Home တၢ်ကစီၣ် တီအူ ဘှဲမိၣ်ၦာ် တၢ်ဘူၣ်တၢ်ဘါသရၣ်(၅)ဂၤလၢသုးမီၤစိရိၤဖီၣ်ဘၣ်တၢ်ပျၢ်လီၤကွံာ်

တီအူ ဘှဲမိၣ်ၦာ် တၢ်ဘူၣ်တၢ်ဘါသရၣ်(၅)ဂၤလၢသုးမီၤစိရိၤဖီၣ်ဘၣ်တၢ်ပျၢ်လီၤကွံာ်

607
0

လါယူၤ ၃၀ သီႇ ၂၀၂၁ နံၣ်ႇ ခ့ၣ်အဲးစံၣ်

ပကိကီၢ်ခီဒိၣ် တီအူ၀့ၢ် ဘှဲမိၣ်ၦာ် တၢ်ဘူၣ်တၢ်ဘါသရၣ်(၅)ဂၤဃုာ်ဒီး ၦၤအဂၤ လၢသုးမီၤစိရိၤဖီၣ်က့ၤကိး၀ဲဒၣ်အံၤ ဖဲမဟါလါယူၤ ၂၉ သီ ဟါခီအဆၢကတီၢ် ဟဲက့ၤပူၤဖျဲးထီၣ်၀ဲလံအဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးအ၀ဲသ့ၣ်အအိၣ်န့ၣ်လီၤႉ

ဖဲအပူၤကွံာ်(လါယူၤ ၂၇)သီ မုၢ်နၤခီ ၁၁ နၣ်ရံၣ်ဘျဲၣ်အဆၢကတီၢ် သုးမီၤစိရိၤအသုးဟဲသမံသမိး၀ဲဒၣ် ဘှဲမိၣ်ၦာ်တၢ်ဘူၣ်တၢ်ဘါကရၢၢ်ပူၤလၢသုးနီၣ်ဂံၢ်အါအါဂီၢ်ဂီၢ်ဒီး ထံၣ်န့ၢ်၀ဲသွဲၣ်လး ကမူၣ်ႇ(ပုလဲဓာတ်)ဟီၣ်ခိၣ်ညၣ်ဒီးကီၣ််ဘူလၢတၢ်ဖီးဃာ်၀ဲတဖၣ်လီၤႉ ဖဲန့ၣ်အ၀ဲသ့ၣ်တဲ၀ဲလၢအမ့ၢ်တၢ်မၤပိၢ်ဖးထီၣ်တၢ်ဖိတၢ်လံၤဒီး ဖီၣ်က့ၤကိး၀ဲဒၣ်ၦၤအဂၤဃုာ်ဒီးတၢ်ဘူၣ်တၢ်ဘါသရၣ်(၅)ဂၤန့ၣ်လီၤႉ

တၢ်ဖိတၢ်လံၤလၢသုးမီၤစိရိၤအသုးတဲ၀ဲလၢအမ့ၢ်တၢ်မၤပိၢ်ဖးထီၣ်တၢ်ဖိတၢ်လံၤတဖၣ်အံၤ ဖဲတၢ်ဟ့ၣ်တၢ်သိၣ်လိ အခါမ့ၢ်တၢ်ဖိတၢ်လံၤလၢတၢ်သူ၀ဲလၢတၢ်ထုးထီၣ်မၤကွၢ်ထံလၢဘှဲမိၣ်ၦာ်တၢ်ဘူၣ်တၢ်ဘါကမျၢၢ်အဂီၢ်ဒီး မ့ၢ်(ပလဲဓာတ်)ဟီၣ်ခိၣ်ညၣ်လၢတၢ်သူ၀ဲလၢတၢ်သူၣ်တၢ်ဖျးအဂီၢ်လီၤအဂ့ၢ်န့ၣ် ၦၤလၢအဘူးဒီးဘှဲမိၣ်ၦာ်တၢ်ဘူၣ်တၢ်ဘါကရၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်ကမၣ်တအိၣ်အဃိ ပျၢ်လီၤက့ၤ၀ဲလံမီၤနီၤႉ ဆဲးလီၤတၢ်အုၣ်ကီၤဘျီဟဲက့ၤပူၤဖျဲးထီၣ်လီၤမီၤနီၤႉ အ၀ဲသ့ၣ်တဲ၀ဲဒ်လဲၣ်န့ၣ် တဲ၀ဲလၢထံၣ်တၢ်ဖိတၢ်လံၤလၢအလီၤဆီအဃိ တဲ၀ဲဒ်န့ၣ်လီၤမီၤနီၤႉ ပ၀ဲဒၣ်တကပၤစ့ၢ်ကီးပက့ၤတဲကဒါလၢ တၢ်ဖိတၢ်လံၤတဖၣ်အံၤလၢဟံၣ်ဃီတဖျၢၣ်အပူၤန့ၣ် မ့ၢ်တၢ်ဖိတၢ် လံၤလၢအအိၣ်ညီနုၢ်လီၤႉ တၢ်ဂ့ၢ်၀ဲအံၤ တၢ်မၤ၀ဲအခိၣ်သ့ၣ်န့ၣ်မ့ၢ်၀ဲသုးမီၤစိရိၤအဃိ ပၢၤကီၢ်၀ဲၤလီၢ် တကပၤအဲၣ်ဒိးဟးပလဲာ်အခိၣ်တစဲးအိၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ

