Home တၢ်ကစီၣ် သုးမီၤစိရိၤမၤ၀ဲတၢ်ထၢသုးဖိအသီလၢ၀ါခဲၤမၣ်

သုးမီၤစိရိၤမၤ၀ဲတၢ်ထၢသုးဖိအသီလၢ၀ါခဲၤမၣ်

406
0

လါယူၤ ၁၆ သီႇ ၂၀၂၁ နံၣ်ႇ ခ့ၣ်အဲးစံၣ်

အ့ၣ်ယၣ်၀တံၣ်ကီၢ်ခီဒိၣ်ႇ မၠီမၠးကီၢ်ရ့ၣ်ႇ ၀ါခဲၤမၣ်ကီၢ်ဆၣ် သ၀ီတနီၤအပူၤ သုးမီၤစိရိၤအသုးကိးထံၣ်၀ဲသ၀ီသးၦၢ်တဖၣ်ဒီး မၢအထၢသုးဖိအသီလၢသ၀ီပူၤပိာ်ခွါသးစၢ်တဖၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ

သ၀ီသးၦၢ်တဖၣ်ကိး၀ဲတၢ်အိၣ်ဖှိၣ်လၢသ၀ီအပူၤဒီး ပိာ်ခွါလၢအသးနံၣ်အိၣ် ၁၈ နံၣ် ဒီး ၃၀ နံၣ်အကပိၤကပၤတဖၣ် သ၀ီတဖျၢၣ် ၅ ဂၤကဘၣ်လဲၤ၀ဲသုးဒီး မ့ၢ်တလဲၤဘၣ်န့ၣ်ကဘၣ်ဟ့ၣ်၀ဲဒၣ်စ့အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲမဟါန့ၣ်သ၀ီသးၦၢ်ကိး၀ဲဒၣ်တၢ်အိၣ်ဖှိၣ်လၢသ၀ီပူၤလီၤႉ တဲ၀ဲလၢပယီၤသုးကိး၀ဲဒီး ကဘၣ်လဲၤ၀ဲဒၣ်လွံဂၤယဲၢ်ဂၤလီၤႉ မ့ၢ်တလဲၤဘၣ်နါက့န့ၢ်လီၤႉ မ့ၢ်တအဲၣ်ဒိးလဲၤဘၣ်န့ၣ် အ၀ဲသ့ၣ်ကိး ဃာ်ၦၤလၢအဂၤအိၣ်လီၤႉ လၢၦၤတဖၣ်န့ၣ်အဂီၢ် ဟံၣ်တဖျၢၣ်န့ၣ်ကဘၣ်မၤစၢၤ၀ဲဒၣ်စ့ ၅၀၀၀ မ့တမ့ၢ် ၆၀၀၀ ကၠးလီၤႉ ခီဖျိၦၤအိၣ်လၢသ၀ီပူၤတဖၣ်တအဲၣ်ဒိးလဲၤဘၣ်အဃိ မၢအဖီၣ်မဲဒီးမၢအလဲၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ

တကီၢ်ခါလၢ၀ါခဲၤမၣ်ကီၢ်ဆၣ်အပူၤ တၢ်ဟးထၢ၀ဲဒၣ်သုးဖိအသီလၢသ၀ီတဖၣ်အပူၤဒီး မ့ၢ်သုးမီၤစိရိၤအသုးရ့ၣ်သုးကရူၢ်မနုၤဟးထၢ၀ဲလဲၣ်န့ၣ် သ၀ီဖိတဖၣ်တသ့ၣ်ညါ၀ဲဘၣ်အသိး လၢတၢ်ထၢသုးဖိအသီဒ်အံၤအဖီခိၣ်စ့ၢ်ကီး တၢ်ဘၣ်ယိၣ်ဘၣ်ဘှီအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

