Home တၢ်ကစီၣ် တၢ်ဂဲၤလိာ်မၤမူထီၣ်က့ၤ(NCA)ကဟဲလိၣ်ထီၣ်ဖးထီၣ်အဂီၢ်အံၤ မ့ၢ်တၢ်လၢအကွၢ်ကပာ်ကွံာ်ထံရူၢ်ကီၢ်သဲးအတၢ်ဃံးတၢ်စ့ၤနီၢ်နီၢ်အဂ့ၢ်န့ၣ် AKO စံး၀ဲ

တၢ်ဂဲၤလိာ်မၤမူထီၣ်က့ၤ(NCA)ကဟဲလိၣ်ထီၣ်ဖးထီၣ်အဂီၢ်အံၤ မ့ၢ်တၢ်လၢအကွၢ်ကပာ်ကွံာ်ထံရူၢ်ကီၢ်သဲးအတၢ်ဃံးတၢ်စ့ၤနီၢ်နီၢ်အဂ့ၢ်န့ၣ် AKO စံး၀ဲ

961
0

လါမ့ၤ ၁၇ သီႇ ၂၀၂၁ နံၣ်ႇ ခ့ၣ်အဲးစံၣ်

တၢ်ဂဲၤလိာ်မၤမူထီၣ်က့ၤ(NCA)အတၢ်ဟဲလိၣ်ထီၣ်ဖးထီၣ်လၢ ၂၀၀၈ တၢ်ဘျၢသဲစးအဖီလာ်လၢ အတကဲဘျုးဘၣ်အံၤ မ့ၢ်တၢ်လၢအကွၢ်ကပာ်ကွံာ်ထံရူၢ်ကီၢ်သဲး အတၢ်ဃံးတၢ်စ့ၤနီၢ်နီၢ်လၢ ကဲထီၣ်သးလၢခ့ခါခဲအံၤလီၤအဂ့ၢ်န့ၣ် အီးစထြ့လယါ ကညီဒီကလုာ်ကရၢ(Australian Karen Organization-AKO)ထုးထီၣ်၀ဲလံာ်တၢ်ပာ်ဖျါ ဖဲလါမ့ၤ ၁၅ သီအနံၤန့ၣ်လီၤႉ

“ထံဖိကီၢ်ဖိခဲလၢာ်လၢကီၢ်ပယီၤအပူၤ တနံၤဘၣ်တနံၤ အတၢ်အိၣ်မူလၢအတအိၣ်ဒီးတၢ်ဘံၣ်တၢ်ဘၢနီတစဲးဘၣ်ဒီး ဘၣ်ပျံၤဘၣ်ဖုးတၢ်အကတီၢ် တၢ်ဂဲၤလိာ်မၤမူထီၣ် က့ၤ(NCA)အတၢ်ဟဲလိၣ်ထီၣ်ဖးထီၣ်လၢ ၂၀၀၈ တၢ်ဘျၢသဲစးအဖီလာ်လၢအတကဲဘျုးဘၣ်ဒီး ဟးဂီၤတ့ၢ်လံစးထီၣ်လၢသုးမီၤစိရိၤကရူၢ်ဟံးန့ၢ်ဆူၣ်တၢ်စိတၢ်ကမီၤအံၤန့ၣ် မ့ၢ်တၢ်လၢအကွၢ်ကပာ်ကွံာ်ထံရူၢ်ကီၢ်သဲးအတၢ်ဃံးတၢ်စ့ၤနီၢ်နီၢ်လၢကဲထီၣ်သးလၢခ့ခါခဲအံၤလီၤ” အဂ့ၢ်န့ၣ် AKO လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

