Home တၢ်ကစီၣ် ပယီၤသုးမီၤစိရိၤစံး၀ဲလၢ တၢ်ဟ့ၣ်သုးတၢ်သိၣ်လိလၢဟီၣ်က၀ီၤပူၤတၢ်ဂ့ၢ် KNU က့ၤခီၣ်ဆၢ

ပယီၤသုးမီၤစိရိၤစံး၀ဲလၢ တၢ်ဟ့ၣ်သုးတၢ်သိၣ်လိလၢဟီၣ်က၀ီၤပူၤတၢ်ဂ့ၢ် KNU က့ၤခီၣ်ဆၢ

3364
0

လါမ့ၤ ၂၁ သီႇ ၂၀၂၁ နံၣ်ႇ ခ့ၣ်အဲးစံၣ်

သုးမီၤစိရိၤဆှၢလံာ်ထီဒါဒီးစံး၀ဲလၢ KNU- ကညီဒီကလုာ်စၢဖှိၣ်ကရၢ သုးက့ ဟီၣ်က၀ီၤ ၃ ဘ့ၣ်အပူၤ KNU ဟ့ၣ်၀ဲ ဒီကလုာ်တၢ်ဃူတၢ်ဖိးပဒိၣ်(NUG)ဃုာ်ဒီး အ၀ဲသ့ၣ်စုဒုၣ်တီၤအဖီလာ်တၢ်ကရၢကရိတဖၣ်သုး တၢ်သိၣ်လိတၢ်ဂ့ၢ်အဖီခိၣ် KNU တကပၤ က့ၤသမၢကဒါ၀ဲန့ၣ်လီၤႉ

ဖဲလါမ့ၤ ၁၈ သီအနံၤ သုးမီၤစိရိၤဆှၢဟ့ၣ်လံာ်ထီဒါတဘ့ၣ်ဒီးစံး၀ဲလၢ KNU သုးက့(၁)ႇ သုးက့(၆) ဒီး သုးက့(၇)ဟီၣ်က၀ီၤအပူၤ တၢ်ဟ့ၣ်၀ဲ ကီၢ်စၢဖှိၣ်် ဘျီၣ်ဒိၣ်ခၢၣ်စးကမံးတံာ်(CRPH)ႇ NUG ပဒိၣ်ႇ တၢ်ဒီသဒၢကမျၢၢ်သုးမုၢ်ဒိၣ်(PDF)ဒီး အ၀ဲသ့ၣ်စုဒုၣ်တီၤတၢ်ကရၢကရိတဖၣ်သုးတၢ်သိၣ်လိတၢ်ဂ့ၢ်အံၤ တမ့ၢ်၀ဲဒၣ်ဘၣ်အဂ့ၢ်န့ၣ် KNU တကပၤ ဘၣ်က့ၤခီၣ်ဆၢသမၢ၀ဲဒ်အံၤန့ၣ်လီၤႉ

KNU နဲၣ်ရွဲၣ်သဃဲၤ(၂)ပဒိၣ် စီၤလၣ်ထိ စံး၀ဲလၢ“ဖဲလါမ့ၤအတီၢ်ပူၤ ပ၀ဲဒၣ်ခ့ၣ်အဲၣ်ယူၣ် ဟ့ၣ်သုးတၢ်သိၣ်လိတအိၣ်နီတမံၤဘၣ်ႉ ဘၣ်ဆၣ် ဒ်သိးဒီး(Youth Summer Camp) အသိးႇဒ်တၢ်မၤညီနုၢ်တၢ်မၤလိဒုအိၣ်၀ဲလီၤႉ မ့ၢ်အလဲၤကမၣ်လိာ်သးဒီးတၢ်တခါန့ၣ်ဧါမီၤနီၤႉ ၀ံၤဘျီ သုးခိၣ်ဒိၣ်ဖိ ဟ့သီၤအူလၢအဟးထီၣ်လၢသုးမီၤစိရိၤပူၤတဂၤအံၤ ပထံၣ်ဘၣ်လၢ တၢ်ကစီၣ်ပူၤလၢအဟ့ၣ်၀ဲဒၣ်တၢ်သိၣ်လိလီၤမီၤနီၤႉ တၢ်အံၤတဲ၀ဲလၢ ခ့ၣ်အဲၣ်ယူၣ်ဟ့ၣ်၀ဲဒီး မ့ၢ်အလဲၤကမၣ်လိာ်သးခီဧါမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

