သုးမုၢ်ဒိၣ်တၢ်ထီၣ်ဒုးတဖၣ်အဖီခိၣ် ထံဂုၤကီၢ်ဂၤကဟ့ၣ်ဂ့ၢ်ဂီၢ်အူ တၢ်ဆီၣ်သနံးအဂီၢ် KPSN ဆီၣ်တခူထီၣ်၀ဲ

လါယနူၤအါရံၤ ၁၉ သီႇ ၂၀၂၁ နံၣ် စးအဲၣ်ဆူ

ကညီကီၢ်စဲၣ်ႇ ဖၣ်ပူၣ်ဟီၣ်က၀ီၤ ဒီး ပကိကီၢ်ခီ ချၢၣ်လွံၢ်ထူၣ်ဟီၣ်က၀ီၤတဖၣ်အပူၤ တကီၢ်ခါတၢ်ကဲထီၣ်သးလၢ ပယီၤသုးမုၢ်ဒိၣ်ခးလီၤကျိဖးဒိၣ်ဆူကမျၢၢ်အအိၣ်တဖၣ်အံၤ ထံဂုၤကီၢ်ဂၤကဟ့ၣ်ဂ့ၢ်ဂီၢ်အူ တၢ်ဆီၣ်သနံးအဂီၢ် ကညီတၢ်မၤစၢၤဆီၣ်ထွဲတၢ်မုာ်တၢ်ခုၣ်ၦာ်ဘျးစဲ -KPSN အံၤ ဖဲလါယနူၤအါရံၤ ၁၈ သီအနံၤန့ၣ် ထုးထီၣ်၀ဲလံာ်တၢ်ပာ်ဖျါဒီးဆီၣ်တခူထီၣ်၀ဲန့ၣ်လီၤႉ

ခီဖျိလၢပယီၤသုးမုၢ်ဒိၣ်ခးလီၤ၀ဲကျိဖးဒိၣ်အဃိ လီၢ်က၀ီၤဒူဖိသ၀ီဖိတဖၣ် တၢ်ဘၣ်ဒိဘၣ်ထံးဘၣ်သံ ဟဲအိၣ်ထီၣ်၀ဲအသိး လီၢ်က၀ီၤဖိလၢကထိဘၣ်စံၣ်မှံဟးဖျိး၀ဲဒၣ်အံၤန့ၣ် မ့ၢ်ဒၣ်တၢ်ခီပတာ်၀ဲဒၣ်ဟီၣ်ခိၣ်ဒီ ဘ့ၣ်တၢ်ဘျၢသဲစးဒီး အလီၢ်အိၣ်လၢဟီၣ်ခိၣ်ဒီဘ့ၣ်ကနုာ်လီၤဟ့ၣ်တၢ်ဆီၣ်သနံးအဂီၢ်လိၣ်၀ဲအဂ့ၢ်န့ၣ် KPSN စံး၀ဲန့ၣ်လီၤႉ

KPSN ၦၤကတိၤတၢ်ပၢ နီၢ်၀ါခုၣ်ရှံ စံး၀ဲ “ခဲအံၤ ပယီၤသုးမၤ၀ဲတၢ်ထီၣ်ဒုးအံၤ ထီဘိန့ၣ်(target)၀ဲဒၣ်ၦၤ ထံဖိကီၢ်ဖိကမျၢၢ်တဖၣ်လီၤႉ တၢ်လီၢ်လၢလီၢ်က၀ီၤဖိမၤအီၣ်မၤအီအလီၢ်တဖၣ်အပူၤန့ၣ် ပယီၤသုးခးလီၤ၀ဲဒၣ်ကျိ ဖးဒိၣ်အံၤ မၤဟးဂီၤ၀ဲဒၣ်ထံကီၢ်ဒီဘ့ၣ်တၢ်သိၣ်တၢ်သီလီၤမီၤနီၤႉ လၢကလဲၤဟ့ၣ်ၦၤလီၢ်အိၣ်ကမှံဖိတဖၣ် တၢ်ဆီၣ်ထွဲမၤစၢၤအဂီၢ် သုးမုၢ်ဒိၣ်အံၤကးတံၢ်တြီ၀ဲကျဲအံၤစ့ၢ်ကီး မၤဟးဂီၤ၀ဲဒၣ်ထံကီၢ်ဒီဘ့ၣ်တၢ်သိၣ်တၢ်သီလီၤႉ တၢ်အဃိန့ၣ် လီၤဆီဒၣ်တၢ် UN တၢ်ဘံၣ်တၢ်ဘၢကီၣ်ကးအံၤ အ၀ဲသ့ၣ်အမူဒါအိၣ်လၢကဘၣ်ဟ့ၣ်တၢ်ဆီၣ် သနံးဆူ ကီၢ်ပယီၤပဒိၣ်ဒီးသုးမုၢ်ဒိၣ်အအိၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိလၢပယီၤသုးခးလီၤကျိဖးဒိၣ်အဃိ လီၢ်က၀ီၤသ၀ီသးၦၢ်တဂၤဘၣ်ဒိဘၣ်ထံးသံ၀ဲဒၣ်ဒီးႇ ဖိသၣ်(၁၁) နံၣ်တဂၤ ဘၣ်ဒိဘၣ်ထံး၀ဲနးနးကလဲာ်အမဲာ်ညါ လီၢ်က၀ီၤဖိ(၃ႇ၇၀၀)ဘျဲၣ် ဘၣ်ပာ်တ့ၢ်ကွံာ်အလီၢ်အကျဲဒီး ဘၣ်စံၣ်မှံဟးဖျိး၀ဲအဖီခိၣ် ပဲာ်အၢပဲာ်သီ၀ဲဒိၣ်ဒိၣ်မုၢ်မုၢ်အဂ့ၢ်န့ၣ် KPSN လံာ်တၢ်ပာ်ဖျါအပူၤ စံး၀ဲန့ၣ်လီၤႉ

