Home တၢ်ကစီၣ် KNLA ဒီး ပယီၤသုး တၢ်ခးလိာ်သးကဲထီၣ်

KNLA ဒီး ပယီၤသုး တၢ်ခးလိာ်သးကဲထီၣ်

1170
0

လါဒံၣ်စ့ဘၢၣ် ၃ သီႇ ၂၀၂၀ နံၣ်ႇ စးအဲၣ်ဆူ

ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးဖိတဖၣ်လၢအဟံ၀ဲဟီၣ်က၀ီၤတၢ်ဘံၣ်တၢ်ဘၢတဖၣ်ဒီး ပယီၤသုးကျိၤတဖၣ်အဘၢၣ်စၢၤ ဖဲလါဒံၣ်စ့ဘၢၣ် ၁ သီအနံၤန့ၣ် တၢ်ခးလိာ်သးကဲထီၣ်ယံၤ ၀ဲလၢအမံးနံးအတီၢ်ပူၤအဂ့ၢ်န့ၣ် KNLA တကပၤ ပာ်ဂၢၢ်ပာ်ကျၢၤစံး၀ဲန့ၣ်လီၤႉ

ကညီကီၢ်စဲၣ်ႇ ဖၣ်ပူၣ်(မုၢ်တြီၢ်)ကီၢ်ရ့ၣ်ႇ ဒွဲၣ်လိကီၢ်ဆၣ်အပူၤ ၀ၣ်သိလီၤဒီးထံက့ၣ်လီၤသ၀ီအဘၢၣ်စၢၤ KNU သုးက့(၅) စုဒုၣ်တီၤအဖီလာ် KNLA သုးရ့ၣ်(၁၀၂)သုးတၢ်ဘံၣ်တၢ်ဘၢတဖၣ်ဒီး ပယီၤသုး မုၢ်ထီၣ်ကလံၤထံး သုး၀ဲၤလီၢ်ခိၣ်သ့ၣ်(ရတခ)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၃၃၉)သုးဖိတဖၣ်အဘၢၣ်စၢၤ တၢ်ခးလိာ်သးကဲထီၣ်ယံၤ၀ဲလၢအမံးနံးအတီၢ်ပူၤအဂ့ၢ်န့ၣ် သုးက့(၅)သုးဂ့ၢ်၀ီခိၣ် သုးခိၣ်ဒိၣ်ဖိ စီၤကျၢၤဒိၣ် စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ “ဖဲဂီၤခီ ၇ နၣ်ရံၣ် ၁၀ မံးနံးအဆၢကတီၢ် ၀ၣ်သိလီၤဒီးထံက့ၣ်လီၤသ၀ီအဘၢၣ်စၢၤ ဘၣ်သဂၢၢ်လိာ်သးတဘျီဃီဒီး ခးလိာ်သးလီၤႉ တၢ်ကဲထီၣ်သးတၢ်ဂ့ၢ်တၢ်ကျိၤတခီန့ၣ် ခီဖျိလၢပယီၤသုးအံၤဟးထီၣ်ဟးလီၤဟူးဂဲၤအါထီၣ်၀ဲလီၤႉ လီၤဆီဒၣ်တၢ်န့ၣ််ဟး၀ဲလၢမုၢ်နၤခီလီၤႉ လၢပၦၤတကပၤတဲအ၀ဲသ့ၣ်လၢ မ့ၢ်ဟးထီၣ်က့ၤလီၤန့ၣ်ကဘၣ်ဟ့ၣ်ဒုးသ့ၣ်ညါ၀ဲႇ မုၢ်နၤခီန့ၣ်တဘၣ်ဟးဘၣ် ဘၣ်ဆၣ် အ၀ဲသ့ၣ်တဟ့ၣ်ဒုးသ့ၣ်၀ဲတၢ်နီတမံၤဘၣ်ဟဲ၀ဲအဃိ တၢ်ခးလိာ်သးကဲထီၣ်သးဒ်အံၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိလၢတၢ်ခးလိာ်သးကဲထီၣ်၀ဲလၢအမံးနံးအတီၢ်ပူၤအဃိ ပယီၤသုးတကပၤတၢ်ဘၣ်ဒိဘၣ်ထံးအိၣ်ႇတအိၣ်န့ၣ် တသ့ၣ်ညါဘၣ်ဒံးဘၣ်ဒီး မ့မ့ၢ် KNLA သုးတကပၤ တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်န့ၣ် KNLA တကပၤ စံး၀ဲန့ၣ်လီၤႉ

ဘၣ်ဆၣ် ဒ်လီၢ်က၀ီၤတၢ်ကစီၣ်ဂံၢ်ခီၣ်ထံးပာ်ဖျါ၀ဲအသိးန့ၣ် ပယီၤသုးတကပၤ ဘၣ်ဒိဘၣ်ထံးသံအိၣ်၀ဲ ၄ ဂၤ ဘၣ်ဆၣ် ခ့ၣ်အဲးစံၣ် ကပာ်ဂၢၢ်ပာ်ကျၢၤအီၤလီၤလီၤဆီဆီတအိၣ်၀ဲဒံးဘၣ်ႉ လၢတၢ်ကဲထီၣ်သးအံၤအဖီခိၣ် ခ့ၣ်အဲးစံၣ် ဆဲးကျိးသံကွၢ်၀ဲဒၣ်ဒီး ပယီၤသုးတကပၤတန့ၢ်၀ဲဘၣ်အသိး လၢပယီၤသုးမုၢ်ဒိၣ်တၢ်ဒီသဒၢပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်အ (website) အပူၤစ့ၢ်ကီး ထုးထီၣ်ပာ်ဖျါ၀ဲတအိၣ်ဒံးဘၣ်န့ၣ်လီၤႉ

KNU ဒီး ပဒိၣ်အဘၢၣ်စၢၤ ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)ၦဲၤထီၣ်၀ဲ ၅ နံၣ်အတီၢ်ပူၤ ပယီၤသုး ဒီး KNLA သုးဖိတဖၣ်အဘၢၣ်စၢၤ တယံၤတမီၢ်တၢ်ခးလိာ်သးကဲထီၣ်၀ဲဒီး စံး၀ဲခီဖျိလၢဟးတလၢတၢ်လီၢ်လၢတၢ်ပာ်ပနီၣ်၀ဲအဃိဒီး မ့မ့ၢ် KNU သုးက့(၅)ဟီၣ်က၀ီၤအပူၤ တၢ်ခးလိာ်သးကဲထီၣ်အါကတၢၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိး သုးတၢ်ဟူးတၢ်ဂဲၤလၢအမၤဟးဂီၤ၀ဲဒၣ်တၢ်နာ်န့ၢ်လိာ်သးတဖၣ်ႇ ဒူသ၀ီလီၢ််က၀ီၤတဖၣ်အပူၤ ဟဲဆီလီၤ၀ဲသုးကလၢၤအသီဒီးသူၣ်ထီၣ်၀ဲသုးကလၢၤဂၢၢ်ဂၢၢ်ကျၢၤကျၢၤဒီး မၤအါထီၣ်၀ဲသုးဂံၢ်ဘါတဖၣ်အံၤ ဖဲတနံၣ်အံၤနံၣ်လၢာ်န့ၣ် ကထုးကွံာ်အီၤလၢအ၀ံၤတဘျီဃီအဂီၢ် KNLA လီၢ်ခၢၣ်သး၀ဲၤလီၢ်ခိၣ်သ့ၣ်အံၤ ဖဲလါဒံၣ်စ့ဘၢၣ်ထီၣ် ၁ သီအနံၤန့ၣ် ထုးထီၣ်ဘိးဘၣ်ရၤလီၤ၀ဲလံာ်တဘ့ၣ်န့ၣ်လီၤႉ