Home တၢ်ကစီၣ် ကညီဂ့ၢ်၀ီ တၢ်လီၢ် ၅ ခါလၢာ် NLD ခၢၣ်စးတဖၣ် တၢ်ဖးနီၣ်ဂံၢ်အါ၀ဲ

ကညီဂ့ၢ်၀ီ တၢ်လီၢ် ၅ ခါလၢာ် NLD ခၢၣ်စးတဖၣ် တၢ်ဖးနီၣ်ဂံၢ်အါ၀ဲ

978
0

လါနိၣ်၀့ဘၢၣ် ၁၀ သီႇ ၂၀၂၀ နံၣ်ႇ ခ့ၣ်အဲးစံၣ်

တၢ်ဃုထၢဖးဒိၣ်လၢတၢ်မၤအီၤ၀ံၤ၀ဲဒၣ်အံၤ အ့ၣ်ယၣ်၀တံၣ်ႇ ၀့ၢ်တကူၣ်ႇ ပကိႇ တနီသရံၣ်ကီၢ်ခီဒိၣ်ဒီး မိၣ်ကီၢ်စဲၣ် ကညီဂ့ၢ်၀ီအဂီၢ် ခၢၣ်စးပတြီာ်တဖၣ်လၢအဒိးဃုထၢအသးလၢပၣ်တံၣ်ခၢၣ်စးတဖုစုာ်စုာ်အကျါ ကလုာ်ဒံၣ်မိၣ်ခြ့ၣ်စံၣ်ကရၢစိ -NLD ခၢၣ်စးတဖၣ် တၢ်ဖးနီၣ်ဂံၢ်အါ၀ဲဒီးမၤနၢၤ၀ဲတၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါနိၣ်၀့ဘၢၣ် ၈ သီအနံၤန့ၣ် ထံကီၢ်ဒီဘ့ၣ်တၢ်မၤ၀ဲဒၣ်တၢ်ဃုထၢဖးဒိၣ်အံၤ လၢအ့ၣ်ယၣ်၀တံၣ်ကညီဂ့ၢ်၀ီအဂီၢ် ဂၣ်မိမၠၣ်မၠၣ်သူၤႇ ၀့ၢ်တကူၣ်ကီၢ်ခီဒိၣ်န့ၣ် နီၢ်စူၤစဲနၤလၣ်လၣ်စိႇ ပကိကီၢ်ခီဒိၣ်န့ၣ် နီၢ်ၦဲၤစ့ႇ တနီသရံၣ်ကီၢ်ခီဒိၣ်န့ၣ် စီၤလူၤကၣ်ဒီး မိၣ်ကီၢ်စဲၣ်န့ၣ် ဒီၣ်ကထၢၣ် စီၤသၤစ့ၤတဖၣ်အံၤ နုာ်လီၤတပြၢဒိးဃုထၢအသးစုာ်စုာ်လၢ ကလုာ်ဒံၣ်မိၣ်ခြ့ၣ်စံၣ်ကရၢ -NLD ခၢၣ်စးန့ၣ်လီၤႉ

လၢတၢ်နုာ်လီၤတပြၢဃုထၢသးအံၤအပူၤ ကီၢ်ခီဒိၣ်တၢ်လီၢ် ၄ တီၤဒီး ကီၢ်စဲၣ်တၢ်လီၢ် ၁ တီၤန့ၣ် တကီၢ်ခါခဲအံၤ သ့ၣ်ညါဘၣ်လၢ NLD ခၢၣ်စး ကညီဂ့ၢ်၀ီခၢၣ်စးပတြီာ်တဖၣ် တၢ်ဖးနီၣ်ဂံၢ်အါ၀ဲဒၣ်ဒီး လၢကညီဂ့ၢ်၀ီခၢၣ်စးပတြီာ်တဖၣ် အတၢ်ဖးအဆၢတဖၣ်အံၤန့ၣ် တယံၤတမီၢ်တၢ်ကထုးထီၣ်ပာ်ဖျါ၀ဲလီၤအဂ့ၢ်န့ၣ် တၢ်ဃုထၢခီၣ်မံရှၢၣ်ကရူၢ်အဒ့လၢအဘၣ်ထွဲ ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

မ့ၢ်မၤနၢၤ၀ဲဒၣ်တၢ်ဃုထၢအံၤန့ၣ် အ့ၣ်ယၣ်၀တံၣ်ကညီဂ့ၢ်၀ီ ဂၣ်မိမၠၣ်မၠၣ်သူၤႇ ပကိကီၢ်ခီဒိၣ် ကညီဂ့ၢ်၀ီ နီၢ်ၦဲၤစ့ ဒီး တနီသရံၣ်ကီၢ်ခီဒိၣ် ကညီဂ့ၢ်၀ီ စီၤလူၤကၣ် ၦၤသ့ၣ်တဖၣ်အံၤ ကကဲထီၣ်၀ဲကညီဂ့ၢ်၀ီကိတိာ်တဖၣ်လၢ တၢ်က့ၤဃုထၢအ၀ဲသ့ၣ်ခံဘျီတဘျီန့ၣ်လီၤႉ

မ့မ့ၢ်နီၢ်စူၤစဲနၤလၣ်လၣ်စိအံၤ အပူၤကွံာ် မ့ၢ်၀ဲ၀့ၢ်တကူၣ်ကီၢ်ခီဒိၣ် ကလုာ်ဘျီၣ်ဒိၣ်ခၢၣ်စးတဆီ ကကဲထီၣ်က့ၤ၀ဲဒၣ်လၢ၀့ၢ်တကူၣ်ကီၢ်ခီဒိၣ် ကညီဂ့ၢ်၀ီကိတိာ်န့ၣ်လီၤႉ