Home တၢ်ကစီၣ် တၢ်လဲၤထံၣ်လိာ်သးဒီးသုးရိၣ်မဲခိၣ်ကျၢၢ်တၢ်ဂ့ၢ် လီၢ်ခၢၣ်သးပၢဆှၢတၢ်ကမံးတံာ် အတၢ်ပာ်သးတမ့ၢ်ဘၣ်အဂ့ၢ် KNDP စံး၀ဲ

တၢ်လဲၤထံၣ်လိာ်သးဒီးသုးရိၣ်မဲခိၣ်ကျၢၢ်တၢ်ဂ့ၢ် လီၢ်ခၢၣ်သးပၢဆှၢတၢ်ကမံးတံာ် အတၢ်ပာ်သးတမ့ၢ်ဘၣ်အဂ့ၢ် KNDP စံး၀ဲ

629
0

လါအီကူာ် ၁၇ သီႇ ၂၀၂၀ နံၣ်ႇ စီၤထိလ့

ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် (KNDP) ၦၤဟ့ၣ်ကူၣ်တၢ်ဖိတဂၤ လဲၤထံၣ်လိာ်သးဒီး ကီၢ်ပယီၤတၢ်ဒီသဒၢ သုးရိၣ်မဲခိၣ်ကျၢၢ် သုးခိၣ်ကျၢၢ်စိရိၤ မ့အီၤလဲၤ ဒီး ထံရူၢ်ကီၢ်သဲးပၣ်တံၣ်တၢ်ထံၣ်လိာ်တၢၣ်ပီၣ်သကိးအံၤန့ၣ် တမ့ၢ်၀ဲ ပၣ်တံၣ်လီၢ်ခၢၣ်သးပၢဆှၢတၢ်ကမံးတံာ်ကရူၢ် အတၢ်ပာ်သးဘၣ်အဂ့ၢ်န့ၣ် ၦၤပၢၤလီၢ်ဆ့ၣ်နီၤ မါအီၤပၠံၤစိ စံးဘၣ်ခ့ၣ်အဲးစံၣ် ဖဲလါအီကူး ၁၅ သီအနံၤန့ၣ်လီၤႉ

အ၀ဲစံး၀ဲလၢ “ဖဲအပူၤကွံာ်သၢသီလွံၢ်သီခါန့ၣ် အ၀ဲဆဲးကျီး၀ဲဒၣ်ယၤဒီးလီတဲစိလီၤႉ သုးအံၤအဲၣ်ဒိးထံၣ်၀ဲလီၤ ကဘၣ်လဲၤဧါႉ ပ၀ဲသ့ၣ်တဖၣ်ဒီးသုးန့ၣ် တၢ်ဆဲးကျိးမနုၤမးတအိၣ်ဘၣ်ႉ ယတဲလၢတလိၣ်လဲၤဘၣ်လီၤႉ မ့မ့ၢ်လၢပၣ်တံၣ်လီၢ်ခၢၣ်သးပၢဆှၢတၢ်ကမံးတံာ် (CEC) န့ၣ် မၤတၢ်အိၣ်ဖှိၣ်စ့ၢ်ကီးတအိၣ်၀ဲဘၣ်ႉ တၢ်တဟ့ၣ်အခွဲးလၢကဘၣ်လဲၤန့ၣ် တအိၣ်ဘၣ်” အဂ့ၢ်န့ၣ် စံး၀ဲလီၤႉ

ဖဲအီကူာ် ၁၄ သီ မုၢ်ထူၣ်အဆၢကတီၢ် ကီၢ်ပယီၤတၢ်ဒီသဒၢ သုးရိၣ်မဲခိၣ်ကျၢၢ်ဒီး ထံရူၢ်ကီၢ်သဲးပၣ်တံၣ် ၃၄ ပၣ်တံၣ်တဖၣ်အံၤ မၤ၀ဲဒၣ်တၢ်ထံၣ်လိာ်အိၣ်သကိး ဖဲန့ၣ်ပၠံၣ်တီၣ် ဘယ့ၣ်နီၤတၢ်အိၣ်ကဒုလီၢ်အဂ့ၢ် သုးမုၢ်ဒိၣ်တၢ်ကစီၣ်လၢအမ့ၢ်အတီ တၢ်ဘိးဘၣ်ရၤလီၤကရူၢ်အံၤ ထုးထီၣ်ပာ်ဖျါ၀ဲတၢ်ကစီၣ်ဒီး လၢတၢ်ထံၣ်လိာ်သးအပူၤန့ၣ် KNDP ၦၤဟ့ၣ်ကူၣ်တၢ် စီၤထိကၠံၤ ဟဲထီၣ်၀ဲဒၣ်အဂ့ၢ် တၢ်ထုးထီၣ်ပာ်ဖျါတၢ်ကစီၣ်အပူၤ ပာ်ဖျါ၀ဲဒၣ်န့ၣ်လီၤႉ

