Home တၢ်ကစီၣ် တၢ်မ့ၢ်တသူ၀ဲကသံၣ်ကသီဘၣ်သနာ်က့ တၢ်မုၢ်တၢ်ဘိဂ့ၤ၀ဲလီၤန့ၣ် အူမီၣ်ခ့ၣ် စံး၀ဲ

တၢ်မ့ၢ်တသူ၀ဲကသံၣ်ကသီဘၣ်သနာ်က့ တၢ်မုၢ်တၢ်ဘိဂ့ၤ၀ဲလီၤန့ၣ် အူမီၣ်ခ့ၣ် စံး၀ဲ

1158
0
Photo: KIC

လါယနူၤအါရံၤ ၁၅ သီႇ၂၀၂၀နံၣ်ႇ ခ့ၣ်အဲးစံၣ်

ခ့ခါဆၢကတီၢ်ခဲအံၤ တသူၣ်တၢ်ဖျးတဖၣ်အပူၤ အါဒၣ်တက့ၢ်န့ၣ် ဒ်သိးဒီးတၢ်သူတၢ်သၣ်ကဟးထီၣ်၀ဲဒၣ်အါအါအဂီၢ် ဒီးအလုၢ်အပ့ၤှ ကဂ့ၤ၀ဲအဂီၢ်ႇ တၢ်သူ၀ဲကသံၣ်ကသီသ့ၣ်တဖၣ်န့ၣ်လီၤႉ

ဘၣ်ဆၣ်ၦၤလၢအသူၣ်ဖျးတၢ်ဒ်မိၢ်လုၢ်ပၢ်လၢ်အကျိၤအကျဲတဂၤလၢအမ့ၢ် အူမီၤခ့ၣ် လၢအအိၣ်ဖဲကညီကီၢ်စဲၣ် ကီးတရံးကီၢ်ဆၣ် အီးဖးဖးဒိၣ်သ၀ီတဂၤအံၤ သူၣ်ဖျး၀ဲဒၣ် အဲၣ်ရိၣ်တံၢ်ဒီး ဟူၣ်ကလၢ်တံၢ်ႇ အ၀ဲတသူ၀ဲဒၣ် ကသံၣ်ကသီ နီတမံၤဘၣ် အဂ့ၢ်န့ၣ်စံး၀ဲလီၤႉ

အ၀ဲစံး၀ဲလၢ “အပူၤကွံာ်န့ၣ် ၦၤသူၣ်ဟူၣ်ကလၢ်တံၢ် တအိၣ်အါအါဘၣ်ႉ မ့ၢ်သူၣ်စ့ၢ်ကီးန့ၣ် သူၣ်၀ဲတစဲးတမွဲးလီၤႉ အခဲအံၤၦၤသူၣ်ဆါ၀ဲလံဒီး လဲၤဆါ၀ဲလၢကီးတရံး၀့ၢ်ပူၤန့ၣ်လီၤႉ ယမ့ၢ်ဘၣ်သးသူကသံၣ်န့ၣ် ယသူသ့လီၤႉ ပမ့ၢ်သူကသံၣ်န့ၣ် မုၢ်ကျိၤ၀ဲၤကွာ်ဘၣ်ဂီၢ်၀ဲလီၤႉ ဘၣ်မနုၤလၢ ယတသူကသံၣ်ဘၣ်လဲၣ်န့ၣ် ၦၤလၢအအီၣ် ဘၣ်၀ဲတဖၣ်န့ၣ် တဂ့ၤလၢတၢ်အိၣ်ဆူၣ်အိၣ်ချ့အဂီၢ်ဘၣ်ႉ ၦၤလၢအအိၣ်လၢကီးတရံးတဖၣ်န့ၣ် ဟံ၀ဲဒၣ်ယဟူၣ်ကလၢ်တံၢ်လီၤႉ တနီၤန့ၣ် ခီဖျိလၢအသူ၀ဲကသံၣ်အဃိ အတံၢ်အါ၀ဲလီၤႉ ဘၣ်ဆၣ်ပပာ်အီၤယံာ်ယံာ်ထၢထၢတန့ၢ်ဘၣ်ႉ” အဂ့ၢ်န့ၣ်စံး၀ဲဒၣ်လီၤႉ

