ခီဖျိတၢ်ဒုးကဲထီၣ်အဃိ ဖလူလီၢ်က၀ီၤကမျၢၢ် ၆၀၀ ဃၣ်ဃၣ် လဲၤဃ့ၢ်ထီၣ်လၢကၠီၣ်တဲၣ်တကပၤ

လါယူၤ ၂ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်၀့ၢ် ဖလူသ၀ီအကပၤ သုးမီၤစိရိၤအသုးႇသုးခိးကီၢ်ဆၢ (BGF)သုးပာ်ဖှိၣ်တဖၣ်ဒီး (DKBA)ထုးဖးသးကရူၢ်တဖၣ်အဘၢၣ်စၢၤ တၢ်ဒုးကဲထီၣ်အဃိ တုၤလၢမဟါ(လါယူၤ ၁)သီမုၢ်ဟါလီၤန့ၣ် လီၢ်က၀ီၤဖိအဂၤ(၆၀၀)ဃၣ်ဃၣ် လဲၤဃ့ၢ်ထီၣ်ဆူကၠီၣ်တဲၣ်တကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်ဖဲမဟါ(လါယူၤ ၁)သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်န့ၣ် ခီဖျိ(DKBA)ထုးဖးသးကရူၢ်ဒီး သုးမီၤ စိရိၤအသုးႇ BGF သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိ မၠၣ်၀တံၣ်ကလံၤထံး သ၀ီလၢ အအိၣ်ဘူးဒီးဖလူသ၀ီအကပိၤကပၤ လီၢ်က၀ီၤကမျၢၢ်ထံဖိကီၢ်ဖိ ၆၀၀ ဃၣ်ဃၣ် လဲၤခီဂာ်၀ဲဒၣ်သူမှံကျိဒီးဃ့ၢ်ထီၣ်၀ဲဆူကၠီၣ်တဲၣ်တကပၤအိၣ်၀ဲအသိး တနီၤန့ၣ်လဲၤဃ့ၢ်၀ဲဒၣ်လၢတၢ်လီၢ်လၢအဘူးဖဲန့ၣ်တဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

“တနီၤန့ၣ်လဲၤစံၣ်၀ဲဒၣ်လၢအဘူးအတံၢ်အဟံၣ်လီၤႉ လဲၤခီဂာ်၀ဲဒၣ်သူမှဲကျိဒ်န့ၣ်လီၤႉ တနီၤန့ၣ်စိာ်တၢ်ဖိတၢ်လံၤတန့ၢ်နီတမံၤဘၣ်ႉ လဲၤတုၤလၢ ၀ၢ်ခီဘျီဒုယိၤသုးတဖၣ်သ မံသမိး၀ဲတၢ်အိၣ်ဆူၣ်အိၣ်ချ့ဒီး နီၤလီၤဟ့ၣ်၀ဲဒၣ်တၢ်ကးဘၢနါဒ့တဖၣ်လီၤႉ ခဲအံၤအိၣ်ဖှိၣ်၀ဲ ဒၣ်လၢတၢ်ဘုၣ်ကျီၢ်အလီၢ်န့ၣ်လီၤႉ ခဲအံၤဒုလိၣ်ဘၣ်၀ဲဒၣ်တၢ်အီၣ် တၢ်အီႇတၢ်ကူတၢ်သိးဒီးတၢ်အိၣ်တၢ်ဆိးအလီၢ်တဖၣ်လီၤ”အဂ့ၢ်န့ၣ် ဖလူလီၢ်က၀ီၤဖိလၢအဃ့ၢ်တၢ်ဒုးတဂၤ စံး၀ဲန့ၣ်လီၤႉ

ဖဲမဟါ(လါယူၤ ၁)သီမုၢ်ဟါလီၤအဆၢကတီၢ်စ့ၢ်ကီး ခီဖျိနၢ်ဟူကျိဖးဒိၣ်ႇ ကျိဖိတဖၣ်သီၣ်လၢဖလူတကပၤအဃိ သ၀ီလၢအအိၣ်ဘူးဖဲန့ၣ်သ့ၣ်တဖၣ် ကတီၤထီၣ်သးလၢကဃ့ၢ်အိၣ်ခူသူၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါ(လါယူၤ ၁)သီအနံၤ မၠၣ်၀တံၣ်ကလံၤထံး ဖလူတၢ်ဒုးအပူၤ ဒ်ပဒိးန့ၢ်ဘၣ်တၢ်ကစီၣ် လီၢ်ခံကတၢၢ်အသိးန့ၣ် သုးမီၤစိရၤတကပၤအသုးသံ၀ဲ(၂၉)ဂၤဒီး BGF အသုးသံ၀ဲ ၃ ဂၤအဂ့ၢ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် တၢ်ကစီၣ်ပာ်ဖျါဃာ်၀ဲန့ၣ်လီၤႉ ဘၣ်ဆၣ် ဘၣ်ထွဲဒီးသုးမီၤစိရိၤအသုးသံစရီတၢ်ဂ့ၢ်အံၤ တၢ်ပာ်ဂၢၢ်ပာ်ကျၢၤထုးထီၣ်ပာ်ဖျါတအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