သ၀ီလၢတၢ်ထၢသုးဖိအသီတဖၣ်အါဒၣ်တက့ၢ်န့ၣ် ကဲထီၣ်သးလၢ၀ါခဲၤမၣ်ကီၢ်ဆၣ်အပူၤကညီသ၀ီတဖၣ်ဒီး တၢ်ဖံးတၢ်မၤဒ်အံၤအဖီခိၣ် ကညီသးစၢ်တဖၣ်ကအိၣ်ဒီးတၢ်ပလီၢ်ပဒီဒီး ပဲာ်အၢပဲာ်သီ၀ဲတဲာ်တဲာ်ဖျုဖျုုအဂ့ၢ်န့ၣ် အ့ၣ်ယၣ်၀တံၣ်တၢ်တီခိၣ်ရိၣ်မဲကညီသးစၢ်ကမံးတံာ်ကရၢဖိတဂၤ စံး၀ဲဒ်အံၤန့ၣ်လီၤႉ

“တၢ်ကဲထီၣ်သးဒ်အံၤတဖၣ် သုးမီၤစိရိၤအံၤပညိၣ်၀ဲကညီသ၀ီဒီးထၢ၀ဲသုးဖိအသီအံၤ ပ၀ဲကညီကမျၢၢ် လၢအအိၣ်(မၠ့ၣ်၀ၣ်ကၠိ)အဖီခိၣ် ဟီၣ်က၀ီၤအပူၤတဖၣ်ဒီးသးစၢ်သ့ၣ်တဖၣ် အလီၢ်အိၣ်လၢ ကဘၣ်အိၣ်ဒီးတၢ်ပလီၢ်သးန့ၣ်လီၤႉ လၢကထီဒါသုးမီၤစိရိၤတဲာ်တဲာ်ဖျုဖျုအဂီၢ် ပ၀ဲကမံးတံာ်စ့ၢ်ကီး ဆီၣ်တခူထီၣ်၀ဲကညီသးစၢ်လၢအအိၣ်(မၠ့ၣ်၀ၣ်ကၠိ)အဖီခိၣ်တဖၣ်လံအသိး လ့ၤတက့ၤပဲာ်အၢပာ်သီတၢ်ထၢသုးဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ််လီၤႉ

လၢန့ၣ်အမဲာ်ညါ အိၣ်ခိးဃုသ့ၣ်ညါ၀ဲတကီၢ်ခါတၢ်အိၣ်သးတဖၣ်ဒီး တၢ်အိၣ်သးမ့ၢ်ဟဲနးထီၣ်ဒိၣ်န့ၢ်ဒံးခဲအံၤန့ၣ် ကညီကမျၢၢ်တဖၣ်အလီၢ်အိၣ်လၢကအိၣ်ကတဲာ်ကတီၤသးလၢကဒီသဒၢလီၤက့ၤကစၢ်သးဒီး လ့ၤတက့ၤတဘၣ်နုာ်လီၤပၣ်ဃုာ်လၢအ၀ဲသ့ၣ်တၢ်ပၢတၢ်ပြးတၢ်ဂ့ၢ်တၢ်ကျိၤအပူၤတဖၣ်ဘၣ်အဂ့ၢ်န့ၣ် အ၀ဲဆီၣ်တခူစံးအါထီၣ်၀ဲန့ၣ်လီၤႉ

တုၤလၢတကီၢ်ခါခဲအံၤ သုးမီၤစိရိၤထၢသုးဖိအသီတၢ်ဂ့ၢ်အံၤ ပသ့ၣ်ညါဘၣ်လၢအကဲထီၣ်သးလၢ အ့ၣ်ယၣ်၀တံၣ်ဟီၣ်က၀ီၤ ၀ါခဲၤမၣ်ကီၢ်ဆၣ်အပူၤလီၤဒီး ကီၢ်ဆၣ်ဟီၣ်က၀ီၤလၢအအိၣ်တ့ၢ်တဖၣ် တနၢ်ဟူလၢတၢ်ထၢသုးဖိအသီဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