ခီဖျိမီၤစိရိၤအသုးကဘီယူၤဟဲကွံာ်လီၤကဒီးမ့ၣ်ပိၢ်အဃိ မုၢ်တြီၢ် လီၢ်က၀ီၤဖိ ၃၀၀ ဘျဲၣ်ဃ့ၢ်ထီၣ်ဆူကၠီၣ်တဲၣ်ပူၤ

လါအ့ဖြ့ၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါအ့ဖြ့ၣ် ၂၈ သီအနံၤ ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢ ခ့ၣ်အဲၣ်ယူၣ်= ကညီဒီလုာ်စၢဖှိၣ်ကရၢ သုးက့ ၅ ဟီၣ်က၀ီၤပူၤအဃိ လီၢ်က၀ီၤသ၀ီဖိ ၃၀၀ ဘျဲၣ် လဲၤဘၣ်ဃ့ၢ်ထီၣ်၀ဲဆူကီၢ်ကၠီၣ်တဲၣ်တကပၤအဂ့ၢ်န့ၣ် ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ -KPSN ပာ်ဖျါထီၣ်၀ဲဖဲတနံၤအံၤ တၢ်မၤရှဲလဲၦၤကွဲးတၢ်ကစီၣ်ဖိၣ်အမူးလၢ(online)ပူၤ အဆၢကတီၢ်န့ၣ်လီၤႉ

ဖဲ ၂၇ သီ ဂီၤခီအဆၢကတီၢ် စးထီၣ်ဖဲခ့ၣ်အဲၣ်ယူၣ် သုးက့(၅) ထီၣ်ဒုးဟံးန့ၢ်ကွံာ် ပယီၤသုးကလၢၤလၢအအိၣ်ဖဲသီလဲၤထၣ်၀ံၤ တနံၤဃီန့ၣ် သုးကီၣ်ကးအသုးဟဲကွံာ်လီၤမ့ၣ်ပိၢ်ဒီးကဘီယူၤဒီး ဖဲမဟါလါအ့ဖြ့ၣ် ၂၈ သီအနံၤစ့ၢ်ကီးဟဲကွံာ်လီၤကဒီးမ့ၣ်ပိၢ်အဃိ လီၢ်က၀ီၤသ၀ီဖိ ၃၀၀ ဘျဲၣ် ဘၣ်လဲၤဃ့ၢ်ထီၣ်၀ဲဆူကီၢ်ကၠီၣ်တဲၣ်အပူၤဟဲအိၣ်ထီၣ်၀ဲအဂ့ၢ်န့ၣ် ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ -KPSN စံး၀ဲန့ၣ်လီၤႉ

တကီၢ်ခါဆၢကတီၢ်ခဲအံၤ လီၢ်က၀ီၤဒူသ၀ီဖိလၢအဟဲဃ့ၢ်ထီၣ်ဆူကီၢ်ကၠီၣ်တဲၣ်အပူၤတဖၣ် အ၀ဲသ့ၣ်ဒၣ်၀ဲဘၣ်ဟဲစိာ်၀ဲ တၢ်အီၣ်တၢ်အီဒီး ကၠီၣ်တဲၣ်ၦၤဘၣ်မူဘၣ်ဒါတဖၣ်ပာ်အ၀ဲသ့ၣ်ဖဲလဲၣ်အဂ့ၢ်န့ၣ် KPSN ၦၤကတိၤတၢ်ပၢ နီၢ်ကညီဖီ စံးဘၣ် ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ် ဒ်အံၤန့ၣ်လီၤႉ

“ဒ်ပဒိးန့ၢ်ဘၣ်စရီအသိးန့ၣ် ဖဲမဟါမုၢ်နၤခီန့ၣ်ဟဲနုာ်လီၤ၀ဲအဂၤ ၃၀၀ ဘျဲၣ်လီၤႉ တနံၤအံၤၦၤဟဲစံၣ်ကဟဲအါ ထီၣ်ဒံး ခီဖျိလၢၦၤနၢ်ဟူလၢကဘီယူၤကဟဲတကးဘၣ် ၦၤနၢ်ဟူလၢပယီၤသုးသ့ၣ်တဖၣ်ဆှၢ ၦၤဆါအခိၣ်လိၤလၢအံတူၢ်ထၣ်တကပၤအဃိ ၦၤဘၣ်ယိၣ်လၢကဟဲနုာ်လီၤလၢအံတူၢ်ထၣ်အပူၤအဃိန့ၣ်လီၤႉ အ၀ဲသ့ၣ်ဘၣ်လဲၤ၀ံအီၣ်၀ဲအတၢ်အီၣ်တၢ်အီခဲလၢာ်လီၤႉ ခဲအံၤန့ၣ်ၦၤပာ်အ၀ဲသ့ၣ်လၢကျိၤပၤတၢ်လီၢ်အပူၤလီၤႉ ခဲအံၤအ၀ဲသ့ၣ် အိၣ်ပၢၤစၢၤဖဲန့ၣ်အိၣ်ကန့ၢ်ၦဲၤသီလဲၣ်န့ၣ်တသ့ၣ်ညါဘၣ်ႉ အ၀ဲသ့ၣ်လဲၤအိၣ်ဖဲန့ၣ်ကၠီၣ်တဲၣ်သုးဟံးဃာ် တၢ်မၤနီၣ်မၤဃါခဲလၢာ်လီၤႉ ကၠီၣ်တဲၣ်သုးတဟ့ၣ်လီၤတၢ်အီၣ်နီတမံၤဒံးဘၣ်” အဂ့ၢ်န့ၣ် နီၢ်ကညီဖီ စံး၀ဲန့ၣ်လီၤႉ

