Home တၢ်ကစီၣ် သုးဟံးန့ၢ်ဆူၣ်တၢ်စိတၢ်ကမီၤအံၤ လ့ၤတက့ၤတတူၢ်လိာ်ဘၣ်ဒီး ကခီၣ်ဆၢထီဒါ၀ဲဒူဒူအဂီၢ် KNU Concerned Group ဆီၣ်တခူထီၣ်၀ဲ

သုးဟံးန့ၢ်ဆူၣ်တၢ်စိတၢ်ကမီၤအံၤ လ့ၤတက့ၤတတူၢ်လိာ်ဘၣ်ဒီး ကခီၣ်ဆၢထီဒါ၀ဲဒူဒူအဂီၢ် KNU Concerned Group ဆီၣ်တခူထီၣ်၀ဲ

907
0

လါဖ့ၤဘြူၤအါရံၤ ၄ သီႇ ၂၀၂၁ နံၣ်ႇ ခ့ၣ်အဲးစံၣ်

ပယီၤသုးမုၢ်ဒိၣ်ဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤအံၤအဖီခိၣ် ထံဖိကီၢ်ဖိကမျၢၢ်တဖၣ် လ့ၤတက့ၤတဘၣ်တူၢ်လိာ်ဘၣ်ဒီး ကထီဒါခီၣ်ဆၢကဒါအဂီၢ် ဖဲလါဖ့ၤဘြူၤအါရံၤ ၃ သီအနံၤ KNU Concerned Group ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါတဘ့ၣ်ဒီး ဆီၣ်တခူထီၣ်၀ဲန့ၣ်လီၤႉ

လံာ်တၢ်ပာ်ဖျါပူၤ ၦၤကတိၤတၢ်ပၢ သုးခိၣ်ကျၢၢ်ဖိ စီၤနၢၤဒါမၠး စံး၀ဲလၢ “ကီၢ်ပယီၤပဒိၣ်အတၢ်ဃုထၢအံၤ တတီတလိၤဘၣ်ႇမ့ၢ်၀ဲတၢ်လံၣ်တၢ်လီလီၤန့ၣ် တမ့ၢ်၀ဲဒၣ်ဘၣ်ႉ တၢ်အံၤ မ့ၢ်၀ဲဒၣ်ပယီၤသုး မုၢ်ဒိၣ်အဲၣ်ဒိးဟံးဆူၣ်န့ၢ်တၢ်စိတၢ်ကမီၤလီၤဒီး တအဲၣ်ဒိးဟ့ၣ်တၢ်စိတၢ်ကမီၤလၢထံဖိကီၢ်ဖိကမျၢၢ်အအိၣ် ဘၣ်လီၤႉ တၢ်သ့ၣ်တဖၣ်အံၤ ပကဘၣ်ဟ့ၣ်ဖှိၣ်သကိးတၢ်ဆီၣ်သနံးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢ KNU Concerned Group လံာ်တၢ်ပာ်ဖျါအပူၤန့ၣ် ပယီၤသုးမုၢ်ဒိၣ်ဟံးန့ၢ်ကွံာ်တၢ်စိတၢ်ကမီၤအံၤ ခီဖျိလၢ၂၀၂၀ နံၣ်ႇလါနိၣ်၀့ဘၢၣ် ၈ သီအနံၤ တၢ်မၤ၀ဲတၢ်ဃုထၢဖးဒိၣ်အစၢအဖီခိၣ် မ့ၢ်ပယီၤသုးမုၢ်ဒိၣ်ဟံးန့ၢ်ဆူၣ်ကွံာ် NLD ပၣ်တံၣ်လၢအမၤနၢၤတၢ် ထံရူၢ်ကီၢ်သဲးတၢ်စိတၢ်ကမီၤလီၤအဃိ ထီဒါ၀ဲတဲာ်တဲာ်ဖျုဖျုလီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ သုးမုၢ်ဒိၣ်ဟံးန့ၢ်ကွံာ်တၢ်စိတၢ်ကမီၤဒ်အံၤဒီးဒုးအိၣ်ထီၣ်၀ဲ တၢ်ပၢတၢ်ပြးတၢ်ဖံးတၢ်မၤတဖၣ်အံၤန့ၣ် ပ၀ဲ KNU Concerned Group အံၤ လ့ၤတက့ၤတတူၢ်လိာ်၀ဲဘၣ်အဂ့ၢ်ႇ လၢကညီတၢ်ပၢၢ်ဆၢဟီၣ်က၀ီၤအပူၤ ဒ်ပခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢပာ်လီၤ၀ဲကီၢ်သူလ့ၤတၢ်ပၢတၢ်ပြးအကျဲသနူအသိး ပကဟံးထီၣ်ဖီၣ်ထီၣ်ပၢၤဃာ်ဒီသဒၢ၀ဲလီၤအဂ့ၢ်န့ၣ် စံး၀ဲန့ၣ်လီၤႉ

