Home တၢ်ကစီၣ် ၀့ၢ်တကူၣ် ၦၤလၢကနုာ်လီၤတပြၢသးလၢကညီဂ့ၢ်၀ီတဖၣ်အကျါ ပိာ်မုၣ်အါ၀ဲ

၀့ၢ်တကူၣ် ၦၤလၢကနုာ်လီၤတပြၢသးလၢကညီဂ့ၢ်၀ီတဖၣ်အကျါ ပိာ်မုၣ်အါ၀ဲ

736
0

လါအီကူး ၂၈ သီႇ ၂၀၂၀ နံၣ်ႇ စီၤထိလ့

နံၣ်လၢကဟဲ ၂၀၂၀ တၢ်ဃုထၢအပူၤ ၀့ၢ်တကူၣ်ကီၢ်ခီဒိၣ် ကညီကလုာ်ဒူၣ်ကလုာ်ဂ့ၢ်၀ီ ခၢၣ်စးလၢကဒိးဃုထၢသးလၢကနုာ်လီၤတပြၢတၢ်တဖၣ်အကျါ ပိာ်မုၣ်တဖၣ်အါန့ၢ်ဒံးပိာ်ခွါတဖၣ်အဂ့ၢ်န့ၣ် ပၣ်တံၣ်တဖုစုာ်စုာ် ထုးထီၣ်ပာ်ဖျါ၀ဲခၢၣ်စးလၢကဒိးဃုထၢသးတဖၣ်အစရီအသိး သ့ၣ်ညါဘၣ်လီၤႉ

၀့ၢ်တကူၣ်ကီၢ်ခီႇ ကညီကလုာ်ဒူၣ်ကလုာ်ဂ့ၢ်၀ီ တၢ်ဖးဟီၣ်က၀ီၤပူၤ ပၣ်တံၣ် ၇ ခါအပူၤ ခၢၣ်စး ၇ ဂၤ ကနုာ်လီၤတပြၢအိၣ်၀ဲဒၣ်ဒီး ဖဲအကျါန့ၣ်မ့ၢ်၀ဲဒၣ် ပိာ်မုၣ် ၄ ဂၤဒီး ပိာ်ခွါ ၃ ဂၤလီၤအဂ့ၢ်န့ၣ် သ့ၣ်ညါဘၣ်လီၤႉ

ခၢၣ်စးပိာ်မုၣ်တဖၣ်န့ၣ်မ့ၢ်၀ဲဒၣ် ဒီကလုာ်ဒံၣ်မိၣ်ခြ့ၣ်စံၣ်ကရၢစိ (NLD) အံၤ လၢအမ့ၢ် တကီၢ်ခါ ၀့ၢ်တကူၣ်ကီၢ်ခီဒိၣ် ကလုာ်ဘျီၣ်ဒိၣ်ခၢၣ်စး နီၢ်စူၤစဲနၤလၣ်လၣ်စိႇ ဃူဖိး ကလုာ်ဒူၣ်ကလုာ်ဒံၣ်မိၣ်ခြ့ၣ်စံၣ်ပၣ်တံၣ် (UNDP) နီၢ်အိလၣ်ႇ ကမျၢၢ်တၢ်နဲၣ်ကျဲပၣ်တံၣ် (PPP) နီၢ်လ့သ့ၤကံၤထိႇ ကမျၢၢ်တၢ်ဘၣ်ဘျုးပၣ်တံၣ် (UBP) နၣ်သ့သ့ခဲၤသ့ၣ်တဖၣ် အဂ့ၢ်န့ၣ် ပၣ်တံၣ်သ့ၣ်တဖၣ်အံၤ ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

