Home တၢ်ကစီၣ် အ့ၣ်ယၣ်၀တံၣ်ကီၢ်ခီအပူၤ ကညီဂ့ၢ်၀ီ ၦၤဟ့ၣ်တၢ်ဖးဖိအိၣ်၀ဲ ၁၀ ကလီၢ်ဃၣ်ဃၣ်

အ့ၣ်ယၣ်၀တံၣ်ကီၢ်ခီအပူၤ ကညီဂ့ၢ်၀ီ ၦၤဟ့ၣ်တၢ်ဖးဖိအိၣ်၀ဲ ၁၀ ကလီၢ်ဃၣ်ဃၣ်

692
0

လါအီးကထိဘၢၣ် ၂၀ သီႇ ၂၀၂၀ နံၣ်ႇ စးဖါရှီ

အ့ၣ်ယၣ်၀တံၣ်ကီၢ်ခီဒိၣ် ဘျီၣ်ဒိၣ်တၢ်ဖးဟီၣ်က၀ီၤ ကညီကလုာ်ဒူၣ်ကလုာ်ဂ့ၢ်၀ီအဂီၢ် လၢကဟဲ ၂၀၂၀ တၢ်ဃုထၢဖးဒိၣ်အံၤ ကညီၦၤဟ့ၣ်တၢ်ဖးဖိအနီၣ်ဂံၢ်အိၣ်၀ဲ(၁၀ ကလီၢ်)ဃၣ်ဃၣ်အဂ့ၢ်န့ၣ် သ့ၣ်ညါဘၣ် ဖဲလါအီးကထိဘၢၣ် ၁ သီအနံၤစရီပူၤအသိးန့ၣ်လီၤႉ

အ့ၣ်ယၣ်၀တံၣ်ကီၢ်ခီဒိၣ် ကညီဂ့ၢ်၀ီပတြီာ်ခၢၣ်စးလၢအမ့ၢ် ကညီကလုာ်ပၣ်တံၣ် -KNDP မါမ့ယဲထွ့ စံး၀ဲလၢ “ကီၢ်ခီခီၣ်မံရှၢၣ်အံၤ တနံၤအံၤဃုသ့ၣ်ညါဒီး မ့ၢ်ဘၣ်တယးကွၢ်န့ၣ် ဒ်လါအီးကထိဘၢၣ် ၁ သီအနံၤစရီအသိး ကညီဂ့ၢ်၀ီ ၦၤဟ့ၣ်တၢ်ဖးဖိပာ်ဖှိၣ်ခဲလၢာ်အိၣ်၀ဲ(၉၉၉ႇ၅၃၁)ဂၤန့ၣ်လီၤႉ စရီကျၢၢ်တံၢ်ခီဒုတဟဲဒံးဘၣ်ႉ ကအါထီၣ်ကစှၤလီၤဒုအိၣ်၀ဲလီၤႉ ကအါထီၣ်တစဲးဒီးကလီၤစှၤတစဲးဖိလီၤႉ အကလီၢ် ၁၀ န့ၣ် အိၣ်သ့၀ဲဒၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ ဖဲလါအီးကထိဘၢၣ် ၁ သီအစရီအသိးန့ၣ် အ့ၣ်ယၣ်၀တံၣ်ကီၢ်ခီဒိၣ်အပူၤ ကီၢ်ဆၣ်တဖၣ်လၢကညီကလုာ်အိၣ်ဆိးအါကတၢၢ်လၢအမ့ၢ် ပါတနီၣ်အံၤ ကညီၦၤဟ့ၣ်တၢ်ဖးဖိအိၣ်၀ဲ ၁ ကလီၢ်ဘျဲၣ်ႇ ၀ါခဲမၣ် ၉၂ႇ၀၀၀ ဘျဲၣ်ႇ မၠီမၠး ၈၅ႇ၀၀၀ ဂၤဘျဲၣ်ႇ ကၠိၤပၠီၤ ၈၁ႇ၀၀၀ ဂၤဘျဲၣ်ႇ အ့ၤမဲ ၇၅ႇ၀၀၀ ဘျဲၣ်ႇ ညီၤတိ ၆၇ႇ၀၀၀ ဘျဲၣ်ႇ ငပူၣ်တီ ၆၅ႇ၀၀၀ ဘျဲၣ် ဒီး ကၤကၠံထီၣ် ၆၂ႇ၀၀၀ ဘျဲၣ် အိၣ်၀ဲအဂ့ၢ်န့ၣ် တၢ်ဒွးတယး၀ဲန့ၣ်လီၤႉ