လၢကဟဲထီၣ်တၢ်ထံၣ်လိာ်အိၣ်သကိးအံၤအဂီၢ် တမ့ၢ်တၢ်ကွဲမုာ် KNDP ဒီးလံာ်ကွဲမုာ်ဘၣ်အသိး မ့ၢ်၀ဲဆဲးကျိး၀ဲဒၣ်ဒီးလီတဲစိလီၤအဂ့ၢ်န့ၣ် KNDP စံး၀ဲလီၤႉ

လၢန့ၣ်အမဲာ်ညါ KNDP အံၤ မနုၤပၣ်တံၣ်ႇ မနုၤတၢ်ကရၢကရိ အတၢ်လုၢ်ဘၢစိကမီၤအံၤ တတူၢ်လိာ်ဘၣ်အသိးႇ ထံကီၢ်တၢ်ကဲထီၣ်သးတၢ်အိၣ်သးအကလုာ်ကလုာ်အံၤ ပဲာ်ထံနီၤဖးလဲၤ၀ဲဒၣ်လိၤလိၤဘျၢဘျၢလီၤန့ၣ် ပပာ်လီၤဃာ်ကျဲသနူအဂ့ၢ်န့ၣ် မါအီၤပၠံၤစိ စံး၀ဲန့ၣ်လီၤႉ

“NLD˜ သုးႇ ပၠံၣ်ခဲၤဖၠိ(ကီၢ်စၢဖှိၣ်သွံၣ်ဃူဖိးပၣ်တံၣ်) တလဲၤပိာ်အခံနီတဂၤဘၣ်ႉ လၢပကလုာ်အဖီခိၣ်အဂီၢ် ကအိၣ်ဆၢထၢၣ်ဂၢၢ်ဂၢၢ်ကျၢၤကျၢၤလီၤ” အဂ့ၢ်န့ၣ် အ၀ဲစံး၀ဲလီၤႉ

KNDP အံၤ ကညီကီၢ်စဲၣ်ပူၤ ကညီထံရူၢ်ကီၢ်သဲးပၣ်တံၣ်တဖၣ်လၢအမ့ၢ် ကညီဒံၣ်မိၣ်ကရဲၣ် တ့ၣ်ပၣ်တံၣ် (KDP)˜ ကညီကီၢ်စဲၣ် ဒံၣ်မိၣ်ခြ့ၣ်စံၣ်ဒီး တၢ်ဂုၤထီၣ်ပသီထီၣ်ပၣ်တံၣ် (KSDDP) ဃူဖိး ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်ဒီး ဖျိၤ–စှီၤ ဒံၣ်မိၣ်ကရဲၣ်တ့ၣ်ပၣ်တံၣ် (PSDP) ပၣ်တံၣ်ဖိတနီၤ က့ၤပာ်ဖှိၣ်အသးဒီး ဒုးအိၣ်ထီၣ်၀ဲထဲပၣ်တံၣ်တခါဧိၤန့ၣ်လီၤႉ

ဒ်န့ၣ်အသိး ကီၢ်ပယီၤ တၢ်ဒီသဒၢသုးရိၣ်မဲခိၣ်ကျၢၢ် မ့အီၤလဲၤဒီး ထံရူၢ်ကီၢ်သဲး ပၣ်တံၣ် အၦၤမူဘၣ်ဘၣ်ဒါတဖၣ် မၤ၀ဲဒၣ်တၢ်ထံၣ်လိာ်အိၣ်သကိးအပူၤန့ၣ် ကညီကမျၢၢ်ပၣ်တံၣ်(ခ့ၣ်ဖံၣ်ဖံၣ်) ဟဲထီၣ်၀ဲဒၣ်အဂ့ၢ် တၢ်ကစီၣ်ဟူထီၣ်သါလီၤအဖီခိၣ် တမ့ၢ်၀ဲဘၣ်အဃိႇ လၢပ၀ဲသ့ၣ်တပၤ တလဲၤထံၣ်လိာ်သးဘၣ်အဂ့ၢ် ပၣ်တံၣ် ၦၤပၢၤလီၢ်ဆ့ၣ်နီၤ ၂ စီၤစ့၀ါ စံးဘၣ် ခ့ၣ်အဲးစံၣ်လီၤႉ