ကီၢ်စဲၣ်အပတီၢ် သုးမီၤစရိၤလံာ်ထီဒါလၢအဆှၢခီဖျိ၀ဲလၢတၢ်ရ့လိာ်မုာ်လိာ်၀ဲၤဒၢးတဆီလံာ်အပူၤပာ်ဖျါ၀ဲလၢ တၢ်ဟ့ၣ်သုးတၢ်သိၣ်လၢ KNU သုးက့ ဟီၣ်က၀ီၤ ၃ ဘ့ၣ်အပူၤတၢ်ဂ့ၢ်အံၤ သ့ၣ်ညါဘၣ်လၢၦၤလၢတၢ်ဖီၣ်န့ၢ်၀ဲ တဖၣ်အအိၣ်အဂ့ၢ်ဒီး KNU အံၤ မၤကမၣ်၀ဲဒၣ်(NCA)အလံာ်ဃံးဃာ် အဆၢဖိ(၆)ႇ အကူာ်(၂၅)ႇအကူာ်ဒ့(က) အကူာ်ဒ့ဆံး(၄)ဟီၣ်က၀ီၤအပူၤ မုာ်ခုၣ်ဂၢၢ်ကျၢၤဒီး သဲစးဒိၣ်စိသနူတဖၣ်အဂ့ၢ် စံး၀ဲန့ၣ်လီၤႉ

တကီၢ်ခါခဲအံၤ တၢ်တတူၢ်လိာ်၀ဲသုးဟံးန့ၢ်တၢ်စိတၢ်ကမီၤဘၣ်ဒီး ကမျၢၢ်ထံဖိကီၢ်ဖိလၢအပာ်ဖျါထီၣ်သးလၢတၢ်မုာ်တၢ်ခုၣ်အပူၤဒီး ၦၤလၢ အနုာ်လီၤပၣ်ဃုာ်လၢ(CDM)အပူၤတဖၣ်အံၤ ခီဖျိသုးမီၤစိရိၤ အသုးတဖၣ်မၤလီၤမုၢ်ပြံပြါဒီးဖီၣ်ဟံးန့ၢ်၀ဲအရ့အဃိ ကမျၢၢ်ထံဖိကီၢ်ဖိလၢအကလးဘၣ်လဲၤစံၣ်အိၣ်ခူသူၣ်လၢကီၢ်ကၠီၣ်တဲၣ်=ကီၢ်ပယီၤကီၢ်ဆၢႇ အ့ဒံၣ်ယၣ်=ကီၢ်ပယီၤကီၣ်ဆၢတဖၣ်အိၣ်၀ဲဒၣ်န့ၣ်လီၤႉ

ဒ်သိးတၢ်ကပၢၢ်ဆၢဒုးဖျိးကွံာ်သုးမီၤစိရိၤအဂီၢ် ဖဲအပူၤကွံာ်လါမ့ၤ ၅ သီအနံၤ NUG ပဒိၣ် ဘိးဘၣ်ရၤလီၤဒုးအိၣ်ထီၣ်၀ဲတၢ်ဒီသဒၢကမျၢၢ်သုးမုၢ်ဒိၣ် PDF ၀ံၤအလီၢ်ခံ ဖဲလါမ့ၤ ၁၇ သီအနံၤစ့ၢ်ကီး တၢ်ဆဲးဘိးဘၣ်ရၤလီၤ၀ဲလၢ သုးကီၢ်ခီလီၢ် ၅ ခါ ဒုးအိၣ်ထီၣ်တၢ်ဒီသဒၢကမျၢၢ်သုးမုၢ်ဒိၣ်လံဘၣ်ဆၣ် ဘၣ်ထွဲဒီးတၢ်ဟ့ၣ်သုးတၢ်သိၣ်လိတၢ်ဂ့ၢ်အံၤ တၢ်ပာ်ဖျါထီၣ်၀ဲတအိၣ်နီတမံၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိး ဟီၣ်က၀ီၤလၢကက့ၤပၢၢ်ဆၢကဒါပယီၤသုးမီၤစိရိၤတဖၣ် ထုးထီၣ်ဘိးဘၣ်ရၤလီၤ၀ဲလၢ ဒုးအိၣ်ထီၣ်တၢ်ဒီသဒၢကမျၢၢ်သုးအသိး ကပာ်ဖှိၣ်မၤသကိးတၢ်ဒီးတၢ်ဒီသဒၢကမျၢၢ်သုးမုၢ်ဒိၣ်(PDF)အဂ့ၢ်န့ၣ် ဖဲတလါအံၤအတီၢ်ပူၤ ပထံၣ်ဘၣ်လၢတၢ်ထုးထီၣ်ဘိးဘၣ်ရၤလီၤ၀ဲအကပၤကပၤန့ၣ်လီၤႉ