Home တၢ်ကစီၣ် မၠၣ်၀တံၣ်၀့ၢ်ပူၤ မ့ၣ်ပိၢ်၂ ဖျၢၣ် ပိၢ်ဖးထီၣ်တဘျီဃီအဃိ ဘၣ်ဒိ ၂ဂၤ

မၠၣ်၀တံၣ်၀့ၢ်ပူၤ မ့ၣ်ပိၢ်၂ ဖျၢၣ် ပိၢ်ဖးထီၣ်တဘျီဃီအဃိ ဘၣ်ဒိ ၂ဂၤ

697
0
Photo: Nay Naw

လါဖ့ၤြဘူၤအါရံၤ ၃ သီႇ ၂၀၂၀ နံၣ်ႇ န့ၣ်နီၣ်

ဖဲကီၢ်ကၠီၣ်တဲၣ်=ကီၢ်ပယီၤကီၢ်ဆၢ ကညီကီၢ်စဲၣ်ႇ မၠၣ်၀တံၣ်၀့ၢ်ပူၤ တနံၤအံၤ (လါဖ့ၤြဘူၤအါရံၤ ၃ သီ)ဂီၤခီ (၇း၃၀ မံးနံး)အဆၢကတီၢ်န့ၣ်ႇ မ့ၣ်ပိၢ်ပိၢ်ဖးထီၣ်၀ဲတဘျီဃီခံဖျၢၣ်အဃိ ပိာ်ခွါ ၂ ဂၤ ဘၣ်ဒိ၀ဲဒၣ်ဒီးဘၣ်တၢ်ဆှၢအီၤဆူ မၠၣ်၀တံၣ်ကီၢ်ရ့ၣ်တၢ်ဆါဟံၣ်လီၤအဂ့ၢ်န့ၣ် သ့ၣ်ညါဘၣ်လီၤႉ

မၠၣ်၀တံၣ်၀့ၢ် နီၣ်ဂံၢ်(၄)က၀ီၤဒ့ မ့ပဒိၣ်မၤ၀ိ အ့ရှါကျဲမုၢ်ကပၤ အူစီတ့ၤမၠ့ၣ်(၆၁)နံၣ် အဟံၣ်မဲာ်ညါမ့ၣ်ပိၢ်ပိၢ်ဖးထီၣ်၀ဲဒၣ်ဒီးႇ ခီဖျိလၢမ့ၣ်ပိၢ်ပိၢ်ဖးထီၣ်အဃိ ဟံၣ်ကစၢ်လၢအမ့ၢ် အူစီတ့ၤမၠ့ၣ် အခီၣ်ကံၣ်ဒုၣ်လၢအစ့ၣ်တပၤဘၣ်၀ဲဒၣ်ဒီးဘျါအ့ၣ်ဒီးႇ အသကိးတဂၤလၢအမ့ၢ် အူစ့ၣ်လ့(၅၉)နံၣ် အခီၣ်ညါသးလၢအစ့ၣ်တပၤဘၣ်ဒိဘၣ်ထံး၀ဲဒၣ်အဃိ ဘၣ်တၢ်ဆှၢအ၀ဲသ့ၣ်ဆူ မၠၣ်၀တံၣ်ကီၢ်ရ့ၣ်တၢ်ဆါဟံၣ်န့ၣ်လီၤႉ

ဘၣ်ထွဲဒီးမ့ၣ်ပိၢ်ပိၢ်ဖးထီၣ်တၢ်ဂ့ၢ်န့ၣ် ဟံၣ်ကစၢ်အူစီတ့ၤမၠ့ၣ်စံး၀ဲလၢ “ဖဲ (၇း၃၀) မံးနံးအဆၢကတီၢ်န့ၣ် ယအိးထီၣ်၀ဲဟံၣ်မဲာ်ညါြတဲၤဒီး ယဟးထီၣ်အီမီာ်ထူလၢတၢ်ချၢလီၤႉ ဒီးယထံၣ်လၢဟံၣ်မဲာ်ညါအကပၤန့ၣ် တၢ်ဘိၣ်သူသူတဘိၣ်လၢအကအိၣ်၀ဲစုတတၢၤပံာ်ဒီး ယထံၣ်ကဒီးတၢ်ဘိၣ်အသီတဘိၣ်လၢလီၢ်ဆ့ၣ်နီၤအဖီခိၣ်အဃိႇ ယကွံာ်၀ဲတၢ်ဘိၣ်လၢအအိၣ်လၢဟံၣ်မဲာ်ညါတဘိၣ်န့ၣ်ဒီး ပိၢ်ဖးထီၣ်၀ဲဒၣ်၀ံၤအလီၢ်ခံႇ လၢအကယံာ်၀ဲအမံးနံးတဆံဃၣ်ဃၣ်န့ၣ် တၢ်ဘိၣ်လၢအဂၤတဘိၣ်ပိၢ်ဖးထီၣ်ကဒီး၀ဲလီၤ” အဂ့ၢ်န့ၣ်စံး၀ဲလီၤႉ

ဟံၣ်ကစၢ်အူစီတ့ၤမၠ့ၣ်အံၤ အပူၤကွံာ်န့ၣ်မ့ၢ်၀ဲဒၣ် ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်=DKBA ကရူၢ်ဖိလီၢ်လံၤတဂၤအသိးႇ လၢသုးခိးကီၢ် BGF စ့ၢ်ကီးမၤ၀ဲတၢ် ၅ နံၣ် ၀ံၤအလီၢ်ခံ ဆၢကတီၢ်ခဲအံၤလၢ BGF အပူၤမ့ၢ်ၦၤတဂၤလၢအိၣ်ဘှံး၀ဲလံန့ၣ်လီၤအဂ့ၢ်န့ၣ် သ့ၣ်ညါဘၣ်လီၤႉ

မ့ၣ်ပိၢ်ပိၢ်ဖးထီၣ်တၢ်ကဲထီၣ်သးအလီၢ် မၠၣ်၀တံၣ်ကီၢ်ဆၣ်ႇ ၦၤပၢဆှၢတၢ် အူဖၠိစီၣ်ကိၤကိၤ ဒီး ၦၤပၢဆှၢတၢ်တဖၣ်ႇ မၠၣ်၀တံၣ် သုးခိၣ်ဒိၣ်ဖိ ဖၠိသူၤရၣ်၀့ ဒီး ပယီၤသုးလၢအမၤဆှဲလဲ၀ဲမ့ၣ်ပိၢ်တဖၣ်ဒီးၦၤဘၣ်မူဘၣ်ဒါအဂၤတဖၣ် ဟဲသမံသမိးကွၢ်၀ဲတၢ်ဒီး ၦၤလၢအဟဲမၤပိၢ်ဖးထီၣ်မ့ၣ်ပိၢ်အံၤ တုၤအခဲအံၤ တၢ်ဖီၣ်အီၣ်အီၤ တချုးဒံး၀ဲဘၣ်န့ၣ်လီၤႉ