လါအ့ဖြ့ၣ် ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်
ဒီကလုာ်တၢ်ဃူတၢ်ဖိးပဒိၣ်ကရူၢ် (NUG) လၢကီၢ်စၢဖှိၣ်ဘျီၣ်ဒိၣ်ခၢၣ်စးကမံးတံာ်(CRPH)ဒုးအိၣ်ထီၣ်၀ဲအံၤ တတူၢ်လိာ်ဒံးဘၣ်အဂ့ၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA ထုးထီၣ်ဒုးသ့ၣ်ညါပာ်ဖျါ၀ဲ ဖဲတနံၤအံၤ(လါအ့ဖြ့ၣ် ၂၃)သီအနံၤန့ၣ်လီၤႉ
ဖဲလါအ့ဖြ့ၣ် ၂၁ သီအနံၤ တီနီၢ်မုၢ်ထီၣ် ဟီၣ်က၀ီၤအပူၤ သူၣ်က့သးၦၢ်သ၀ီသးၦၢ်တဖၣ်ဃုာ်ဒီး ကညီဒီကလုာ်စၢဖှိၣ်ကရၢ -KNU, တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA ဒီး ကညီကူၣ်သ့ဆဲးလၤ၀ဲၤကျိၤ -KECD တဖၣ် မၤ၀ဲတၢ်တၢၣ်ပီၣ်တဲသကိးတၢ်ကူၣ်ဘၣ်ကူၣ်သ့တၢ်အိၣ်ဖှိၣ်တခါဖဲ DKBA လီၢ်ခၢၣ်သး သုး၀ဲၤလီၢ်ခိၣ်သ့ၣ်တၢ်လီၢ်၀ံၤ ထုးထီၣ်၀ဲတၢ်ပာ်သးတဖၣ်အကျါတထံၣ်လၢအမ့ၢ်“ကတူၢ်လိာ်ဆီၣ်ထွဲ NUG ပဒိၣ်ကရူၢ်”တၢ်ဂ့ၢ်အံၤ KIC ကညီတၢ်ကစီၣ်၀ဲၤလီၢ်ခိၣ်သ့ၣ် ကွဲးဃာ်၀ဲတၢ်ကစီၣ်အိၣ်န့ၣ်လီၤႉ
ဘၣ်ထွဲဒီး KIC ကညီတၢ်ကစီၣ်၀ဲၤလီၢ်ခိၣ်သ့ၣ်ကွဲးတၢ်ကစီၣ်အံၤ အ၀ဲသ့ၣ် တၢ်ကရၢကရိတၢ်ပာ်သးတၢ်ထုးထီၣ်ပာ်ဖျါတအိၣ်ဘၣ်အသိး လ့ၤတက့ၤတတူၢ်လိာ်၀ဲဘၣ်အဂ့ၢ်ႇ လၢတၢ်တၢၣ်ပီၣ်တဲသကိးတၢ်ကူၣ်ဘၣ်ကူၣ်သ့အပူၤ တၢ်တဲသကိးဒၣ်ထဲလၢဟီၣ်က၀ီၤအပူၤ ဘၣ်ထွဲဒီးတၢ်ကူၣ်ဘၣ်ကူၣ်သ့လီၤဒီး တမ့ၢ်တၢ်တၢၣ်ပီၣ်တဲသကိးဘၣ်ထွဲ NUG ဘၣ်အဂ့ၢ်န့ၣ် DKBA က့ၤထုးထီၣ်ဒုးသ့ၣ်ညါကဒါ၀ဲဒၣ်န့ၣ်လီၤႉ
DKBA ၦၤကတိၤတၢ်ပၢ သုးခိၣ်ကျၢၢ်ဖိ စီၤမူခိၣ် စံး၀ဲလၢ“တၢ်ဂ့ၢ်တၢ်ကျိၤတခါအံၤ ပဒိၣ်တဖၣ် တဂၢၢ်တကျၢၤနီဖုဒံးဘၣ်မီၤႉ တဂၢၢ်တကျၢၤနီဖုဒံးဘၣ်အဃိန့ၣ် ပကိးကွၢ်ဒံးလီၤႉ ပကွၢ်ကွၢ်စါအ၀ဲသ့ၣ်အတၢ်ဟူးတၢ်ဂဲၤန့ၣ် မ့ၢ်ကန့ၢ်ဖဲလဲၣ်တဖုဖုလဲၣ်ႉ မ့ၢ်န့ၢ်တဖုဂ့ၤတဖုဂ့ၤန့ၣ် အိၣ်ဒၣ်ပကဘၣ်ဖီၣ်လိာ်ပစုလီၤမီၤႉ တၢ်အဃိန့ၣ် အခဲအံၤတန့ၢ်တၢ်ဆၢတဲာ်နီတဖုဒံးဘၣ် ပဆၢတဲာ်တသ့ဒံးဘၣ်မီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သူၣ်က့သးၦၢ်သ၀ီသးၦၢ်တဖၣ်ဃုာ်ဒီး KNU,DKBA ဒီး KECD ထံၣ်လိာ်တၢၣ်ပီၣ်တဲသကိးတၢ်၀ံၤအ လီၢ်ခံ ထုးထီၣ်လံာ်တၢ်ပာ်ဖျါအပူၤပာ်ဖျါ၀ဲလၢ ကအိၣ်ဆၢထၢၣ်ဒ် KNU ပၢပြးတၢ်လဲၤတရံး သးအကျိၤအကျဲလၢအမ့ၢ်(KECD)တၢ်ကူၣ်ဘၣ်ကူၣ်သ့အကျဲသနူအသိးလီၤဒီး ကယဲၢ်မ့ၢ်သုးကီၣ်ကးတၢ်ပၢတၢ်ပြးခဲလၢာ်န့ၣ် ကထီဒါခီၣ်ဆၢကဒါ၀ဲဒီး လၢခ့ၣ်အဲၣ်ယူၣ် ဒူပျာ်ယာ်ထုးထီၣ်ပာ်ဖျါ တၢ်ထီဒါသုးမီၤစိရိၤသနူ (CDM) တၢ်ဟူးတၢ်ဂဲၤအဖီခိၣ် ဒ်ကဆီၣ်ထွဲတူၢ်လိာ်ဟ့ၣ်တၢ်ဒီသဒၢအသိး ကအိၣ်ဆၢထၢၣ်မၤဖျါထီၣ်အမိၢ်လံၤမိၢ်ၦၢ်လီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ ကပာ်ဖှိၣ်မၤသကိးတၢ်ဒီးကလုာ်ဒူၣ်ထံဖိကီၢ်ဖိကမျၢၢ်လၢ ကဒုးဖျိးထီၣ်ကွံာ်သုးကီၣ်ကး(မီၤစိရိၤသနူ)အသိး ဒ်ခ့ၣ်အဲၣ်ယူၣ်ထံရူၢ်ကီၢ်သဲးအတၢ်တီခိၣ်ရိၣ်မဲအသိး ကမၤဖျါထီၣ်အမိၢ်လံၤမိၢ်ၦၢ်ဂၢၢ်ဂၢၢ်ကျၢၤကျၢၤလီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
တၢ်ထံၣ်လိာ်တၢၣ်ပီၣ်တဲသကိးဘၣ်ထွဲတၢ်ကူၣ်ဘၣ်ကူၣ်သ့တၢ်အိၣ်ဖှိၣ်အပူၤ KNU,DKBA ခိၣ်နၢ်တဖၣ်ႇ တီနီၢ်မုၢ်ထီၣ် ဒူသ၀ီကရူၢ် ဒူသ၀ီသးၦၢ်တဖၣ်ဒီး ၦၤနီၢ်ဂံၢ်(၁၀၀)ဃၣ်ဃၣ်ဟဲထီၣ်၀ဲဒၣ်ဒီး တၢ်အိၣ်ဖှိၣ် အပူၤတၢ်တၢၣ်ပီၣ်တဲသကိးဘၣ်ထွဲကညီတၢ်ကူၣ်ဘၣ်ကူၣ်သ့ ကပာ်ဖှိၣ်မၤသကိးတၢ်ႇ သုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ ဟီၣ်က၀ီၤအပူၤတၢ်ပၢတၢ်ပြးတၢ်အိၣ်သးဒီး တကီၢ်ခါထံရူၢ်ကီၢ်သဲးတၢ်အိၣ်သးတဖၣ်န့ၣ်လီၤႉ
