Home တၢ်ကစီၣ် ဒ်သိးကဒုးဖျိးထီၣ်ကွံာ်သုးမီၤစိရိၤအဂီၢ် KNU,DKBA ဒီး BGF သုးပာ်ဖှိၣ်ထီၣ်သးလံအံၤ မ့ၢ်တၢ်ကစီၣ်လၢအကမၣ်

ဒ်သိးကဒုးဖျိးထီၣ်ကွံာ်သုးမီၤစိရိၤအဂီၢ် KNU,DKBA ဒီး BGF သုးပာ်ဖှိၣ်ထီၣ်သးလံအံၤ မ့ၢ်တၢ်ကစီၣ်လၢအကမၣ်

1260
0

လါအ့ဖြ့ၣ် ၂၂ သီႇ ၂၀၂၁ နံၣ်ႇ ခ့ၣ်အဲးစံၣ်

ဒ်သိးတၢ်ကဒုးဖျိးထီၣ်ကွံာ်သုးမီၤစိရိၤအဂီၢ် တကီၢ်ခါတၢ်ဂီၤမူတၢ်ကစီၣ်ရၤလီၤသးလၢ KNU˜DKBA ဒီး BGF သုးကရူၢ်တဖၣ်ပာ်ဖှိၣ်ထီၣ်သးလံတၢ်ဂ့ၢ်အံၤ မ့ၢ်တၢ်ဂီၤမူတခါလၢတၢ်ဒိဃာ်အီၤတချုးလၢမီၤစိရိၤ ဟံးန့ၢ်ကွံာ်ထံကီၢ်တၢ်စိတၢ်ကမီၤဒံးဘၣ်အခါလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ဂီၤမူ၀ဲအံၤ တချုးဒံးလၢသုးဟံးန့ၢ်ထံကီၢ်တၢ်စိတၢ်ကမီၤ ဖဲအပူၤကွံာ် ၂၀၂၀ နံၣ်ႇ လါဒံၣ်စ့ဘၢၣ်အတီၢ်ပူၤ ကညီဒီကလုာ်စၢဖှိၣ်ကရၢ -KNU˜ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA ဒီး သုးခိးကီၢ်ဆၢ BGF သုးကရူၢ်တဖၣ် မၤ၀ဲဒၣ်တၢ်အိၣ််ဖှိၣ်တခါဖဲကီးတရံးကီၢ်ဆၣ် မီၣ်လီၣ်အံးကစၢၢ်ခိၣ်တၢ်ဂီၤမူတခါလီၤအဂ့ၢ်န့ၣ် မီၣ်လီၣ် အံးလီၢ်က၀ီၤဖိလၢအထံၣ်တၢ်မၤတၢ်အိၣ်ဖှိၣ်ဒီးအမဲာ်တဂၤ စံး၀ဲန့ၣ်လီၤႉ

“အပူၤကွံာ်န့ၣ် ဘၣ်ထွဲဒီးမီၣ်လီၣ်အံးသ့ၣ်ၦၢ်က၀ီၤတၢ်ဂ့ၢ်ဟဲထံၣ်လိာ်သးအိၣ်လီၤႉ တၢ်ဂီၤမူတခါအံၤ မ့ၢ်၀ဲဒၣ်တၢ်ဂီၤမူလၢအပူၤကွံာ်လီၤႉ ဖဲသုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ တထံၣ်ဘၣ်လၢသုးကရူၢ်ခဲလၢာ်ထံၣ်လိာ်သးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ဂီၤမူ၀ဲအံၤပထံၣ်ဘၣ်လၢ အပူၤကွံာ်သုးခိးကီၢ်ဆၢ -BGF နီၣ်ဂံၢ် ၄ သုးဟီၣ်က၀ီၤခိၣ် ဒီး ၁၀၂၂ သုးရ့ၣ်ခိၣ်လၢအမ့ၢ် သုးခိၣ်ဒိၣ်ဖိ စီၤမိၣ်သိၤႇကညီဒီကလုာ်ဂၢၤသးကရၢ -KNDO သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤနၢၤဒါမၠးႇKDBA သုးခိၣ်စွ့ၤ၀ၣ် ဃုာ်ဒီး KNLA သုးခိၣ်တဂၤ စံးကတိၤလီၤတၢ်တဂၤစုာ်စုာ်ဒီး လၢအ၀ဲသ့ၣ်သုးဖိကဒဲကဒဲတဖၣ်အဘၢၣ်စၢၤ ဖီၣ်လိာ်စုဒိသကိးတၢ်ဂီၤတဖၣ်န့ၣ်လီၤႉ

တကီၢ်ခါတၢ်ကဲထီၣ်သးလၢ ခီဖျိသုးကီၣ်ကးအသုးတဖၣ်ခးမၤလီၤမုၢ်ပြံပြါတၢ်အဃိ ကမျၢၢ်ထံဖိကီၢ်ဖိတဖၣ် ဟ့ၣ်ဂံၢ်ဟ့ၣ်ဘါတူၢ်လိာ်၀ဲဒၣ် ကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်အါထီၣ်အကတီၢ် ပထံၣ်ဘၣ်တၢ်ကစီၣ်တၢ်ဂ့ၢ်တၢ်ကျိၤလၢအဘၣ်ထွဲဒီးကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ် ရၤလီၤအသးလၢ social media)အပူၤအါအါဂီၢ်ဂီၢ်န့ၣ်လီၤႉ