ယူၣ်စံး၀ဲ

ကီၢ်ပယီၤသုးပဒိၣ်ထုးထီၣ်၀ဲလံာ်တၢ်ပာ်ဖျါအံၤမ့ၢ်၀ဲတၢ်လိာ်ဘၢလိာ်ကွီၢ်လီၤအဂ့ၢ် ခ့ၣ်အဲၣ်ယူၣ်စံး၀ဲ

980
0

ယနူၤအါရံၤ၂၈၊ ၂၀၁၉နံၣ်၊ ခ့ၣ်အဲးစံၣ်။

ထံကီၢ်ဒီဘ့ၣ်တၢ်ပတုာ်တၢ်ခးလံာ်ဃံးဃာ် တၢ်အၢၣ်လီၤအံၤအ ဖီခိၣ် (ခ့ၣ်အဲၣ်ယူၣ်)တကပၤမၤကမၣ်ထီဒါ၀ဲအဂ့ၢ် ဖဲယနူၤအါရံၤ (၂၅)သီအနံၤ ကီၢ်ပဒိၣ်အသုးမုၢ်ဒိၣ်တကပၤထုးထီၣ်၀ဲလံာ်တၢ်ပာ်ဖျါအဖီခိၣ်န့ၣ် တၢ်အ၀ဲအံၤ မ့ၢ်ဒၣ်တၢ်လိာ်ဘၢလိာ်ကွီၢ်တခါလီၤအဂ့ၢ်န့ၣ် (ခ့ၣ်အဲၣ်ယူၣ်) ကညီဒီကလုာ်စၢဖှိၣ်ကရၢ က့ၤထုးထီၣ်က့ၤ၀ဲလံာ်တၢ်ပာ်ဖျါဖဲ လါယနူၤအါရံၤ (၂၆)သီအနံၤန့ၣ်လီၤႉ

ဒ်ကီၢ်ပဒိၣ်သုးတၢ်ပာ်ဖျါအဖီခိၣ်(ခ့ၣ်အဲၣ်ယူၣ်)အံၤန့ၣ် လၢမုၢ်ထီၣ်ကလံၤစိးသုး၀ဲၤလီၢ်ခိၣ်သ့ၣ်၊ လူၢ်ပျဲၢ်ကီၢ်ဆၣ်၊ (ကါရိတါ)ဟီၣ်က၀ီၤသုး၀ဲၤလီၢ်ခိၣ်သ့ၣ်၊ ဘျံးဟီၣ်က၀ီၤတၢ်လီၢ်သ့ၣ်တဖၣ်အပူၤ တၢ်ထၢ၀ဲအခိအသွဲ(၂)ဘျီ၊ ကလံၤစိးသုး၀ဲၤလီၢ်ခိၣ်သ့ၣ်၊ လၢၢ်မုၢ်ပျီကျဲဟီၣ်က၀ီၤအပူၤတၢ်ခးစဲးပြဲး၀ဲ(၉)ဘျီ၊ သိလ့ၣ်မ့ၣ်ပိၢ်(၂)ဘျီ ဟဲအိၣ်ထီၣ် အသးဒီးမ့ၢ်၀ဲတၢ်မၤဟးဂီၤ(အဲၣ်စံၣ်အ့ၣ်)လီၤအဂ့ၢ် ကီၢ်ပယီၤသုးမုၢ်ဒိၣ်ထုး ထီၣ်၀ဲလံာ်တၢ် ပာ်ဖျါအဖီခိၣ်(ခ့ၣ်အဲၣ်ယူၣ်)တကပၤက့ၤမၤရှဲ၀ဲဒ်အံၤန့ၣ်လီၤႉ

