Home တၢ်ကစီၣ် ထံဟဲထီၣ်သူတဖၣ် တၢ်မၤကွၢ်အီၤ တၢ်ဘၣ်ယိၣ်မ့ၢ်အိၣ်တမံၤမံၤတခီ တၢ်ကလိာ်ကွီၢ်၀ဲ စဲးဖီကဟၣ်တၢ်မၤလီၢ်အဂ့ၢ် ကိတိာ်ခိၣ်စံး၀ဲႉ

ထံဟဲထီၣ်သူတဖၣ် တၢ်မၤကွၢ်အီၤ တၢ်ဘၣ်ယိၣ်မ့ၢ်အိၣ်တမံၤမံၤတခီ တၢ်ကလိာ်ကွီၢ်၀ဲ စဲးဖီကဟၣ်တၢ်မၤလီၢ်အဂ့ၢ် ကိတိာ်ခိၣ်စံး၀ဲႉ

900
0
Photo: KIC

လါအိးကထိဘၢၣ် ၁၄ သီႇ၂၀၁၉ နံၣ်ႇ ခ့ၣ်အဲးစံၣ်ႉ

ဖၣ်အၣ်ကီၢ်ဆၣ်ႇဘါကၣ်သ၀ီကရူၢ်ႇ နၣ်ကိသ၀ီအပူၤ ထံဟဲထီၣ်သူအဃိ သ၀ီဖိတဖၣ် တၢ်ဘၣ်ယိၣ်အိၣ်ထီၣ်အဖီခိၣ် တၢ်ဟံးန့ၢ်၀ဲထံ၀ဲန့ၣ်၀ံၤ တၢ်မၤကွၢ်ထံ၀ဲန့ၣ်၀ံၤ တၢ်မ့ၢ်ကဲထီၣ်သးတခါခါန့ၣ် တၢ်ကလိာ်ကွီၢ်၀ဲ စဲးဖီကဟၣ်တၢ်မၤလီၢ်အဂ့ၢ် ကညီကီၢ်စဲၣ် ကိတိာ်ခိၣ်ကျၢၢ် နါခ့ၣ်ထွ့မၠ့ၣ် စံး၀ဲဖဲတၢ်ထံၣ်လိာ်အသးဒီး သ၀ီဖိတဖၣ်ဖဲ လါအိးကထိဘၢၣ် ၁၂ သီအနံၤန့ၣ်လီၤႉ

လီၢ်က၀ီၤဖိတကပၤ ပဲာ်ထံနီၤဖး၀ဲလၢ ထံဟဲထီၣ်သူထီၣ်ဒ်အံၤ မ့ၢ်၀ဲ တၣ် ၄ႇ၀၀၀ ဂာ်လၢၢ်ကမူၣ်(ဘံလးမၠ့ၣ်)စဲးဖီကဟၣ် တၢ်မၤလီၢ် လၢအဘူးဖဲ မၠဲၣ်ကလ့ဖဲန့ၣ် ပူၣ်ထီၣ်ဃာ်၀ဲ လၢၢ်သွဲၣ်လးအဃိ ကဲထီၣ်လီၤအဖီခိၣ် ကီၢ်စဲၣ်ကိတိာ် စံးလီၤ၀ဲဒ်အံၤန့ၣ်လီၤႉ
ကိတိာ်ခိၣ်ကျၢၢ်စံး၀ဲ“ယအဲၣ်ဒီးတဲ ၦၤကမျၢၢ်တဖၣ်လၢ ပက့ၤမၤကွၢ်ထံ၀ဲန့ၣ်ဒီး တၢ်ကမၣ်မ့ၢ်အိၣ်ထီၣ်တမံၤမံၤန့ၣ် ယကလိာ်ကွီၢ် စဲးဖီကဟၣ်တၢ်မၤလီၢ်၀ဲန့ၣ်လီၤႉ အိၣ်တခါလီၤ ယမ့ၢ်လိာ်ကွီၢ်တၢ်အခါန့ၣ် ကမျၢၢ်သ့ၣ်တဖၣ် ကဘၣ်မၤသကိးတၢ်ဒီးယၤလီၤႉ မ့ၢ်တမၤသကိးတၢ်ဘၣ် မ့ၢ်တတဲဖျါထီၣ်တၢ်ဘၣ်န့ၣ် ၦၤလိာ်ကွီၢ်တၢ်ဖိတကကပၤ ခီလီလီလီၤ”အဂ့ၢ် စံး၀ဲလီၤႉ