တၢ်ဖိတၢ်လံၤလၢ အဟးထီၣ်တဖၣ် ခီဖျိလၢတၢ်သူ၀ဲ ကသံၣ်အံၤအဃိ မၤဘၣ်ဒိ၀ဲ ၦၤအီၣ်တၢ်ဖိတဖၣ်လီၤႉ ပမ့ၢ်သူၣ်အီၤဒ် မိၢ်လုၢ်ပၢ်လၢ်အသိးႇ တၢ်တသူ၀ဲကသံၣ်ဘၣ်ဆၣ် တၢ်မုၢ်တၢ်ဘိႇ တၢ်သူတၢ်သၣ်တဖၣ်ဂ့ၤ၀ဲဒၣ်လီၤအဂ့ၢ်န့ၣ် အ၀ဲစံး၀ဲလီၤႉ

Photo: KIC

“ပမ့ၢ်သူၣ်တၢ်တမံၤဂ့ၤတမံၤန့ၣ် လိၣ်၀ဲဒၣ်မူခိၣ်ကလံၤ တၢ်ဆၢကတီၢ်ဒီး ကျီၢ်အ့ၣ်ႇဟီၣ်ခိၣ်သိချါလိၣ် ၀ဲလီၤႉ ပမ့ၢ်သူၣ်န့ၣ် ကဘၣ်အိၣ်ဒီးအကျိၤအကျဲလီၤႉ ပမ့ၢ်သူၣ်ဟူၣ်ကလၢ်တံၢ််န့ၣ် ကဘၣ်ခူၣ်တၢ်ပူၤမ့ၢ်ယိာ်ဒီး ဘၣ်ဒုးမံနီၤအီၤန့ၣ်လီၤႉ ပသူၣ်ဒ်န့ၣ် မ့ၢ်သ့မၣ် အတံၢ်ကဟးထီၣ်၀ဲ အါအါဂီၢ်ဂီၢ်လီၤႉ အခဲအံၤလၢ၀့ၢ်ပူၤန့ၣ် ပတအီၣ်ဘၣ် တၢ်ဒိးတၢ်လၣ်လၢ အတပၣ်၀ဲဒၣ်ဒီး ကသံၣ်ကသီတဖၣ်ဘၣ်လီၤႉ ပအီၣ်ဘၣ်တၢ်ဒိးတၢ်လၣ်တဖၣ်လၢ အပၣ်၀ဲဒီးကသံၣ်ကသီအဃိ တၢ်လီၤဘၣ်ယိၣ်ဟဲအိၣ်ထီၣ်၀ဲန့ၣ်လီၤႉ အခဲအံၤ ဟီၣ်ခိၣ်သိချါဟဲပီၣ်ထီၣ်၀ဲအါမးႇ တနီၤန့ၣ်သူ၀ဲဒၣ် ကီၢ်ပယီၤ အဟီၣ်ခိၣ်သိချါလီၤႉ မ့ၢ်သူကီၢ်ပယီၤကသံၣ်န့ၣ် အတံၢ်တဖၣ်ဟးထီၣ်အါမးလီၤႉ ပအီၣ်သ့၀ဲလီၤႇ ဘၣ်ဆၣ်ခီဖျိလၢ တမ့ၢ်န့ဆၢၣ်ဘၣ်အဃိ ကဲထီၣ်တၢ်ဆါလီၤ” အဂ့ၢ်န့ၣ်စံး၀ဲလီၤႉ