(ခ့ၣ်အဲၣ်ယူၣ်)နဲၣ်ရွဲၣ်ခိၣ်ကျၢၢ်ပဒိၣ်စီၤတၢ်ဒိၣ်မူစံး၀ဲလၢ“မ့ၢ်က့ၤကွၢ်ကဒါက့ၤတၢ်ကဲထီၣ်သးအံၤတၢ်နၢ်ပၢၢ်၀ဲ(အဲၣ်စံၣ်အ့ၣ်)အံၤအခီပညီတဂၤတမံၤလၢအခီပညီတဒ်သိးလိာ်သးဘၣ်န့ၣ်လီၤႉ လၢတၢ်ကတဲသကိးဘၣ်ဃး (အဲၣ်စံၣ်အ့ၣ်) လၢသုးဂ့ၢ်၀ီတကပၤခံခီခံကပၤဘၣ်သဂၢၢ်ခးလိာ်သးတၢ်ဂ့ၢ်သ့ၣ်တဖၣ်အံၤ တၢ်တဲသကိးအီၤ လီၤတံၢ်လီၤဆဲးတအိၣ်ဒံးဘၣ်ထံၣ်၀ဲဒ်န့ၣ်လီၤ”အဂ့ၢ် ပာ်ဖျါထီၣ်၀ဲ ဖဲ၂၆ သီအနံၤ လၢ(အ့ၣ်ထၢၣ်နဲး)လံာ်မဲာ်သၣ်အပူၤန့ၣ်လီၤႉ

ဘၣ်ဃးတၢ်ထၢခိသွဲတၢ်ဂ့ၢ် တၢ်လိာ်ဘၢလိာ်ကွီၢ်တၢ်အံၤအဖီခိၣ်(ခ့ၣ်အဲၣ်ယူၣ်)ဟီၣ်က၀ီၤအပူၤ ဒ်သိးတၢ်ကမၤဂ့ၤ ထီၣ်တၢ်ဂုၤထီၣ်ပသီထီၣ်၊ တၢ်ဘံၣ်တၢ်ဘၢ တၢ်ဖံးတၢ်မၤတဖၣ် တၢ်ရဲၣ်ကျဲၤမၤအီၤကန့ၢ်အဂီၢ် တၢ်ဟံးန့ၢ်၀ဲလၢ ကမျၢၢ်သ့ၣ်တဖၣ်အအိၣ်ဒ်တၢ်ပာ်ပနီၣ်ဃာ်အသိးလီၤအဂ့ၢ် လၢလံာ်တၢ်ပာ်ဖျါအပူၤ(ခ့ၣ်အဲၣ်ယူၣ်)ပာ်ဖျါထီၣ်ဃာ်၀ဲန့ၣ်လီၤႉ

လၢတၢ်တဲ၀ဲတၢ်ထၢအခိသွဲအံၤန့ၣ်ဒ်(အဲၣ်စံၣ်အ့ၣ်) အဆၢဒိၣ်(၃)၊ အဆၢဖိ (၅) (ခ)အပူၤအသိးန့ၣ် ‘တကပၤဒီးတကပၤထီဒါလိာ်သး(မ့)တဲတရီတပါလိာ်သးလၢလိၤလိၤမ့ၢ်ဂ့ၤ၊ လၢတၢ်တဲတရံးမ့ၢ်ဂ့ၤတၢ်တဘၣ်မၤအီၤဘၣ်ႉ’ ဒီး ဒ်အဆၢဖိ(စ)အသိးန့ၣ် ‘တဒူၣ်ဒီးတဒူၣ်အဘၢၣ်စၢၤတၢ်မၤတၢထီၣ်တၢလီၤတၢ်၊ တၢ်လၢအတဘၣ်၊ လၢအမၤလီၤသူးသ့ၣ်လၤကပီၤတဖၣ်အံၤလၢကီၢ်ပူၤမ့ၢ်ဂ့ၤ၊ ကီၢ်ချၢမ့ၢ်ဂ့ၤတၢ်ကဘၣ်ဟးရှးအီၤ’ ဒီး ကီၢ်ပဒိၣ်သုးတကပၤမၤကမၣ်အီၤအဂ့ၢ်(ခ့ၣ်အဲၣ်ယူၣ်)စံး၀ဲန့ၣ်လီၤႉ