ဖဲလါယူၤလံ ၂၅ သီ တုၤလၢ လါအီကူး ၁၄ သီအနံၤ တၢ်ဃုထၢခီၣ်မံရှၢၣ်အံၤ တၢတဘျီထုးထီၣ်ပာ်ဖျါ၀ဲဒၣ် ၦၤဟ့ၣ်တၢ်ဖးဖိတဖၣ်အစရီန့ၣ်လီၤႉ တၢ်ပာ်ပနီၣ်ဃာ်၀ဲအလီၢ်ခံကတၢၢ် စးထီၣ်ဖဲလါအီးကထိဘၢၣ် ၁ သီ တုၤလၢ ၁၄ သီအဃိ ဖဲတၢ်ဆၢကတီၢ်၀ဲန့ၣ်အပူၤ ၦၤဟ့ၣ်တၢ်ဖးဖိအနီၣ်ဂံၢ်တၢ်ဆီတလဲသးအိၣ်သ့၀ဲအဂ့ၢ်န့ၣ် ဂ့ၢ်၀ီပတြီာ်ခၢၣ်စးတဖၣ် ပာ်ထံနီၤဖးစံး၀ဲန့ၣ်လီၤႉ

ဖဲလါအီးကထိဘၢၣ် ၁၃ သီအနံၤ ဒ်ခ့ၣ်အဲးစံၣ်ဆဲးကျိးသံကွၢ်၀ဲဒၣ်ဒီး အ့ၣ်ယၣ်၀တံၣ်ကီၢ်ခီဒိၣ် တၢ်ဃုထၢခီၣ်မံရှၢ်ကရူၢ် နဲၣ်ရွဲၣ် အူမၠ့ၣ်နဲၤအသိးန့ၣ် စးထီၣ်လၢလါယူၤလံ ၂၅ သီ တုၤလၢ လါအီကူး ၁၄ သီအနံၤ တၢတဘျီ ကညီဂ့ၢ်၀ီ ၦၤဟ့ၣ်တၢ်ဖးဖိပာ်ဖှိၣ်ခဲလၢာ်အိၣ်၀ဲ(၉၈၆ႇ၉၈၄)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ် ၂၀၁၄ နံၣ်န့ၣ် ဒ်တၢ်ထၢ၀ဲဒၣ်ကီၢ်ဒီဘ့ၣ်ဖးဖီမုၢ်စရီအသိး အ့ၣ်ယၣ်၀တံၣ်ကီၢ်ခီဒိၣ်လၢ ကီၢ်ဆၣ်ခဲလၢာ် အိၣ်၀ဲ ၂၆ ဘ့ၣ်အံၤ ဃုာ်ဒီးကညီ ၦၤနီၣ်ဂံၢ်ပာ်ဖှိၣ်ခဲလၢာ်အိၣ်၀ဲ ၆ႇ၁၈၄ႇ၈၂၉ ဘျဲဲၣ်ဒီး လၢကဟဲ လါနိၣ်၀့ဘၢၣ် ၈ သီ ၂၀၂၀ တၢ်ဃုထၢအဂီၢ် ကညီဂ့ၢ်၀ီ ခၢၣ်စးပတြီာ် ၆ ဂၤ ကနုာ်လီၤဒိးဃုထၢသးန့ၣ်လီၤႉ