Home တၢ်ကစီၣ် မုၢ်တြီၢ်ကီၢ်ရ့ၣ်ၦၤဃ့ၢ်မှံဟးဖျိးတဖၣ် သဂၢၢ်ဘၣ်ဒီးတၢ်ဆါဟၢဖၢလူ

မုၢ်တြီၢ်ကီၢ်ရ့ၣ်ၦၤဃ့ၢ်မှံဟးဖျိးတဖၣ် သဂၢၢ်ဘၣ်ဒီးတၢ်ဆါဟၢဖၢလူ

1047
0
Photo: KDHW

လါမ့ၤ ၆ သီႇ ၂၀၂၁ နံၣ်ႇ ခ့ၣ်အဲးစံၣ်

KNU- ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့ ၅ ဟီၣ်က၀ီၤအပူၤ ခီဖျိသုးကီၣ်ကးဟဲကွံာ်လီၤမ့ၣ်ပိၢ်အဃိ ၦၤဃ့ၢ်မှံဟးဖျိးလၢအဃ့ၢ်ထီၣ်တဖၣ်အကျါ ဖဲစှၤသီအတီၢ်ပူၤအံၤ တၢ်ဆါဟၢဖၢလူကဲထီၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိၦၤဃ့ၢ်မှံဟးဖျိးတဖၣ်တဒိးန့ၢ်ဘၣ်၀ဲထံအီလၢအကဆှီဘၣ်အဃိ ဖိဒံဖိသၣ်ႇသူၣ်က့သးၦၢ်ခဲလၢာ်အဂၤ ၂၀၀ ဃၣ်ဃၣ် သဂၢၢ်ဘၣ်ဒီးတၢ်ဟၢဖၢလူတၢ်ဆါဒီး တၢ်လီၢ်တနီၤအပူၤၦၤဆါအါထီၣ်ကိးမုၢ်နံၤဒဲးအဂ့ၢ်န့ၣ် ကီၢ်သူလ့ၤဆူၣ်ချ›မၤစၢၤ၀ဲၤကျိၤ ကသံၣ်တၢ်သိၣ်လိမူဒါခိၣ် စီၤဒိဒိၤအဲၣ်ကလုာ် စံး၀ဲန့ၣ်လီၤႉ

အ၀ဲစံး၀ဲလၢ“ဒ်မုၢ်တြီၢ်ဆူၣ်ချ›မူဒါခိၣ်တီၣ်ထီၣ်ပာ်ဖျါ၀ဲအသိး ဒ့ပူၤနိၣ်ဟီၣ်က၀ီၤ ၦၤဃ့ၢ်မှံ ဟးဖျိးအိၣ်အလီၢ်သ့ၣ်တဖၣ်အလီၢ်န့ၣ် တၢ်အ့ၣ်လူဒုလီၤဖးအါညါလီၤႉ အ၀ဲသ့ၣ်တဖၣ်မၤ၀ဲတ၀းလၢၤဘၣ်ႉ ၀ံၤဘျီဃိၣ်လိာ်ကျိခိၣ်နံၤတကပၤန့ၣ် အပူၤကွံာ်န့ၣ်ကဲထီၣ်သးစ့ၢ်လီၤႉ

ခီဖျိအီဘၣ်ထံတကဆှီဘၣ်ႇတနီၤနီၤန့ၣ်သုး၀့ၤသုး၀ီၤအသးအဃိ ကဲထီၣ်သးလၢတၢ်အ့ၣ်လူလီၤႉ မ့ၢ်လဲၤလၢ(treatment) တကပၤန့ၣ်တဘၣ်ဂီၢ်အါအါဘၣ်ႉ ကဘၣ်လဲၤလၢတၢ်ဒီတဒၢ တၢ်ဒီတဒၢမ့ၢ်န့ၢ်လီၤတံၢ်မး တလိၣ်လၢၤတၢ်ယါဘျါလၢၤဘၣ်မီၤနီၤ”အဂ့ၢ်န့ၣ် စံးဘၣ်ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

Photo: KDHW

ၦၤဃ့ၢ်မှံဟးဖျိးတဖၣ်မ့ၢ်တဒိးန့ၢ်ဘၣ်ထံအီလၢအကဆှီဘၣ်န့ၣ် တြီဆၢ၀ဲဒၣ်တၢ်ဆၢဖၢလူတၢ်ဆါတန့ၢ်၀ဲဘၣ်အဃိ ဆၢကတီၢ်ခဲအံၤဒ်သိးၦၤဃ့ၢ်မှံဟးဖျိးတဖၣ်ကဒိးန့ၢ်ဘၣ်ထံအီလၢအကဆှီအဂီၢ် လိၣ်ဘၣ်၀ဲဒၣ် စဲးဖီကဟၣ်လၢအၦဲၢ်ကဆှီ၀ဲထံတဖၣ်အဂ့ၢ်န့ၣ် စီၤဒိဒိၤအဲၣ်ကလုာ် စံးအါထီၣ်၀ဲန့ၣ်လီၤႉ

စးထီၣ်ဖဲအပူၤကွံာ် လါမးရှး ၂၇ သီ KNLA သုးလဲၤထီၣ်ဒုးဟံးန့ၢ်ကွံာ် မီၤစိရိၤအသုးကလၢၤသံမုၢ်ထၣ်တၢ်လီၢ်လၢအအိၣ်ဖဲကီၢ်ကၠီၣ်တဲၣ်=ကီၢ်ပယီၤကီၢ်ဆၢ၀ံၤအလီၢ်ခံ ခီဖျိသုးကီၣ်ကးအသုးကဘီယူၤဟဲကွံာ်လီၤမ့ၣ်ပိၢ်လၢလီၢ်က၀ီၤဒူသ၀ီပူၤတဖၣ်အဃိ လီၢ်က၀ီၤကမျၢၢ်လၢအကလးဘၣ်ဃ့ၢ်အိၣ်ခူသူၣ်၀ဲလၢကစၢၢ်ကလိၦၢ်လၢ်ကျါန့ၣ်လီၤႉ

တကီၢ်ခါခဲအံၤ ခီဖျိလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ် တဒိးန့ၢ်ဘၣ်ထံအီလၢအကဆှီဘၣ်အဃိ ကဲထီၣ်၀ဲဒၣ်တၢ်ဆၢဖၢလူတၢ်ဆါအမဲာ်ညါ လိၣ်ဘၣ်၀ဲဒၣ်တၢ်အိၣ်တၢ်ဆိးလီၢ်ကျဲဒီးတၢ််အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