Home တၢ်ကစီၣ် ခီဖျိသုးမီၤစိရိၤအသုးဟဲနုာ်လီၤလၢယၤဒိၤသ၀ီပူၤအါအါဂီၢ်ဂီၢ်အဃိ လီၢ်က၀ီၤဖိတဖၣ်ဘၣ်ယိၣ်တၢ်ဒီးဟးဃ့ၢ် အိၣ်ခူသူၣ်

ခီဖျိသုးမီၤစိရိၤအသုးဟဲနုာ်လီၤလၢယၤဒိၤသ၀ီပူၤအါအါဂီၢ်ဂီၢ်အဃိ လီၢ်က၀ီၤဖိတဖၣ်ဘၣ်ယိၣ်တၢ်ဒီးဟးဃ့ၢ် အိၣ်ခူသူၣ်

954
0
Photo: CJ

လါယူၤ ၉ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ သၣ်တီၣ်ကၠံကီၢ်ဆၣ်အပူၤ ဖဲလါယူၤ(၇)သီအနံၤ သုးမီၤစိရိၤအသုး ဟဲနုာ်လီၤလၢ ယၤဒိၤ သ၀ီတကပၤအါအါဂီၢ်ဂီၢ်အဃိ လီၢ်က၀ီၤသ၀ီဖိတဖၣ်ဘၣ်ယိၣ်ဘၣ်ဘှီတၢ်ဒီး တနီၤန့ၣ်ဟးဃ့ၢ်အိၣ်ခူသူၣ် အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

သုးမီၤစိရိၤအသုး သုးတြိၤ(၆၆)သုးတဖၣ် အိၣ်ပတုာ်၀ဲဒၣ်ဖဲခီၣ်ချ့သုး ရ့ၣ်(ခမရ=၆၀၃) လၢအအိၣ်ဆီလီၤသး ဖဲ တၤပူၤ (လ့ၣ်သိၤ)၀့ၢ်၀ံၤ ဖဲလါယူၤ ၇ သီအနံၤန့ၣ် ဆဲးဟဲထီၣ်၀ဲဒၣ် လၢသီၣ်ယ့ၤခၣ်=ယၤဒိၤတကပၤဒီးဆီလီၤ အသုး အိၣ်ဆိး၀ဲတုၤလၢခဲအံၤတစုအဂ့ၢ်န့ၣ် လီၢ်က၀ီၤဖိတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲလါယူၤ ၆ သီန့ၣ် မံ၀ဲဒၣ်ဖဲ တၤပူၤ(လ့ၣ်သိၤ) ခမရ(၆၀၃)န့ၣ်တနၤလီၤႉ ဖဲ ၇ သီ ဂီၤခီ ၇ နၣ်ရံၣ်တခီအဆၢကတီၢ်န့ၣ် ဆဲးနီ၀ဲဒၣ်သိလ့ၣ်လၢယၤဒိၤတကပၤလီၤႉ ဖဲအ၀ဲသ့ၣ်ဟဲကျဲဒီတကျိၤန့ၣ် သ၀ီဖိတဖၣ်ပျံၤတၢ်လီၤႉ ခီဖျိလၢသုးဟဲထီၣ်အါအါဂီၢ်ဂီၢ်ဒ်အံၤတအိၣ်နီတဘျီဘၣ်အဃိမီၤနီၤႉ သ၀ီဖိတနီၤန့ၣ် တၢ်ဒုးမ့ၢ်ကဲထီၣ်ဘၣ်ဆၣ် ကဆဲးအိၣ်၀ဲဒၣ်ဖဲဟီၣ်က၀ီၤပူၤဃူဃူဖိးဖိးလီၤမီၤနီၤႉ သ၀ီဖိတနီၤစ့ၢ်ကီး ပာ်တ့ၢ်ကွံာ်အတၢ်ဖိတၢ်လံၤဒီး လဲၤစံၣ်အိၣ်လၢၦၢ်ပူၤစ့ၢ်ကီးအိၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါ တၢ်ဟဲဆီလီၤသုးဒ်အံၤန့ၣ် ကဲထီၣ်၀ဲဒၣ်ဟီၣ်က၀ီၤတၢ်ဒိၣ်စိသ့၀ဲအဂ့ၢ်ႇ ၦၤအါဂၤ တတူၢ်လိာ်၀ဲသုးမီၤစိရိၤဘၣ်အသိး ပ၀ဲသ့ၣ်စ့ၢ်ကီးတတူၢ်လိာ်၀ဲဘၣ်အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ

Photo: CJ

တကီၢ်ခါခဲအံၤ သုးမီၤစိရိၤအသုးတဖၣ်ကဆဲးလဲၤ၀ဲလၢဆူညါအဂီၢ် ခီဖျိလၢတိာ်ကၢ်အဃိ တဆဲးလဲၤ၀ဲလၢဆူညါဘၣ်ဒီး အိၣ်ဘှံးပာ်လီၤ၀ဲဒၣ်အသုးကလၢၤဒီး သုးတၢ်ပူၤ(သိလ့ၣ်)ခီလီတနီၤ ဖဲမဟါန့ၣ်က့ၤလီၤကဒါ၀ဲလၢတၤပူၤ(လ့ၣ်သိၤ)၀့ၢ်တကပၤအသိး ဖဲမဟါ(လါယူၤ ၈)သီ ဂီၤခီ ၈ နၣ်ရံၣ်တခီအခါစ့ၢ်ကီး သုးသိလ့ၣ်ခီလီ(၁၅)ခိၣ်ဃၣ်ဃၣ် က့ၤလီၤကဒါ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးမီၤစိရိၤအသုးဟဲထီၣ်လၢကညီကီၢ်စဲၣ်ႇကရ့ၣ်နံၣ်ကီၢ်စဲၣ်ဒီးယိၤဒိၣ်ကီၢ်စဲၣ်ပူၤ ကီၢ်ဆၢလၢအမ့ၢ် ယၤဒိၤတကပၤဒ်အံၤန့ၣ် လီၢ်က၀ီၤဖိတဖၣ်တယးကွၢ်၀ဲလၢ အ၀ဲသ့ၣ်ဟဲထီၣ်အံၤကမ့ၢ် အဟဲမၤၦဲၤထီၣ်အဂံၢ်ဘါလၢ တကီၢ်ခါလၢကရ့ၣ်နံၣ်ကီၢ်စဲၣ်ပူၤ တၢ်ကဲထီၣ်သးလၢ တၢ်ဒီသဒၢကမျၢၢ်သုး(PDF)ကရူၢ်ဒီး သုးမီၤစိရိၤအသုးကရူၢ်တၢ်ဒုးအဂီၢ်န့ၣ်လီၤႉ

ယၤဒိၤသ၀ီအံၤ အိၣ်ဆီလီၤသးလၢကညီကီၢ်စဲၣ် သၣ်တီၣ်ကၠံၣ်ကီၢ်ဆၣ်အပူၤဒီး အိၣ်၀ဲဒၣ်လၢကညီဒီကလုာ်စၢဖှိၣ်ကရၢ -KNU တီအူကီၢ်ရ့ၣ်(သုးက့ ၂)တၢ်ပၢဟီၣ်က၀ီၤအပူၤန့ၣ်လီၤႉ