Home တၢ်ကစီၣ် ကသူၣ်ထီၣ် ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အဂီၢ် တဘၣ်ထုးတၢ်ကဆၢကတီၢ်ဘၣ်န့ၣ် ခ့ၣ်အဲၣ်ယူၣ်စံး၀ဲ

ကသူၣ်ထီၣ် ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အဂီၢ် တဘၣ်ထုးတၢ်ကဆၢကတီၢ်ဘၣ်န့ၣ် ခ့ၣ်အဲၣ်ယူၣ်စံး၀ဲ

1195
0

လါဖ့ၤြဘူၤအါရံၤ ၁၂ သီႇ ၂၀၂၀ နံၣ်ႇ စီၤထိလ့

မ့ၢ်အဲၣ်ဒိး သူၣ်ထီၣ် ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အံၤ အနီၢ်ကီၢ်န့ၣ်ႇ တဘၣ်ထုးတၢ်ဆၢကတီၢ်ဘၣ်အဂ့ၢ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ထံဂုၤကီၢ်ဂၤ၀ဲၤကျိၤ မူဒါခိၣ် ပဒိၣ်စီၤတီနံ စံးလီၤ၀ဲဒၣ်ဖဲ မၠီမၠးကီၢ်ဆၣ်ႇ ပၠံၣ်သ၀ီတဲၣ်နဲၤႇ ကဒဲၣ်ကွ့သ၀ီ ဖဲလါဖ့ၤြဘူၤအါရံၤ ၁၁ သီအနံၤ တၢ်မၤ၀ဲ ၇၂ နံၣ်တနံၣ် ကညီဒီကလုာ်မုၢ်နံၤ အတၢ်ရဲၣ်တၢ်ကျဲၤပူၤ န့ၣ်လီၤႉ

ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢအံၤ စးထီၣ်လၢ ၁၉၅၄ နံၣ် လံၤလံၤန့ၣ် ကသူၣ်ထီၣ်၀ဲ ကီၢ်ပယီၤအံၤလၢ ဒံၣ်မိၣ်ြခ့ၣ်စံၣ် ဖဲၣ်ြဒၢၣ််ကီၢ်စၢဖှိၣ်အဂီၢ် ဆၢတဲာ်၀ဲ၀ံၤအလီၢ်ခံႇ ဘၣ်နုာ်လီၤပၢၢ်ဆၢတၢ်ယံာ်၀ဲ အနံၣ် ၆၀ ဘျဲၣ် ႇ ဘၣ်ဟ့ၣ်လီၤကံွာ် တၢ်သးသမူႇ တၢ်မဲာ်ထံမဲာ်နိ အါအါဂီၢ်ဂီၢ်ႇ တၢ်ထူးတၢ်တီၤတဖၣ်အါအါဂီၢ်ဂီၢ်အဂ့ၢ်န့ၣ် ပဒိၣ်စီၤတီနံ စံးလီၤ၀ဖဲတၢ်ရဲၣ်တၢ်ကျဲၤမူးအပူၤန့ၣ်လီၤႉ

ဖဲန့ၣ်၀ံၤအလီၢ်ခံ ဖဲ၂၀၁၄ နံၣ် ကလုာ်ဒူၣ်ၦၤဖီၣ်စုက၀ဲၤတၢ်ပၢၢ်ဆၢကရူၢ်တဖၣ် ဒီး ပဒိၣ်ႇသုးမုၢ်ဒိၣ်တဖၣ် ကသူၣ်ထီၣ်သကိး၀ဲ ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အဂီၢ် သးလီၤပလိာ်၀ဲဒၣ်အသိးႇ ဖဲ ၂၀၁၅ နံၣ် ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် (NCA) အပူၤစ့ၢ်ကီး တၢ်ဂ့ၢ်သ့ၣ်တဖၣ်အံၤ တၢ်သးလီၤပလိာ် အိၣ်ပာ်၀ဲအဂ့ၢ်န့ၣ်လီၤႉ နံၣ်လၢအယံာ်၀ဲ အနံၣ် ၆၀ ဘျဲၣ်ႇ တၢ်လုၢ်ထီၣ်ကွံာ်သးသမူသွံၣ်ကပၢၤတဖၣ်၀ံၤမး လၢတၢ်ကကိး၀ဲ ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အံၤ ဒ်သိးတၢ်ကစူးကါက့ၤအီၤကသ့အဂီၢ်ႇ မ့ၢ်ကဘၣ်အိၣ်ခိးကဒီးဒံး ခါဆူညါ အနံၣ် ၇၀ ဘျဲၣ် ညါဧါန့ၣ် ယနီၢ်ကစၢ်ဒၣ်ယဲယထုးထီၣ်၀ဲတၢ်သံကွၢ်အဂ့ၢ်န့ၣ် ပဒိၣ်စီၤတီနံစံး၀ဲလီၤႉ