ၦၤလၢတၢ်ဖီၣ်က့ၤကိး၀ဲ(၅)ဂၤအံၤ မ့ၢ်၀ဲဒၣ်ဘှဲမိၣ်ၦာ်တၢ်ဘူၣ်တၢ်ဘါသရၣ် ၂ ဂၤဒီး အဟံၣ်ဖိဃီဖိ ၂ ဂၤႇပၣ်ဃုာ်၀ဲဒီးတီအူ၀့ၢ် ၦၤမၤတၢ်ကစီၣ်ဖိတဂၤအဟံၣ်ဖိဃီဖိကကူစါယါဘျါသးအဂီၢ် ဟဲအိၣ်၀ဲလၢတၢ်ဘူၣ်တၢ်ဘါကရၢၢ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲသုးမီၤစိရိၤအသုးနုာ်လီၤသမံးသမိးတၢ်လၢတၢ်ဘူၣ်တၢ်ဘါကရၢၢ်ပူၤအဆၢကတီၢ် သွဲၣ်လးကမူၣ်လၢအ ထံၣ်န့ၢ်၀ဲတဖၣ်အံၤ တဲ၀ဲလၢအမ့ၢ်ဘျါအ့ၣ်ကမူၣ်အသိး ကီၣ်ဘူလၢတၢ်ဖီးဃာ်၀ဲတဖၣ်ဒီး(ပုလဲဓာတ်) ဟီၣ်ခိၣ်ညၣ်တဖၣ်စ့ၢ်ကီး တဲစ့ၢ်ကီး၀ဲလၢဖဲတၢ်တ့၀ဲတၢ်မၤပိၢ်ဖးထီၣ်တၢ်ဖိတၢ်လံၤအခါ မ့ၢ်တၢ်ဖိတၢ် လံၤလၢတၢ်ထၢနုာ်ဃုာ်၀ဲန့ၣ်လီၤႉ ဘၣ်ဆၣ်ဖဲအ၀ဲသ့ၣ်က့ၤသမံသမိး၀ဲအခါခီဖျိတမ့ၢ်ဘၣ်အဃိ ၦၤလၢတၢ်ဖီၣ်၀ဲလၢအတဖိးသဲစးတဖၣ် ဟဲက့ၤပူၤဖျဲးထီၣ်ကဒါဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ

ဘၣ်ထွဲဒီးတၢ်ကဲထီၣ်သးန့ၣ် ၦၤလၢအဘူးဒီးဘှဲမိၣ်ၦာ်တၢ်ဘူၣ်တၢ်ဘါတဂၤစံး၀ဲလၢ“တၢ်ကဲထီၣ်သးတနၤန့ၣ် ဒ်သိးကသမံသမိး၀ဲၦၤတမှံၤစရီအဂီၢ်ဟဲနုာ်လီၤ၀ဲလီၤႉ လၢကရၢၢ်ပူၤန့ၣ်အိၣ်ဒီးၦၤမၤတၢ်ဖိအတၢ်သူၣ်ထီၣ်လီၤႉ ဟဲသံကွၢ်၀ဲဟံၣ်တၢတဖျၢၣ်န့ၣ် ပတဲလၢပအိၣ်နွံဂၤလီၤႉ ဘၣ်ဆၣ်ဟးဒိတကျိာ်၀ဲဒၣ်တြဲၤအဃိ ၦၤလၢအအိၣ်လၢတၢ်သူၣ်ထီၣ်အဂၤ ၈ ဂၤဟဲထီၣ်၀ဲလီၤႉ ထံၣ်၀ဲဒၣ်ခဲလၢာ်အိၣ်၀ဲ ၁၅ ဂၤအဃိ တဲ၀ဲ လၢသုတတဲတၢ်တီတီဘၣ်အဃိ ကိး၀ဲဒၣ်ၦၤခဲလၢာ်လီၤႉ ၀ံၤဘျီဟးဃုခွဲးခွး၀ဲတၢ်ဖိတၢ်လံၤလီၤႉ ထံၣ်၀ဲတၢ်ဖိတၢ်လံၤလၢအလီၤဆီအဃိ သမံသမိးတီၢ်၀ဲဒၣ်ၦၤပိာ်ခွါလၢဟံၣ်ဖီခိၣ်တကထြၢဒီးဖီၣ်က့ၤကိး၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲတၢ်နုာ်လီၤသမံသမိး၀ဲတၢ်ဘူၣ်တၢ်ဘါကရၢၢ်ပူၤတနၤန့ၣ် ပၣ်၀ဲဒၣ်ပၢၤကီၢ်သုးဒီးသုး(၅၀)ဘျဲၣ်အသိး ၦၤလၢတၢ်ဖီၣ်၀ဲတဖၣ်ဖဲတၢ်သမံသမိးအ၀ဲသ့ၣ်အဆၢကတီၢ်စ့ၢ်ကီး တၢ်မၤဒၢၣ်မၤလီၤအ၀ဲသ့ၣ်အိၣ်၀ဲအမဲာ်ညါ မၤဟးဂီၤ၀ဲတၢ်ဘူၣ်တၢ်ဘါတၢ်ဖိတၢ်လံၤတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