လါမ့ၤ ၆ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီဒီကလုာ်စၢဖှိၣ်ကရၢ -KNU သုးက့(၅)ဟီၣ်က၀ီၤအပူၤ စးထီၣ်ဖဲလါမးရှးလၢာ် ခံခီခံကပၤတၢ်ခးလိာ်သးကဲထီၣ်အပူၤ သုးကီၣ်ကးအသုးသံ၀ဲ အဂၤ ၂၀၀ဃၣ်ဃၣ်အကျါ ပၣ်ဃုာ်၀ဲဒီး ခိၣ်ဒိၣ်စိအပတီၢ်အဂ့ၢ်န့ၣ် ခ့ၣ်အဲၣ်ယူၣ် သုးက့(၅) စံး၀ဲန့ၣ်လီၤႉ
ဖဲအပူၤကွံာ် လါမးရှး ၂၇ သီ တုၤလၢ လါမ့ၤထီၣ်သီတစု ခံခီခံကပၤတၢ်ခးလိာ်သးအပူၤ သုးကီၣ်ကးအၦၤသံ၀ဲ ၁၉၄ ဂၤ ဒီး ဘၣ်ဒိ ၂၂၀ ဂၤန့ၣ်လီၤႉ မ့မ့ၢ်ခ့ၣ်အဲၣ်ယူၣ်တကပၤ သံ၀ဲ ၉ ဂၤ ဘၣ်ဒိအဂၤ ၁၀ အဂ့ၢ်န့ၣ် ခ့ၣ်အဲၣ်ယူၣ် သုးက့(၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ
အ၀ဲစံး၀ဲလၢ “လၢၦၤသံအကျါပၣ်၀ဲဒၣ် သုးခိၣ်ဒိၣ်စိ ၁ ဂၤႇ သုးခိၣ်ဒိၣ်စိ(၂) ၁ ဂၤႇ သုးခိၣ်စိ ၁ ဂၤႇ သုးခိၣ်စိ(၂) ၁ ဂၤႇ သုးခိၣ်ဖိ ၁ ဂၤႇ ပတြီၤသုးခိၣ်ဖိ ၁ ဂၤ ဒီးလၢအဂၤတဖၣ်န့ၣ်မ့ၢ်သုးဖိတဖၣ်လီၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢတလါဘျဲၣ်အတီၢ်ပူၤ မီၤစိရိၤအသုးဟဲကွံာ်လီၤမ့ၣ်ပိၢ်လၢ KNU သုးက့(၅)ဟီၣ်က၀ီၤအပူၤ အိၣ်၀ဲ(၂၇)ဘျီႇ ခးလီၤကျိဖးဒိၣ်(၄၇)ဖျၢၣ်ဒီး ခံခီခံကပၤတၢ်ခးလိာ်သးကဲထီၣ်(၄၀၇)ဘျီအဂ့ၢ်န့ၣ် သုးက့(၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ
လၢန့ၣ်အမဲာ်ညါ သုးမီၤစိရိၤအသုးခးလီၤကျိဖးဒိၣ်လၢလီၢ်က၀ီၤဒူသ၀ီတၢ်မၤအီၣ်လီၢ်ကျဲတဖၣ်အပူၤ အိၣ်၀ဲ(၅၇၅)ဘျီႇ ခီဖျိမီၤစိရိၤအသုးကွံာ်လီၤမ့ၣ်ပိၢ်ဒီးကဘီယူၤအဃိ ကမျၢၢ်သံ ၁၄ ဂၤႇ ဘၣ်ဒိ ၂၈ ဂၤ ဒီး ဟံၣ်ဃီ ၂၀ ဖျၢၣ် ဒီး ကၠိ ၂ ဖျၢၣ် ဃုာ်ဒီးလီၢ်က၀ီၤသ၀ီဖိတၢ်ဖိတၢ်လံၤဟးဂုၤဟးဂီၤ၀ဲအါအါဂီၢ်ဂီၢ်အဂ့ၢ်န့ၣ် KNU သုးက့ ၅ စံး၀ဲန့ၣ်လီၤႉ
တကီၢ်ခါခဲအံၤ ခီဖျိခ့ၣ်အဲၣ်ယူၣ်ကးတံၢ်ဃာ်၀ဲမီၤစိရိၤအသုးတၢ်အီၣ်တၢ်အီကျဲတဖၣ်အဃိ သုးကီၣ်ကးလၢအထံၣ်ဘၣ်ဒီးတၢ်အီၣ်တၢ်အီလီၤတူာ်တဖၣ်အံၤ ဟံးဆူၣ်န့ၢ်၀ဲ လီၢ်က၀ီၤ ကမျၢၢ်အစ့အကလီၢ်(၅၀)အမဲာ်ညါ သိလ့ၣ်တခိၣ်ႇဟုသးအထၢၣ်(၂၀)ဃုာ်ဒီး ဂံၢ်ခီၣ်ထံးတၢ်အီၣ်လၢအဂၤတဖၣ်အဂ့ၢ်န့ၣ် ခ့ၣ်အဲၣ်ယူၣ် သုးက့(၅) တၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ
တကီၢ်ခါဆၢကတီၢ်ခဲအံၤ သုးကီၣ်ကးတကပၤ မၤၦဲၤ၀ဲဒၣ်သုးခိးကီၢ်ဆၢ(BGF)သုးအဂၤ ၅၀၀ ဘျဲၣ်ဒီး တၢ်အိၣ်သးအိၣ်လၢတၢ်ဒုးတၢ်ယၤကဆဲးကဲထီၣ်ဒီး တၢ်ဘၣ်ဒိဘၣ်ထံးတၢ်သံတၢ်ၦၢ်တၢ်ဟးဂုၤဟးဂီၤတဖၣ်ကဟဲအါထီၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်ဘၣ်ယိၣ်ဘၣ်ဘှီ၀ဲန့ၣ်လီၤႉ
ခီဖျိတၢ်ခးလိာ်သးဒီးတၢ်ဒုးကဲထီၣ်ကိးမုၢ်နံၤဒဲးအဃိ ဖၣ်ပူၣ်=ကမၤမိၢ်ကျဲဃုာ်ဒီး တၢ်ကူလဲၢ်မၤကၤႇတၢ်ဆဲးကျိးကျဲတဖၣ် ခီဖျိခံခီခံကပၤအသုးတဖၣ်ကးတံၢ်၀ဲအဃိ ကမျၢၢ်တဖၣ်ဟးထီၣ်က့ၤလီၤတသ့လၢၤဘၣ်ဒီး သဂၢၢ်ဘၣ်၀ဲတၢ်အီၣ်တၢ်အီတၢ်ဂ့ၢ်ကီတဖၣ်အဂ့ၢ်န့ၣ် ကမၤမိၢ်လီၢ်က၀ီၤဖိတဖၣ် စံး၀ဲန့ၣ်လီၤႉ