လၢန့ၢ်အမဲာ်ညါ(အဲၣ်စံၣ်အ့ၣ်)အဆၢဒိၣ်(၆)အဆၢဖိ(၂၅)
(က)အပူၤ(ခ့ၣ်အဲၣ်ယူၣ်)တကပၤတၢ်လီၢ်လၢအဘၣ်ဃးဒီးအ၀ဲသ့ၣ်တဖၣ်လၢတၢ်ဂုၤထီၣ်ပသီထီၣ်ဒီးလီၢ်က၀ီၤတၢ်ဘံၣ်တၢ်ဘၢတၢ်ဂ့ၢ်သ့ၣ်တဖၣ်ဟံးမူဒါနၢ်ပၢၢ်၀ဲဒီးလၢတၢ်တဲသကိးတၢ်မုာ်တၢ်ခုၣ်တၢ်လဲၤကျဲကတီၢ်ခံခီခံကပၤကက့ၤတဲသကိးအီၤဒီးဟံးတၢ်အၢၣ်လီၤအီလီၤအဂ့ၢ်(ခ့ၣ်အဲၣ်ယူၣ်)ပာ်ဖျါထီၣ်၀ဲလၢလံာ်တၢ်ပာ်ဖျါအပူၤန့ၣ်လီၤႉ

လၢကီၢ်ပဒိၣ် အသုးမုၢ်ဒိၣ် တၢ်ပာ်ဖျါလၢအမ့ၢ် (ခ့ၣ်အဲၣ်ယူၣ်) တကပၤကွၢ်စူၣ်ခး ၀ဲကီၢ်ပယီၤသုးဒီး ဒိးလီၤ၀ဲသိလ့ၣ်မ့ၣ်ပိၢ်တဖၣ်တၢ်ဂ့ၢ်အံၤ လၢ(အဲၣ်စံၣ်အ့ၣ်) အဆၢဒိၣ် (၃)အပူၤ လၢတၢ်ဘၣ်သဂၢၢ်လိာ်သးအံၤ ဒ်သိးတၢ်ဟးဆှဲးအီၤကန့ၢ်အဂီၢ် တၢ်ကတဲသကိး၀ဲတၢ် အခိၣ်တီတခါလၢ ဖီၣ်စုက၀ဲၤ ကရူၢ်တဖၣ်တၢ် ကပာ်ပနီၣ်ဟီၣ်က၀ီၤတၢ်ဂ့ၢ်အံၤ (ခ့ၣ်အဲၣ်ယူၣ်) တကပၤ (၂၀၁၂)နံၣ်အပူၤ ဆှၢနုာ်လီၤဃာ်၀ဲ လၢတၢ်တဲသကိးအပူၤဘၣ်ဆၣ်တုၤမုၢ်မဆါတနံၤညါအံၤ ခံခီခံကပၤ တၢ်ထံၣ်လိာ်သး တအိၣ်ဘၣ်ဒီးတၢ်တဲသကိးအံၤတၢ်ကမၤအီၤလၢအဆိကတၢၢ်အဂ့ၢ်(ခ့ၣ်အဲၣ်ယူၣ်)တကပၤဃ့ထီၣ်ကဒီး၀ဲန့ၣ်လီၤႉ

ဖဲအပူၤကွံာ် လါယနူၤအါရံၤ (၂၅)သီအနံၤ ကီၢ်ပဒိၣ်သုးတကပၤထုးထီၣ်၀ဲလံာ် တၢ်ပာ်ဖျါအပူၤ ကလုာ်ဒူၣ်ဖီၣ်စု က၀ဲၤလၢအဆဲးလီၤဃာ်(အဲၣ်စံၣ်အ့ၣ်)ဒီးအတဆဲးလီၤဃာ်(အဲၣ်စံၣ်အ့ၣ်)သ့ၣ်တဖၣ် ခိးကွၢ်စူၣ်ခးကီၢ်ပယီၤသုးတဖၣ်၊ ကလုာ်ဒူၣ်ကဒဲကဒဲဃုတၢ်အ့ၣ်လိာ်၊ မၤနၢၤအီၣ်၀ဲကမျၢၢ်တဖၣ်၊ ဟးတလၢကွံာ်၀ဲတၢ်ပာ်ပနီၣ်အလီၢ်၊ ထၢတၢ်ခိတၢ်သွဲတဖၣ်ဒီးမၤအါထီၣ်သုးနီၣ်ဂံၢ်တဖၣ်အဂ့ၢ် ပာ်ဖျါဃာ်၀ဲန့ၣ်လီၤႉ