လၢတၢ်န့ၣ်အဃိ ကညီဖီၣ်စုက၀ဲၤကရူၢ်တဖၣ်လၢအမ့ၢ် DKBA, KNU/KNLA-PC/ BGF တဖၣ်အံၤစ့ၢ်ကီး ကပာ်ဖှိၣ်ထီၣ်သးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA ဒီး ကဒီသဒၢ၀ဲကညီဒီကလုာ်ဃုာ်ဒီး ကလုာ်ဒူၣ်ထံဖိကီၢ်ဖိကမျၢၢ်တဖၣ်အဂီၢ်န့ၣ်လီၤႉ သုးပဒိၣ်လၢအဟံးဆူၣ်ကွံာ်တၢ်စိတၢ်ကမီၤအံၤစ့ၢ်ကီး ဒ်သိးထံဂုၤကီၢ်ဂၤတဖၣ်တသ့ၣ်ညါပာ်ပနီၣ်၀ဲတဂ့ၤအဂီၢ် ဆီၣ်တခူထီၣ်၀ဲသၦၢ်ၦၢ်အဂ့ၢ်န့ၣ် KNU Concerned Group လံာ်တၢ်ပာ်ဖျါအပူၤ ပၣ်ဃုာ်၀ဲန့ၣ်လီၤႉ

သုးပဒိၣ်ဟံးဆူၣ်ကွံာ်ထံကီၢ်တၢ်စိတၢ်ကမီၤအဖီခိၣ် ဖီၣ်စုက၀ဲၤတၢ်ကရၢကရိလၢအဆဲးလီၤ၀ဲ(NCA)လံာ်ဃံးဃာ်တဖၣ်ဃုာ်ဒီး ကၠိဖိသးစၢ်ဒီးတၢ်ဘူၣ်တၢ်ဘါတၢ်ကရၢကရိတဖၣ်ႇ ကီၢ်ပယီၤထံဖိကီၢ်ဖိလၢအတုၤအိၣ်လၢယပၣ်ကီၢ်တဖၣ် ထီဒါ၀ဲတဲာ်တဲာ်ဖျုဖျုန့ၣ်လီၤႉ လၢထံဂုၤကီၢ်ဂၤထံကီၢ်စ့ၢ်ကီး ထီဒါ၀ဲတဲာ်တဲာ်ဖျုဖျုဒီး ဃ့ထီၣ်၀ဲဒ်သိးတၢ်ကပျၢ်လီၤက့ၤၦၤလၢတၢ်ဖီၣ်ဃာ်၀ဲတဖၣ်န့ၣ်လီၤႉ

KNU Concerned Group အံၤ ဘၣ်တၢ်ဒုးအိၣ်ထီၣ်အီၤလၢ ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤလီၢ်လံၤ=၂ နီၢ်စံၤဖိရၤစ့ၤ ဃုာ်ဒီးခ့ၣ်အဲၣ်ယူၣ်ခိၣ်တနီၤ ဖဲ ၂၀၁၇ နံၣ်န့ၣ်လီၤႉ