သုးကီၣ်ကးအသုးကဘီယူၤဟဲကွံ၁်လီၤမ့ၣ်ပိၢ်အံၤ အါဒၣ်တက့ၢ်န့ၣ်ကွံာ်လီၤ၀ဲလၢဒူသ၀ီကမျၢၢ်အိၣ််ဆိးအလီၢ် ဒီးသုးကီၣ်ကးအံၤပညိၣ်၀ဲၦၤကမျၢၢ်သ့ၣ်တဖၣ်ဒီးခးလီၤ၀ဲလီၤအဂ့ၢ်န့ၣ် KPSN စံး၀ဲန့ၣ်လီၤႉ

ဘၣ်ထွဲဒီးသုးကီၣ်ကးအကဘီယူၤဟဲကွံာ်လီၤမ့ၣ်ပိၢ်တၢ်ဂ့ၢ်အံၤ သုးက့ (၅) ၦၤကတိၤတၢ်ပၢ သုးခိၣ်ဒိၣ်စိ စီၤကျၢၤ ဒိၣ်စ့ၢ်ကီးစံး၀ဲ “ဟဲခးလီၤကျိဖးဒိၣ်န့ၣ် ဒီတနံၤလီၤမဟါတနံၤန့ၣ်ႉ ဟဲခးလီၤ၀ဲလၢဒါကွ့ မဲၢ်ခါထၣ် အဖီလာ်ဒီးခးလီၤ၀ဲဒၣ်လၢထံကျိနံၤႇ ခးလီၤ၀ဲလၢကစၢၢ်ခိၣ်အပူၤလီၤႉ

ဟဲခးကဒီး၀ဲထံကျိနံၤတၢ်လီၢ်အပူၤန့ၣ် ပၣ်ဃုာ်ဒီးကီၢ်ကၠီၣ်တဲၣ်တကပၤလၢထံကျိနံၤအပူၤတၢ်လီၢ်တဖၣ်န့ၣ်လီၤႉ ခးလီၤ၀ဲမဟါတခီန့ၣ် လၢဒူဖိသ၀ီဖိအိၣ်တၢ်လီၢ်ဒုတအိၣ်ဘၣ်ႉ ဖဲန့ၣ်အိၣ်ဒၣ်ထဲတၢ်သူၣ်တၢ်ဖျးဒဲစှၤဖျၢၣ်လီၤႉ ဒီးတၢ်လီၢ်ဖဲန့ၣ် သုးတဖၣ်တအိၣ်စ့ၢ်ကီးဘၣ်ႉ ခးလီၤ၀ဲအတၢ်ပညိၣ်ဒ်လဲၣ်ခီန့ၣ်ပတသ့ၣ်ညါဘၣ်”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါ စးထီၣ်ဖဲလါမးရှး ၂၇ သီအနံၤ ခီဖျိသုးကီၣ်ကးဟဲကွံာ်လီၤမ့ၣ်ပိၢ်အဃိ တုၤလၢခဲအံၤတစု ခ့ၣ်အဲၣ် ယူၣ် တၢ်ပၢဟီၣ်က၀ီၤ ကီၢ်ရ့ၣ် ၃ ဘ့ၣ်လၢအမ့ၢ် မုၢ်တြီၢ်ကီၢ်ရ့ၣ်ႇချၢၣ်လွံၢ်ထူၣ်ကီၢ်ရ့ၣ်ဒီးဒူသထူၣ်ကီၢ်ရ့ၣ်အပူၤ လီၢ်က၀ီၤဖိဘၣ်ဃ့ၢ်မှံဟးဖျိးအိၣ်၀ဲဒၣ် ၇၀ႇ၀၀၀ ဘျဲၣ်အဂ့ၢ်န့ၣ် KPSN စံး၀ဲန့ၣ်လီၤႉ

ဒ်တၢ်ထၢဖှိၣ်မၤနီၣ်စရီအသိး စးထီၣ်ဖဲလါမးရှး ၂၇ သီ တုၤလၢခဲအံၤတစု ခီဖျိသုးကီၣ်ကးဟဲကွံာ်လီၤမ့ၣ်ပိၢ်အဃိ လီၢ်က၀ီၤကကမျၢၢ်သံအိၣ်၀ဲ ၁၉ ဂၤႇ ဘၣ်ဒိ ၁၆ဂၤႇ ဟံၣ်ဟးဂီၤအိၣ်၀ဲ ၁၁ ဖျၢၣ် ဒီး ကၠိဟးဂီၤကွံာ်၀ဲ ၂ ဖျၢၣ်အဂ့ၢ်န့ၣ် KPSN တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