Home တၢ်ကစီၣ် KNLA သုးရ့ၣ် ၂၄ သုးဂ့ၢ်ခိၣ် သုးခိၣ်စိ မါခိၤလီယံၤ လဲၤပူၤကွံာ်သး

KNLA သုးရ့ၣ် ၂၄ သုးဂ့ၢ်ခိၣ် သုးခိၣ်စိ မါခိၤလီယံၤ လဲၤပူၤကွံာ်သး

1027
0
Photo: KNU

လါအ့ဖြ့ၣ် ၁၂ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရ့ၣ် ၂၄ သုးဂ့ၢ်ခိၣ်(သုး၀ဲၤဒၢးခိၣ်)သုးခိၣ်စိ မါခိၤလီယံၤအံၤ ဖဲတနံၤအံၤ(လါအ့ဖြ့ၣ် ၁၂)သီ ဂီၤခီ ၅ နၣ်ရံၣ်ဘျဲၣ်အဆၢကတီၢ် လဲၤပူၤကွံာ်သးလၢသွံၣ်ထီၣ်တၢ်ဆါအဂ့ၢ်န့ၣ် သ့ၣ်ညါဘၣ်လၢၦၤလၢအိၣ်ဘူးဒီးအီၤအအိၣ်န့ၣ်လီၤႉ

မါခိၤလီယံၤလၢအသးနံၣ်အိၣ်လံ(၆၁)နံၣ်အံၤ ဖဲတဂီၤအံၤဂီၤခီ ၅ နၣ်ရံၣ်ဘျဲၣ်အဆၢကတီၢ် လဲၤပူၤကွံာ်သးလၢသွံၣ်ထီၣ်တၢ်ဆါအဂ့ၢ်န့ၣ် KNLA သုးရ့ၣ်ခိၣ်လၢအအိၣ်ဘူးဒီးအီၤတဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“ဖဲဂီၤခီ ၄ နၣ်ရံၣ်အဆၢကတီၢ် ၦၤဟဲကိးယၤအခါန့ၣ်အသးသမူအိၣ်ဒံးလီၤႉ ပလဲၤဆှၢအီၤလၢတၢ်ဆါဟံၣ်ဒီး သံ၀ဲဖဲ ၅ နၣ်ရံၣ် ၁၀ မံးနံးအဆၢကတီၢ်လီၤႉ ခီဖျိအသွံၣ်ထီၣ်တၢ်ဆါအိၣ်ပာ်စၢၤအဃိ တချုးလၢအသံန့ၣ်မၢသရၣ်မုၣ်မၤကွၢ်ဒီး အသွံၣ်ဖီခိၣ်အိၣ် ၂၂၀ သွံၣ်ဖီလာ်အိၣ် ၁၂၀ အဃိ ဘၣ်ဒီအ၀ဲနါက့ကီၤတန့ၢ်လၢၤဘၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

မါခိၤလီယံၤအံၤအိၣ်ဖျဲၣ်ထီၣ်၀ဲလၢအ့ၣ်ယၣ်၀တံၣ်ကီၢ်ခီဒိၣ်ႇမၠီမၠးကီၢ်ဆၣ်ႇမဒီၣ်ခၠီသ၀ီဒီး ဖဲ ၁၉၇၉ နံၣ်ႇ စးထီၣ်ဖဲအသးနံၣ်ကအိၣ်ဖဲ(၁၈)နံၣ်ဃၣ်ဃၣ်န့ၣ် နုာ်လီၤ၀ဲလၢကညီတၢ်ပၢၢ်ဆၢပူၤဒ်သုးဖိတဂၤအသိးဒီး မ့ၢ်ၦၤတဂၤလၢအပၣ်ဃုာ်လၢတၢ်ဒုးအပူၤအါမးန့ၣ်လီၤႉ လၢတၢ်ပၢၢ်ဆၢအဖီခိၣ် မ့ၢ်ၦၤတဂၤလၢအတၢ်ထံၣ်ထီဒီး လၢသုးဖိသံၣ်ဖိအကျါမ့ၢ်ၦၤတဂၤလၢတၢ်ပာ်ပနီၣ်၀ဲတဂၤစ့ၢ်ကီးန့ၣ်လီၤႉ

KNLA သုးခိၣ်ကျၢၢ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲ“အ၀ဲန့ၣ် လၢထံကီၢ်ဒီးၦၤကလုာ်အဂီၢ်န့ၣ် မ့ၢ်ခိၣ်နၢ်တဂၤလၢအဂုာ်ကျဲးမၤတၢ်လီၤႉ ဖဲ ၁၉၈၃ နံၣ်န့ၣ် အ၀ဲက့ၤလီၤလၢပကိယိမးဒီး တၢ်ဖီၣ်န့ၢ်အီၤႇတၢ်ထၢနုာ်အီၤလၢဃိာ်ပူၤႇ၀ံၤဘျီဟဲက့ၤထီၣ်ကဒါလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ကလဲၤပာ်လီၤအစိၣ်တၢ်ရဲၣ်တၢ်ကျဲၤခီန့ၣ် တၢ်ကမၤ၀ဲဖဲလါအ့ဖြ့ၣ် ၁၄ သီအနံၤဒီး သုးခိၣ်စိ မါခိၤလီယံၤအံၤမ့ၢ်စ့ၢ်ကီးၦၤတဂၤလၢအဟံၣ်ဖိဃီဖိတအိၣ်ဘၣ်ႇမ့ၢ်ၦၤနီၢ်သဘျ့တဂၤန့ၣ်လီၤႉ