ဘၣ်ထွဲဒီးသ၀ီသးၦၢ်ဘၣ်ဒိဘၣ်ထံးသံ၀ဲတၢ်ဂ့ၢ်အံၤ ဖဲအပူၤကွံာ် လါယနူၤအါရံၤ ၁၂ သီအနံၤ ခီဖျိလၢ သုးမုၢ်ဒိၣ် မုၢ်ထီၣ်ကလံၤထံး ကီၢ်ခီသုး၀ဲၤလီၢ်ခိၣ်သ့ၣ် နီၣ်ဂံၢ်(၈)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၄၀၄)သုးဖိတဖၣ် ခး၀ဲကျိဖးဒိၣ်အဃိ KNU သုးက့(၅)ဟီၣ်က၀ီၤ ဒွဲၣ်လိကီၢ်ဆၣ်ႇ မဲခၠိၤသ၀ီကရူၢ် စီၤသးဆၢ(၃၅)နံၣ်အံၤ ဘၣ်၀ဲဒီးကျိဖးဒိၣ်အဃိသံ၀ဲန့ၣ်လီၤႉ

ဒ်န့ၣ်အသိး ဘၣ်ထွဲဒီးဖိသၣ်(၁၁)နံၣ် ဘၣ်ဒိဘၣ်ထံးတၢ်ဂ့ၢ်အံၤစ့ၢ်ကီး သုးမုၢ်ဒိၣ်တကပၤထုးထီၣ်ပာ်ဖျါ၀ဲလၢ မ့ၢ်၀ဲဒၣ် KNLA တကပၤခး၀ဲဒၣ်လီၤဒီး မ့မ့ၢ်လၢ KNLA ထုးထီၣ်ပာ်ဖျါ၀ဲအသိးန့ၣ် ခီဖျိလၢပယီၤသုးဟးခးနါစိၤကျိဖးဒိၣ်အဃိ ဖိသၣ်ဘၣ်ဒိဘၣ်ထံး၀ဲဒၣ်န့ၣ်လီၤႉ

လၢန့ၣ်အမဲာ်ညါ KPSN လံာ်တၢ်ပာ်ဖျါအပူၤပာ်ဖျါ၀ဲလၢ လီၢ်က၀ီၤသ၀ီဖိတဖၣ်ဒ်သိးကက့ၤ ကဒါလၢနီၢ်ကစၢ်အလီၢ်အကျဲကန့ၢ်အဂီၢ် သုးမုၢ်ဒိၣ်အံၤကဘၣ်ထုးကွံာ််အသုးကလၢၤတဖၣ်ဒီး ကဘၣ်ပတုာ်ကွံာ်တၢ်ထီၣ်ဒုး၀ဲကလုာ်ဒူၣ်တဖၣ်ဒီး တၢ်မုာ်တၢ်ခုၣ်ပာ်ဖှိၣ်ကျိၣ်စ့တၢ်ဆီၣ်ထွဲမၤစၢၤကရူၢ်ဃုာ်ဒီး ထံဂုၤကီၢ်ဂၤၦၤမၤစၢၤတၢ်ဖိတဖၣ်လၢအမၤစၢၤ၀ဲဒၣ် ကီၢ်ပယီၤတၢ်မုာ်တၢ်ခုၣ်တၢ်မၤအကျဲတဖၣ်အံၤစ့ၢ်ကီး အလီၢ်အိၣ်လၢကဘၣ်ပတုာ်ကွံာ်တၢ်ဆီၣ်ထွဲမၤစၢၤတဖၣ်အဂ့ၢ်န့ၣ် KPSN စံး၀ဲန့ၣ်လီၤႉ

စးထီၣ်ဖဲအပူၤကွံာ် လါဒံၣ်စ့ဘၢၣ်ထီၣ်သီန့ၣ် KNU- ကညီဒီကလုာ်စၢဖှိၣ်ကရၢ သုးက့(၅)ဟီၣ်က၀ီၤႇ မုၢ်တြီၢ်(ဖၣ်ပူၣ်)ကီၢ်ရ့ၣ်ႇ ဒွဲၣ်လိကီၢ်ဆၣ်ႇ မဲၤ၀့ၤဟီၣ်က၀ီၤအပူၤန့ၣ် ပယီၤသုးမုၢ်ဒိၣ် ဒီး KNLA ဖၣ်အဘၢၣ်စၢၤ တၢ်ဒုးစးထီၣ်ကဲထီၣ်၀ဲဒၣ်ဒီး လီၢ်က၀ီၤသ၀ီဖိလၢအကထိဘၣ်စံၣ်မှံဟးဖျိး၀ဲဒၣ်န့ၣ်လီၤႉ

ဒ်န့ၣ်အသိး KNU သုးက့(၃)ဟီၣ်က၀ီၤႇ ချၢၣ်လွံၢ်ထူၣ်ကီၢ်ရ့ၣ်ဒီး သုးက့(၁)ဟီၣ်က၀ီၤႇ ဒူသထူၣ်ကီၢ်ရ့ၣ်တဖၣ် အပူၤစ့ၢ်ကီး ခီဖျိလၢတၢ်ခးလိာ်သးကဲထီၣ်၀ဲဒၣ်အဃိ လီၢ်က၀ီၤဖိလၢအကထိဘၣ်စံၣ်မှံဟးဖျိး၀ဲဒၣ်ဒီး တၢ်သိၣ်လိကၠိတဖၣ်စ့ၢ်ကီးတၢ်ဘၣ်ကးတံၢ်ဃာ်တစိၢ်တလီၢ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