Home တၢ်ကစီၣ် KPSN ဃ့ထီၣ်၀ဲ EAO တဖၣ် လၢကထီဒါမီၤစိရိၤပဒိၣ်ဒီး တဘၣ်မၤတၢ်တၢၣ်ပီၣ်တဲသကိးတၢ်မုာ်တၢ်ခုၣ်ဘၣ်

KPSN ဃ့ထီၣ်၀ဲ EAO တဖၣ် လၢကထီဒါမီၤစိရိၤပဒိၣ်ဒီး တဘၣ်မၤတၢ်တၢၣ်ပီၣ်တဲသကိးတၢ်မုာ်တၢ်ခုၣ်ဘၣ်

510
0
Photo: NCA_EAOs

လါဖ့ၤဘြူၤအါရံၤ ၈ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤ(လါဖ့ၤဘြူၤအါရံၤ ၈)သီအနံၤ ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ-KPSN ထုးထီၣ်ပာ်ဖျါဃ့ထီၣ်၀ဲ ကလုာ်ဒူၣ်ဖီၣ်စုက၀ဲၤတၢ်ကရၢကရိ(EAOs)တဖၣ်လၢ တကီၢ်ခါတၢ်ဒုးအိၣ်ထီၣ်၀ဲသုးပဒိၣ်အသီအံၤ တဘၣ်ပာ်ပနီၣ်အီၤလၢအဖိးသဲစးဘၣ်ဒီး တဘၣ်မၤတၢ်တၢၣ်ပီၣ်တၢ်မုာ်တၢ်ခုၣ်တဖၣ်ဘၣ်အဂ့ၢ်န့ၣ် ဃ့ထီၣ်န့ၣ်လီၤႉ

တဘၣ်ပာ်ပနီၣ်သုးမီၤစိရိၤအသီလၢအဖိးသဲစးဘၣ်ဒီး ဖဲလါဖ့ၤဘြူၤအါရံၤ ၁ သီ တၢ်ကဲထီၣ်သးလၢ သုးဟံးဆူၣ်တၢ်စိတၢ်ကမီၤအံၤ ဒ်သိးကလုာ်ဒူၣ် ကမျၢၢ်ႇ ၦၤဂ့ၢ်၀ီတၢ်ကရၢကရိတဖၣ် ကပာ်ဖှိၣ်ပဲာ်အၢပဲာ်သီ၀ဲအဂီၢ်ဃ့ထီၣ်၀ဲဒီး အလီၢ်အိၣ်လၢကပာ်ပနီၣ်၀ဲ တကီၢ်ခါတၢ်မုာ်တၢ်ခုၣ်တၢ်မၤအကျဲကတၢၢ်ကွံာ်လံအံၤအဂ့ၢ်န့ၣ် KPSN စံး၀ဲန့ၣ်လီၤႉ

“တမ့ၢ်လၢကဒိးန့ၢ်ဘၣ်တၢ်မုာ်တၢ်ခုၣ်ဒီးသုးမီၤစိရိၤလၢအဟံးဆူၣ်ကွံာ်တၢ်စိတၢ်ကမီၤအံၤဘၣ်အသိးႇ အ၀ဲသ့ၣ်န့ၣ်တၢ်အၢၣ်လီၤအီလီၤလၢအ၀ဲသ့ၣ်ကစၢ်ဒၣ်၀ဲဆဲးလီၤ၀ဲတဖၣ် မ့ၢ်အိၣ်၀ဲဒ်လဲၣ်ဒ်လဲၣ်ဂ့ၤ လၢကလုာ်ဒူၣ်ကမျၢၢ်တဖၣ်အဖီခိၣ်န့ၣ် ကဆဲးမၤ၀ဲတၢ်ထီၣ်ဒုးလီၤႉ တၢ်တၢၣ်ပီၣ်တဲသကိးတၢ်မုာ်တၢ်ခုၣ်လၢတၢ်ကဆဲးမၤ၀ဲတခါလၢ်လၢ်ဂ့ၤန့ၣ် ကဘၣ်ပတုာ်ကွံာ်၀ဲတဘျီဃီလီၤ” အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ လၢကလုာ်ဒူၣ်တၢ်ကရၢကရိတဖၣ်အဘၢၣ်စၢၤ ကဒုးအိၣ်ထီၣ်သိၣ်မှံၤသုးပာ်ဖှိၣ်တခါဒီး ကကွၢ်ဆၢၣ်မဲာ်ထီဒါက့ၤမီၤစိရိၤအသီအဂီၢ်ဒီးႇ လၢပနီၢ်ကစၢ်ဒၣ်၀ဲဟီၣ်က၀ီၤပူၤ ကဟ့ၣ်တၢ်မၤစၢၤဒီးတၢ်ဘံၣ်တၢ်ဘၢလၢ ၦၤဟူးဂဲၤတၢ်ဖိတဖၣ်လၢအသဂၢၢ်ဘၣ်ဒီးတၢ်ကီတၢ်ခဲတဖၣ်ဒီး ၦၤမၤတၢ်ကစီၣ်ဖိတဖၣ်အဂ့ၢ်န့ၣ် KPSN ဆီၣ်တခူထီၣ်၀ဲန့ၣ်လီၤႉ

လၢန့ၣ်အမဲာ်ညါ ကီၢ်ပယီၤတၢ်မုာ်တၢ်ခုၣ်တၢ်မၤအကျဲအဂီၢ် EAO အံၤကဃ့ထီၣ်၀ဲ ဒ်သိးထံဂုၤကီၢ်ဂၤၦၤဟ့ၣ်မၤဘူၣ်လီၤတၢ်ဖိလၢအနုာ်လီၤဆီၣ်ထွဲမၤစၢၤတၢ်တဖၣ်အံၤ ကပတုာ်ကွံာ်တၢ်ထၢနုာ်လီၤစ့မၤဘူၣ်လၢတၢ်မုာ်တၢ်ခုၣ်အပူၤတဖၣ်ဒီး လၢအ၀ဲန့ၣ်အခၢၣ်သး ဟ့ၣ်မၤစၢၤက့ၤလၢတကီၢ်ခါၦၤဃ့ၢ်မှံဟးဖျိးတဖၣ်ဒီး ကမၤသကိးတၢ်ဒီးကရၢသဘျ့တၢ်ကရၢကရိတဖၣ် အဂီၢ်န့ၣ် ဆဲးဆီၣ်တခူထီၣ်၀ဲန့ၣ်လီၤႉ

KNU- ကညီဒီကလုာ်စၢဖှိၣ်ကရၢ ဒီး တၢ်က့ၤသူၣ်ထီၣ်က့ၤယိၤဒိၣ်ကီၢ်ကီၣ်ကး-RCSS/SSA ကရူၢ်လၢ အဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး NCA အံၤ ဖဲအပူၤကွံာ် လါဖ့ၤဘြူၤအါရံၤ ၂ သီအနံၤစ့ၢ်ကီး ဘၣ်ထွဲဒီးတကီၢ်ခါသုးဟံးဆူၣ်ကွံာ်တၢ်စိတၢ်ကမီၤအဖီခိၣ် တတူၢ်လိာ်၀ဲဘၣ်အဂ့ၢ် ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်သးတဖၣ်န့ၣ်လီၤႉ