လၢန့ၣ်အမဲာ်ညါ ကတီၢ်အံၤ တအိၣ်ဒံးလၢ တၢ်ဘၣ်ယိၣ်ကတီၢ် ဒံးဘၣ်ဒီး ထံတဖၣ်န့ၣ် တၢ်က့ၤမၤကွၢ်အီၤလၢ တၢ်မၤကွၢ်အလီၢ်လံဒီး တၢ်အစၢလၢဟဲထီၣ်တဖၣ် တၢ်ကက့ၤဒုးသ့ၣ်ညါကဒါက့ၤ ကမျၢၢ်တဖၣ်အဂ့ၢ် ကီၢ်စဲၣ်ကိတိာ်ခိၣ် စံးအါထီၣ်၀ဲန့ၣ်လီၤႉ

လၢအပူၤကွံာ် လါအိးကထိဘၢၣ် ထီၣ်သီကတီၢ် ဖၣ်အၣ်ႇ ဃိၣ်လိာ်ကျိ အလီၢ်ခံတကပၤ နၣ်ကိသ၀ီဖိတဖၣ် ထံအီလၢအ၀ဲသ့ၣ်စူးကါ၀ဲန့ၣ် အလွဲၢ်ဟဲထီၣ်သူထီၣ်ဒီး လီၢ်က၀ီၤကမျၢၢ်တဖၣ် ကသူ၀ဲထံ၀ဲန့ၣ်အဂီၢ် သူ၀ဲတဘူၣ်လၢၤဘၣ် န့ၣ်လီၤႉ

“သဂၢၢ်ဘၣ်တၢ်ကီတၢ်ခဲ ဖးအါလီၤႉ ကလုၢ်ထံသဂီၢ်သနာ်က့ ဘၣ်ပျံၤႉ ကအီအဂီၢ်သနာ်က့ ဘၣ်ပျံၤႉ ကသူအဂီၢ်သနာ်က့ ဘၣ်ပျံၤႉ ဆၣ်ဖိကီၢ်ဖိ ကျီၢ်(ဂီၤဖံး)သ့ၣ်တဖၣ် မ့ၢ်ကဲထီၣ်တၢ် တမံၤမံၤလိးကီဒိၣ်မးလီၤႉ ကဒိးန့ၢ်ဘၣ် စ့အီၣ်လိးဖဲလဲၣ် မတၤကက့ၤဟ့ၣ်က့ၤလဲၣ်”အဂ့ၢ် နၣ်ကိသ၀ီဖိ နါတ့ၣ်မၠးစံး၀ဲန့ၣ်လီၤႉ
တၢ်ကဲထီၣ်သးဒ်န့ၣ်၀ံၤ ကညီကီၢ်စဲၣ်ကိတိာ်တကပၤ ဖဲလါအိးကထိဘၢၣ် ၁၁ ဒီး ၁၂ သီအနံၤန့ၣ် ထံၣ်လိာ်အသးဒီး နၣ်ကိသ၀ီဖိတဖၣ်၀ံၤ အီပၠး၀ဲထံဖဲ တၢ်လီၢ်ဖဲန့ၣ်တဖၣ် လၢနီၢ်ကစၢ်၀ံၤ ကတိၤဟ့ၣ်ဂံၢ်ဟ့ၣ်ဘါ၀ဲတၢ်ကတိၤတဖၣ်န့ၣ်လီၤႉ

လၢန့ၣ်အမဲာ်ညါ လီၢ်က၀ီၤဖိလၢ သဂၢၢ်ဘၣ်တၢ်ကီတၢ်ခဲတဖၣ်အဂီၢ် ကီၢ်စဲၣ်ပဒိၣ်ဒီး တၢ်မၤဘူၣ်ကစၢ်တဖၣ် ဟ့ၣ်လီၤမၤစၢၤ၀ဲ ထံအီတဖၣ်န့ၣ်လီၤႉထံဟဲသူထီၣ်ဒ်အံၤ သ၀ီလၢအဘူးဒီး နဲၣ်ကိသ၀ီဖဲန့ၣ် သ၀ီအဖျၢၣ် ၃၀ ဃၣ်ဃၣ် သဂၢၢ်ဘၣ်ဒီး တၢ်ကီတၢ်ခဲဒံးန့ၣ်အသိးလီၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤႉ