Home တၢ်ကစီၣ် မၠၣ်၀တံၣ်၀့ၢ်ပူၤ ပယီၤသုးဒီး BGF မၤအါထီၣ်တၢ်ဘံၣ်တၢ်ဘၢအံၤ တဘၣ်ထွဲဒီးတၢ်ဖီၣ်သိလ့ၣ်တၢ်ဂ့ၢ်ဘၣ်အဂ့ၢ် စံး၀ဲ

မၠၣ်၀တံၣ်၀့ၢ်ပူၤ ပယီၤသုးဒီး BGF မၤအါထီၣ်တၢ်ဘံၣ်တၢ်ဘၢအံၤ တဘၣ်ထွဲဒီးတၢ်ဖီၣ်သိလ့ၣ်တၢ်ဂ့ၢ်ဘၣ်အဂ့ၢ် စံး၀ဲ

2131
0

ဿလါဒံၣ်စ့ဘၢၣ် ၁၆ သီႇ ၂၀၂၀ နံၣ်ႇ န့ၣ်နီၣ်

ကညီကီၢ်စဲၣ်ႇ ဖၣ်ပူၣ်ကီၢ်ရ့ၣ် မဲၤ၀့ၤဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးက့ ၅ဒီး ပယီၤသုးမုၢ်ဒိၣ်တဖၣ်အဘၢၣ်စၢၤ တကီၢ်ခါခီဖျိလၢတၢ်ဒုးကဲထီၣ်အဃိ သ့ၣ်ညါဘၣ်လၢမၠၣ်၀တံၣ်၀့ၢ်ပူၤန့ၣ် ပယီၤသုးဒီးသုးခိးကီၢ်ဆၢ -BGF သုးကရူၢ်တဖၣ်ပာ်ဖှိၣ်ထီၣ်အသးဒီး မၤအါထီၣ်၀ဲတၢ်ဘံၣ်တၢ်ဘၢအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မၠၣ်၀တံၣ်၀့ၢ်ပူၤ ဘၣ်ထွဲဒီးတၢ်မၤဃံးထီၣ်၀ဲတၢ်ဘံၣ်တၢ်ဘၢအံၤ ဖဲအပူၤကွံာ် လါဒံၣ်စ့ဘၢၣ် ၁၁ သီဒီး ၁၂ သီအနံၤန့ၣ် ဟီၣ်က၀ီၤပၢၤကီၢ်ကရူၢ်ဒီးသုးမုၢ်ဒိၣ်တဖၣ်ပာ်ဖှိၣ်ထီၣ်သးဒီး မၤ၀ဲတၢ်ဖီၣ်သိလ့ၣ်အခိၣ် ၁၀၀ ဘျဲၣ်လၢအဘၣ်ထွဲလိာ်အသးဒီးသုးခိးကီၢ်ဆၢအံၤအဃိ လီၢ်က၀ီၤဖိတဖၣ်ဘၣ်ယိၣ်၀ဲဒၣ်လၢ သုးဂ့ၢ်၀ီတၢ်ဖ့ၣ်ဆၢတဖၣ်ကဟဲအိၣ်ထီၣ်၀ဲန့ၣ်လီၤႉ

ဘၣ်ထွဲဒီး တၢ်ဟံးထီၣ်ဖီၣ်ထီၣ်မၤအါထီၣ်၀ဲတၢ်ဘံၣ်တၢ်ဘၢအံၤန့ၣ် ဒ်ကမျၢၢ်တဖၣ်ဘၣ်ယိၣ်ဘၣ်ဘှီ၀ဲအသိး တမ့ၢ်ဘၣ်အဂ့ၢ်န့ၣ် ဖဲတနံၤအံၤလါဒံၣ်စ့ဘၢၣ် ၁၆ သီ ဂီၤခီအဆၢကတီၢ် သုးခိးကီၢ်ဆၢ(BGF)ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

“ကတီၢ်အံၤ ပၣ်ဖူၣ်ကီၢ်ရ့ၣ် မဲၤ၀့ၤဟီၣ်က၀ီၤအပူၤန့ၣ် ပယီၤသုးဒီး KNLA သုးက့ ၅ တဖၣ်အဘၢၣ်စၢၤ တၢ်ဒုးတၢ်ဖ့ၣ်ဆၢအိၣ်ထီၣ်၀ဲဒီး တၢ်ဂ့ၢ်လၢကပိၤထွဲထီၣ်အခံဟဲအိၣ်ထီၣ်သ့အဃိ မၠၣ်၀တံၣ်၀့ၢ်ပူၤ သုးမုၢ်ဒိၣ်ဒီး သုးခိးကီၢ်ဆၢ -BGF သုးတဖၣ်ပာ်ဖှိၣ်ထီၣ်သးဒီး ဟံးထီၣ်ဖီၣ်ထီၣ်၀ဲတၢ်ဘံၣ်တၢ်ဘၢလီၤ” အဂ့ၢ်န့ၣ် အ၀ဲစံး၀ဲန့ၣ်လီၤႉ

လၢန့ၣ်အမဲာ်ညါ ပယီၤသုးဒီးသုးခိးကီၢ်ဆၢ -BGF သုးကရူၢ်တဖၣ်ပာ်ဖှိၣ်ထီၣ်သးဒီး ဟံးန့ၢ်၀ဲတၢ်ဘံၣ်တၢ်ဘၢ ဖဲကျဲခိၣ်ထိးတဖၣ်အိၣ်၀ဲအသိး မုၢ်နၤခီစ့ၢ်ကီးတၢ်ဟးဆှၣ်ကွၢ်တၢ်အိၣ်၀ဲအဂ့ၢ်န့ၣ် BGF ၦၤဘၣ်မူဘၣ်ဒါတဂၤအံၤ ဆဲးစံး၀ဲန့ၣ်လီၤႉ

တကီၢ်ခါဆၢကတီၢ်ခဲအံၤ ဖၣ်ပူၣ်ကီၢ်ရ့ၣ် မဲၤ၀့ၤဟီၣ်က၀ီၤအပူၤ ခီဖျိလၢခံခီခံကပၤတၢ်ဒုးတၢ်ဖ့ၣ်ဆၢတဖၣ်အဃိ ဟီၣ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးတၢ်ယၤကကဲထီၣ်ဖးဒိၣ်အဃိ လီၢ်က၀ီၤသ၀ီဖိလၢအကယၤတဖၣ် ဘၣ်လဲၤဃ့ၢ်အိၣ်ခူသူၣ်အသးဆူ မိၣ်ကီၢ်စဲၣ်ႇ ဘံလ့ ဒီးအဘူးအတံၢ်တဖၣ်အအိၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်ဒီး KNU ၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်န့ၣ်လီၤႉ