ခီဖျိပယီၤသုးမီၤစိရိၤအသုးခးလီၤကျိဖးဒိၣ်လၢသ၀ီပူၤအဃိ သ၀ီဖိသံတဂၤႇ ခ့ၣ်အဲၣ်ယူၣ်ဟီၣ်က၀ီၤအပူၤ ကညီၦၤဃ့ၢ်မှံဟးဖျိးခဲလၢာ်အိၣ် ၃၀ႇ၀၀၀ ဘျဲၣ်လံ

လါအ့ဖြ့ၣ် ၉ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ(လါအ့ဖြ့ၣ် ၈)သီအနံၤ ပယီၤသုးမီၤစိရိၤအသုးကလၢၤလၢအအိၣ်ဆီလီၤသးဖဲမုုၢ်တြီၢ်(ဖၣ်ပူၣ်)ကီၢ်ရ့ၣ် ပီၢ်ဃ့ခိၣ်တၢ်လီၢ်အံၤ ခီဖျိခးလီၤကျိဖးဒိၣ်လၢဒူသ၀ီပူၤအဃိ သ၀ီဖိသံ၀ဲတဂၤဒီးဟံၣ်ဃီတဖၣ်ဟးဂီၤကွံ၁်၀ဲ အဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါတၢ်ကစီၣ်န့ၣ်လီၤႉ

ဖဲလါအ့ဖြ့ၣ် ၈ သီ ဟါခီ ၁၈း၃၅ မံးနံးအဆၢကတီၢ် ပယီၤသုးမီၤစိရိၤအသုးကလၢၤလၢအအိၣ်ဆီလီၤသးဖဲပီၢ်ဃ့ခိၣ်အံၤ ခီဖျိခးလီၤကျိဖးဒိၣ်ဆူယဲမုၢ်ပျီသ၀ီပူၤ ၃ ဖျၢၣ်ႇတဲဘိပျီသ၀ီပူၤ ၄ ဖျၢၣ် ဒီး စီၤမုၢ်ပျီသ၀ီပူၤ ၅ ဖျၢၣ် ခဲလၢာ် ၁၂ ဖျၢၣ်အဃိ ဘၣ်၀ဲဒၣ်လူၢ်သီကီၢ်ဆၣ် ယဲမုၢ်ပျီကရူၢ် မ့ၤဖှဲထၣ်သ၀ီဖိ စီၤကံၣ်ဘု ၆၀ နံၣ် ဒီးသံ၀ဲအဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ဖဲမဟါ(လါအ့ဖြ့ၣ် ၈ သီ)အနံၤ ခီဖျိပယီၤသုးမီၤစိရိၤအသုးဟဲဆှၣ်တၢ်လၢ ခ့ၣ်အဲၣ်ယူၣ် သုးက့ ၅ သုး၀ဲၤလီၢ်ခိၣ်သ့ၣ်အကပၤ ဒ့ၣ်ပူၤနိၣ်သ၀ီပူၤအိၣ်၀ဲခံဘျီအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ကကွံာ်လီၤကဒီးမ့ၣ်ပိၢ်အဂ့ၢ်န့ၣ် သ့ၣ်ညါဘၣ်လၢၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ

စးထီၣ်ဖဲလါမးရှး ၂၇ သီ တုၤလၢ လါအ့ဖြ့ၣ် ၈ သီအနံၤန့ၣ် ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဒီးခးလီၤကျိဖးဒိၣ်အဃိ လီၢ်က၀ီၤသ၀ီဖိသံ၀ဲ ၂၀ ဂၤဒီး ဘၣ်ဒိ၀ဲ ၂၇ ဂၤအဂ့ၢ်န့ၣ် သ့ၣ်ညါဘၣ်လၢ ကညီခိၣ်ဃၢၤန့ဆၢၣ်ဒီးၦၤဟူး ဂဲၤၦၤဂ့ၢ်၀ီၦာ်ဘျးစဲ(KESAN)အတၢ်မၤနီၣ်မၤဃါအပူၤန့ၣ်လီၤႉ

တကီၢ်ခါဆၢကတီၢ်ခဲအံၤ မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ ပယီၤသုးမီၤစိရိၤအသုးရ့ၣ်ပာ်ဖှိၣ်ခဲလၢာ်အိၣ်၀ဲ(၂၆)ရ့ၣ်ဒီး မၤအါထီၣ်သုးတၢ်ဟူးတၢ်ဂဲၤန့ၣ်လီၤႉ လၢန့ၣ်အမဲာ်ညါ ခီဖျိခးလီၤ၀ဲကျိဖးဒိၣ်လၢဒူသ၀ီပူၤဒီးဟးကွံာ်လီၤမ့ၣ်ပိၢ်ဒီးကဘီယူၤအဃိ လီၢ်က၀ီၤသ၀ီဖိ(၂၀ႇ၀၀၀)ဘျဲၣ် ဘၣ်ပာ်တ့ၢ်ကွံာ်အဟံၣ်အဃီတၢ်လီၢ်တၢ်ကျဲဘၣ်ဟးဃ့ၢ်အိၣ်ခူသူၣ်အဂ့ၢ်န့ၣ် ဖဲလါအ့ဖြ့ၣ် ၅ သီအနံၤ Free Burma Ranger(FBR) ထုးထီၣ်ပာ်ဖျါ၀ဲန့ၣ်လီၤႉ

ပယီၤသုးမီၤစိရိၤဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ စးထီၣ်ဖဲလါဖ့ၤဘြူၤအါရံၤ ၁ သီအနံၤန့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ႇတီအူကီၢ်ရ့ၣ်(သုးက့ ၂)ႇချၢၣ်လွံၢ်ထူၣ်ကီၢ်ရ့ၣ်(သုးက့ ၃)ႇဘျံးဒ၀ဲၢ်ကီၢ်ရ့ၣ်(သုးက့ ၄)ႇမုၢ်တြီၢ်ကီၢ်ရ့ၣ်(သုးက့ ၅)ႇဒူပျာ်ယာ်ကီၢ်ရ့ၣ်(သုးက့ ၆) ဒီး ဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤတဖၣ်အပူၤ ခီဖျိပယီၤသုးမီၤစိရိၤအသုးဟူးဂဲၤအါထီၣ်အဃိ ခံခီခံကပၤတၢ်ခးလိာ်သးကဲထီၣ်ခဲလၢာ်အဘျီ ၂၀၀ ဘျဲၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ခီဖျိပယီၤသုးမီၤစိရိၤအသုးခးလီၤကျိဖးဒိၣ်လၢဒူသ၀ီပူၤႇ တၢ်ဖံးအီၣ်မၤအီၣ်လီၢ်ကျဲကိးမုၢ်နံၤဒဲးအဃိ သ၀ီဖိတဖၣ်သံဘၣ်ဒိဘၣ်ထံး၀ဲအမဲာ်ညါ ကၠိႇဟံၣ်ဃီႇတၢ်မၤအီၣ်လီၢ်ကျဲတဖၣ်ဟးဂီၤ၀ဲအါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဒီးခးလီၤကျိဖးဒိၣ်တဖၣ်အဃိ ခ့ၣ်အဲၣ်ယူၣ် ကီၢ်ရ့ၣ်/သုးက့ ၇ ဘ့ၣ်အပူၤ ကညီကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိးပာ်ဖှိၣ်ခဲလၢာ်အိၣ်၀ဲ ၃၀ႇ၀၀၀ ဘျဲၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