“ဒ်သိးဒီးကညီကလုာ်တဖၣ် ကန့ၢ်ဘၣ်တၢ်ခွဲးတၢ်ယာ်လၢလၢၦဲၤၦဲၤအဂီၢ်ႇ ကဒိးန့ၢ်ဘၣ်တၢ်ထဲသိးတုၤသိးအဂီၢ် အဲၣ်ဒိးဟူးဂဲၤ၀ဲအဃိ နုာ်လီၤတပြၢ၀ဲလီၤ” အဂ့ၢ်န့ၣ် ခၢၣ်စး ပိာ်မုၣ်တဂၤလၢအမ့ၢ် နီၢ်အိလၣ် စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ နီၢ်စူၤစဲနၤလၣ်လၣ်စိအံၤ ကညီကမျၢၢ်လၢအအိၣ်၀့ၢ်တကူၣ်တဖၣ်အံၤ ၦၤလၢကအိၣ်ဆၢ ထၢၣ်လၢပဂီၢ်ႇၦၤလၢအမၤတၢ်သ့တဖၣ်အံၤ ဃုထၢဟ့ၣ်တၢ်ဖးလီၤတံၢ်လီၤဆဲးန့ၣ် အဲၣ်ဒိးတဲယဲလီၤအဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါအီကူး ၂၆ သီအနံၤန့ၣ်လီၤႉ

“ပိာ်မုၣ်တဖၣ်ဟဲပၣ်ဃုာ်ပၣ်ဂီၢ်အါန့ၢ်ဒံးအပူၤကွံာ်အံၤန့ၣ် သးခုဒိၣ်မးလီၤႉ ဘၣ်ဆၣ် ဒိးသန့ၤထီၣ်သးဒံးလၢ မၤနၢၤတၢ်ဒီးအဆှူအဖီခိၣ်လီၤမီၤႉ ပ၀ဲသ့ၣ်တဖၣ်ဒု မ့ၢ်တဲဒ်တၢ်ကစီၣ်တၢ်ဂ့ၢ်တၢ်ကျိၤအသိးမ့ၢ်ဂ့ၤႇ အကျိၤအကျဲလၢအလိၣ်၀ဲလၢအဂၤတဖၣ်မ့ၢ်ဂ့ၤ ကမၤစၢၤ၀ဲအဂီၢ်အိၣ်၀ဲလီၤႉ လီၤဆီဒၣ်တၢ် လၢကလုာ်ဒူၣ်ဟီၣ်က၀ီၤအပူၤလီၤမီၤ” အဂ့ၢ်န့ၣ် ပိာ်မုၣ်ကရၢစိ(ကီၢ်ပယီၤ) -WLB နဲၣ်ရွဲၣ်သဃဲၤ နီၢ်ဆၢဆၢ စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ ၀့ၢ်တကူၣ် ကညီဂ့ၢ်၀ီအလီၢ်အံၤ ကညီကမျၢၢ်ပၣ်တံၣ် (KPP) ခၢၣ်စး ၀့ၢ်တကူၣ်ကီၢ်ခီဒိၣ် ကညီလံာ်လဲၢ်ဒီးတၢ်ဆဲးတၢ်လၤကမံးတံာ် နဲၣ်ရွဲၣ် မါသါ၀့အူႇ ကီၢ်စၢဖှိၣ်သွံၣ်ဃူဖိးဒီးတၢ်ဂုၤထီၣ်ပသီထီၣ်ပၣ်တံၣ် ခၢၣ်စး ကညီတၢ်ဘျၢသဲစးကူၣ်သ့တဖၣ် ၦၤဂ့ၢ်၀ီတၢ်တိစၢၤမၤစၢၤၦာ်ဘျးစဲ နဲၣ်ရွဲၣ် စီၤကၠဲၣ်ကီၢ်ထူ ကနုာ်လီၤတပြၢ၀ဲဒၣ်န့ၣ်လီၤႉ ဒ်န့ၣ်အသိး ဃူဖိးဒံၣ်မိၣ်ကရဲၣ်တ့ၣ်ပၣ်တံၣ် -UDP (ဖီတၤဆှုၣ် ပၣ်တံၣ်) ကလုာ်ခၢၣ်စးတဂၤ ကနုၤလီၤတပြၢ၀ဲဒၣ်န့ၣ်လီၤႉ