စးထီၣ်လၢတၢ်ဆဲးလီၤ(NCA)စုပနီၣ်၀ံၤအလီၢ်ခံန့ၣ် ပယီၤသုးမုၢ်ဒိၣ်အံၤလုၢ်သ့ၣ်ခါပတာ်၀ဲဒၣ်(NCA)ဖျိဖျိဖျါဖျါဒီး လၢတၢ်ဟ့ၣ်ထီၣ်တၢ်ဂ့ၢ်တၢ်ပီၢ်လၢတၢ်ကမၤဂ့ၤထီၣ်ထံလီၢ်ကီၢ်ပူၤတၢ်ဂုၤထီၣ်ပသီထီၣ်အပူၤန့ၣ် ဟံးန့ၢ်ဆူၣ်၀ဲဒၣ်ကညီထံဖိကီၢ်ဖိတဖၣ်အဟီၣ်ခိၣ်ကပံာ်ႇ တ့ဂ့ၤအါထီၣ်အသုးကလၢၤအလီၢ်လၢကညီလီၢ်က၀ီၤအပူၤႇ တ့ထီၣ်ကျဲမုၢ်ကျဲဘိလၢကဒိၣ်စိ၀ဲဒၣ်လၢတၢ်ဒုးတၢ်ယၤအဂီၢ်ဒီးမၤဆူၣ်ဒုးအိၣ်ထီၣ်မုၢ်ကျိၤ၀ဲၤကွာ်တၢ်တိၤကျဲၤအဒိၣ်အမုၢ်တဖၣ်အဃိ ဘၣ်သဂၢၢ်ခးလိာ်သးဒီးကညီသုးမုၢ်ဒိၣ်လၢအဘျီတဖၣ်အဘျီဒီး လၢန့ၣ်အမဲာ်ညါ ခီဖျိပယီၤသုးခးလီၤကျိဖးဒိၣ်ဆူကညီဖိတဖၣ်အလီၢ်က၀ီၤပူၤဒီးတ့ၢ်လီၤမ့ၣ်ပိၢ်တဖၣ်အဘျီတဖၣ်အဘျီလၢကဘီယူၤအဃိ လီၢ်က၀ီၤသ၀ီဖိအါအါဂီၢ်ဂီၢ်ဘၣ်လဲၤဃ့ၢ်ထီၣ်ဆူထံဆၢကီၢ်ဆၢအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

သုးမီၤစိရိၤလုၢ်သ့ၣ်ခါပတာ်၀ဲဒၣ်(NCA)အဘျီတဖၣ်အဘျီဘၣ်ဆၣ် KNU ကရၢခိၣ် စီၤမူၤတူစ့ဖိ ကဆဲးလဲၤ၀ဲဒ်(NCA)အသိးဒီး ထံရူၢ်ကီၢ်သဲးတၢ်ဂ့ၢ်ကီအံၤကဃုသကိးအစၢလၢက ထံၣ်လိာ်တၢၣ်ပီၣ်တဲသကိးအံၤန့ၣ် ဖဲလါမ့ၤ ၁၀ သီအနံၤ လံာ်တၢ်ပာ်ဖျါလၢအကစၢ်ဒၣ်၀ဲဆဲးလီၤစုပနီၣ်ထုးထီၣ်ရၤလီၤ၀ဲအံၤ စူးကါဂီၤနါစိၤအလီၢ်အလးဒီး မ့ၢ်ဒၣ်အကစၢ်တဂၤတၢ်ပာ်သးလီၤအဂ့ၢ်န့ၣ် AKO စံး၀ဲန့ၣ်လီၤႉ

လၢတၢ်န့ၣ်အဃိ ဘၣ်ထွဲဒီး ကရၢခိၣ် ဆဲးလီၤစုပနီၣ်ထုးထီၣ်ပာ်ဖျါ၀ဲလံာ်တၢ်ပာ်သးအံၤ ကဘၣ်အိၣ်ဒီးတၢ်ဟံးန့ၢ်မူဒါဒီး မူဒါအိၣ်လၢအတၢ်ဖံးတၢ်မၤအဖီခိၣ်န့ၣ် အ၀ဲကဘၣ် ဃ့ဟးထီၣ်အသးလၢမူဒါအပူၤအဂ့ၢ်ႇ အကစၢ်ဒၣ်၀ဲမ့ၢ်တဃ့ဟးထီၣ်အသးဘၣ်န့ၣ် (KNU)ခိၣ်နၢ်တဖၣ် ကဘၣ်ဆိကတီၢ်ကွံာ်အီၤလၢအမူဒါတၢ်ဖံးတၢ်မၤအပူၤအဂ့ၢ်န့ၣ် AKO ဃ့ထီၣ်၀ဲဒၣ်န့ၣ်လီၤႉ