“တၢ်အဃိန့ၣ် ယအဲၣ်ဒိးတဲန့ၣ် ဘၣ်ထွဲဒီးၦၤဘၣ်မူဘၣ်ဒါတဖၣ်မ့ၢ်ဂ့ၤႇ ဘၣ်ထွဲဒီးပဒိၣ်တဖၣ်မ့ၢ်ဂ့ၤႇ ဒံၣ်မိၣ်ြခ့ၣ်စံၣ် ဖဲၣ်ြဒၢၣ်ကီၢ်စၢဖှိၣ်အံၤ မ့ၢ်သူၣ်ထီၣ်နီၢ်ကီၢ်န့ၣ် တဘၣ်လိၣ်ထုးတၢ်ဆၢကတီၢ်လၢာ်ဘၣ်န့ၣ် ယအဲၣ်ဒိးတဲယဲဖဲအံၤလီၤ” အဂ့ၢ်န့ၣ် ပဒိၣ်စီၤတီနံ စံး၀ဲလီၤႉ

မၠီမၠးကီၢ်ဆၣ်ဒီတဘ့ၣ် မၤလၤကပီၤ၀ဲ ၇၂ ၀ီတ၀ီ ကညီဒီကလုာ်မုၢ်နံၤအတၢ်ရဲၣ်တၢ်ကျဲၤအံၤ ကညီသီခါတဖၣ်ႇ တၢ်ဘူၣ်တၢ်ဘါခိၣ်နၢ်တဖၣ်ႇ ခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ်ႇ ကညီထံရူၢ်ကီၢ်သဲးပၣ်တံၣ်တဖၣ်ႇ ကညီလံာ်လဲၢ်ဒီးတၢ်ဆဲးတၢ်လၤမံးတံာ်ဖိတဖၣ်ႇ ဒီးလီၢ်က၀ီၤဖိတဖၣ် ပာ်ဖှိၣ်ခဲလၢာ် အဂၤ ၁ႇ၀၀၀ ဘျဲၣ် ဟဲထီၣ်၀ဲန့ၣ်လီၤႉ

တၢ်ရဲၣ်တၢ်ကျဲၤလၢဘျီ၀ဲအံၤ ခိၣ်နၢ်လၢညါတဖၣ် ဟံးထီၣ်ဖီၣ်ထီၣ်မၤ၀ဲ ကညီဒီကလုာ်မုုၢ်နံၤအံၤ ဒ်သိးတၢ်က သ့ၣ်နီၣ်က့ၤ၀ဲအဂီၢ်ႇ ကညီကလုာ်တဖၣ် ဒ်သိးတၢ်ထံၣ်တၢ်သ့ၣ်ညါကဒိၣ်ထီၣ်ထီထီၣ်အဂီၢ်ႇ ကညီကလုာ်တဖၣ် တၢ်အိၣ်မူခါဆူညါအဂီၢ် ထံရူၢ်ကီၢ်သဲးႇ မုၢ်ကျိၤ၀ဲၤကွာ်ႇ ၦၤဂ့ၢ်၀ီႇ တၢ်ကူၣ်ဘၣ်ကူၣ်သ့ႇ ဒီးအဂၤတဖၣ် ဒ်သိးကသ့ၣ်နီၣ်ထီၣ်ဒီးကအိၣ်ဒီးတၢ်သးဂဲၤအဂီၢ် ပညိၣ်မၤ၀ဲလီၤႉ တၢ်ရဲၣ်တၢ်ကျဲၤအဂီၢ် တၢ်လၢာ်ဘူၣ်လၢာ်စ့ ပာ်ဖှိၣ်ခဲလၢာ် အကလီၢ် ၇၀ ကၠး ဃၣ်ဃၣ်အံၤန့ၣ်ႇ ကညီကမျၢၢ်တဖၣ် ပာ်ဖှိၣ်ထၢနုာ်၀ဲဒၣ်ဒီး တၢ်မၤ၀ဲဒၣ်တၢ်ရဲၣ်တၢ်ကျဲၤအံၤလီၤ အဂ့ၢ်န့ၣ် မၠီမၠးကီၢ်ဆၣ်ႇ ကညီလံာ်လဲၢ်ဒီးတၢ်ဆဲးတၢ်လၤကမံးတံာ် ၦၤပၢၤလီၢ်ဆ့ၣ်နီၤ မါသ့ကၠီၤ စံး၀ဲလီၤႉ