မူခိၣ်ကလံၤ တၢ်အိၣ်သးအဖီခိၣ် တၢ်သူၣ်တၢ်ဖျး၀ဲဒ်မိၢ်လုၢ်ပၢ်လၢ် အကျိၤအကျဲအသိး တၢ်သူ၀ဲန့ဆၢၣ်သိချါအဃိ ၦၤအီၣ်တၢ်ဖိတဖၣ်အဂီၢ်စ့ၢ်ကီး တၢ်ဘၣ်ဒိဘၣ်ထံးတအိၣ်၀ဲဘၣ်လီၤႉ မ့မ့ၢ်လၢအူမီၣ်ခ့ၣ်အံၤ သူၣ်ဖျး၀ဲ အဲၣ််ရ ိၣ်တံၢ်ႇ ဟူၣ်ကလၢ်တံၢ်ႇ တအ့ဒီး သဘျ ုၣ်တဖၣ်န့ၣ်လီၤႉ ဘၣ်ဆၣ်အ၀ဲတသူ၀ဲ ကသံၣ်ကသီဘၣ်ဒီး ကျိၣ်စ့လၢအဟဲနုာ်တဖၣ်န့ၣ် ဆီၣ်ထွဲ၀ဲအဟံၣ်ဖိဃီဖိန့ၣ်လီၤ အဂ့ၢ်န့ၣ် အူမီၣ်ခ့ၣ်စံး၀ဲဒၣ်လီၤႉ

“ယဟဲတုၤဖဲအံၤအခါန့ၣ် ယတၢ်တအိၣ်နီတမံၤဒံးဘၣ်ႉ ယမၤတၢ်သ့လၢကျီးပူၤလီၤႉ ခီဖျိလၢယမၤကျီးအံၤအဃိ ယပာ်ယဖိမုၣ်ခံဂၤဒီး ယဖိခွါခံဂၤလၢကၠိန့ၢ်၀ဲလီၤႉ အခဲအံၤ ယဖိမုၣ်ဖိခွါကဲထီၣ် သရၣ်သရၣ်မုၣ်လၢာ်လံလီၤႉ ပမ့ၢ်မၤကျီးန့ၣ် မုၢ်ကျိၤ၀ဲၤကွာ်အဂီၢ်ဂ့ၤ၀ဲလီၤႉ ပမၤသ့ကိးလါဒဲးဒီး ကိးဆၢကတီၢ်ဒဲးလီၤႉ ပမ့ၢ်မၤကိးလါဒဲးန့ၣ် စ့ကဟဲနုာ်လီၤ ၀ဲကိးလါဒဲးလီၤႉ ပမ့ၢ်တလဲၤဆါဘၣ်သနာ်က့ ၦၤဟဲၦ့ၤအိၣ်၀ဲလီၤႉ အဒိပမ့ၢ်လဲၤဆါလၢ တၢ်ချၢန့ၣ်ကန့ၢ်၀ဲ ၂၀၀ ကၠး ပမ့ၢ်ဆါဖဲအံၤန့ၣ် ကန့ၢ်၀ဲ ၁၀၀ ကၠးလီၤႉ

ၦၤလၢအဟဲၦ့ၤ၀ဲဖဲအံၤတဖၣ် အဲၣ်ဒိးအီၣ်၀ဲအမၠးအဃိ ဆါန့ၢ်အ၀ဲသ့ၣ် ၁၀၀ ကၠး န့ၣ်လီၤႉ အရ့ဒိၣ်န့ၣ်မ့ၢ်ပကစၢ်လီၤႇ ပမၤမ့ၢ်ကဲန့ၣ် ပကဒိးန့ၢ်ဘၣ်စ့လီၤႉ နမၤမ့ၢ်တကဲဒု တန့ၢ်ဘၣ်စ့ဘၣ်လီၤႉ ဒ်ပယီၤတၢ်ကတိၤအိၣ်ပာ်၀ဲအသိး တၢ်လၢဟီၣ်ခိၣ်န့ၣ် ကဲထီၣ်ထူသ့၀ဲန့ၣ်လီၤ” အဂ့ၢ် န့ၣ်စံး၀ဲလီၤႉ