Home တၢ်ကစီၣ် သုးမီၤစိရိၤ မၤလီၤၦီၢ်ကွံာ် ကီၢ်ပယီၤမၤထူရၤဘျီၣ် လၢအအိၣ်ကညီကီၢ်စဲၣ်အပူၤတဖၣ်

သုးမီၤစိရိၤ မၤလီၤၦီၢ်ကွံာ် ကီၢ်ပယီၤမၤထူရၤဘျီၣ် လၢအအိၣ်ကညီကီၢ်စဲၣ်အပူၤတဖၣ်

835
0

လါယူၤ ၇ သီ၊ ၂၀၂၁ နံၣ်၊ ခ့ၣ်အဲးစံၣ်

သုးမီၤစိရိၤသူ၀ဲဒၣ်ဘူၣ်ဒိၣ်စၣ်ဒီးမၤဟးဂီၤကွံာ်၀ဲဒၣ် ကီၢ်ပယီၤမၤထူရၤဘျီၣ်လၢအအိၣ် ကညီကီၢ်စဲၣ်အပူၤတဖၣ် ဖဲမဟါ(လါယူၤ ၆)သီမုၢ်နၤခီအဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်ဖဲမဟါ(လါယူၤ ၆ သီ) တုၤလၢမုၢ်နၤခီ ၉ နၣ်ရံၣ်အဆၢကတီၢ် မၤထူရၤဘျီၣ်တၢ်သူၣ်ထီၣ်အလီၢ်လၢအအိၣ်ဖဲကညီကီၢ်စဲၣ် ဖၣ်အၣ်၀့ၢ်ႇမၠၣ်၀တံၣ်ႇကီးတရံး၀့ၢ်ဒီး ကၠၤအ့စ့ၣ်ကၠံ၀့ၢ်အပူၤတဖၣ် သုးမီၤစိရိၤနုာ်လီၤမၤလီၤၦီၢ်ကွံာ်၀ဲဒီးဘူၣ်ဒိၣ်စၣ်တဖၣ်လၢမုၢ်နၤခီအဂ့ၢ်န့ၣ် လီၢ်က၀ီၤကမျၢၢ်တဖၣ် စံး၀ဲန့ၣ်လီၤႉ

ဘၣ်ထွဲဒီးတၢ်မၤလီၤၦီၢ်ကွံာ်မၤထူရၤဘျီၣ်အလီၢ်အံၤ လၢသုးမီၤစိရိၤအတၢ်ဖံးတၢ်မၤဒ်အံၤအဖီခိၣ် လၢ လီၢ်က၀ီၤကမျၢၢ်ထံဖိကီၢ်ဖိတဖၣ်အသိးအကျါန့ၣ် တၢ်ပဲာ်ထံနီၤဖးဟဲအိၣ်ထီၣ်၀ဲန့ၣ်လီၤႉ

“တၢ်လၢမၤထူရၤန့ၣ် လၢၢ်ထူၣ်အိၣ်မးကဲထီၣ်မၤထူရၤတမ့ၢ်ဘၣ်ႉ ကဲ၀ဲဒၣ်မၤထူရၤအဃိ တၢ်သူၣ်ထီၣ်န့ၢ်၀ဲ လၢၢ်ထူၣ်လီၤႉ ဒ်န့ၣ်အသိးလီၤႉ ကမျၢၢ်ထံဖိကီၢ်ဖိတဖၣ်စ့ၢ်ကီး လၢၢ်ထူၣ်အိၣ်အဃိမး သ့ၣ်နီၣ်ထီၣ်မၤထူရၤ တမ့ၢ်ဘၣ်ႉ သ့ၣ်နီၣ်ဒီးပာ်လုၢ်ပာ်ၦ့ၤအဃိသူၣ်ထီၣ်၀ဲဒၣ်လၢၢ်ထူၣ်လီၤႉ အ၀ဲသ့ၣ်မ့ၢ်မၤၦီၢ်၀ဲထဲလဲၣ်ထဲလဲၣ်ဂ့ၤ လၢၦၤအသးကံၢ်ပူၤန့ၣ်တသးပ့ၤနီၣ်မၤထူရၤနီတဘျီဘၣ်ႉ အ၀ဲသ့ၣ်မၤ၀ဲဒ်အံၤအဃိ ကမျၢၢ်ထံဖိကီၢ်ဖိ တဖၣ်သးဟ့သုးမီၤစိရိၤဟဲအါထီၣ်၀ဲလီၤ”အဂ့ၢ်န့ၣ် မၠၣ်၀တံၣ် လီၢ်က၀ီၤဖိတဂၤ ပဲာ်ထံနီၤဖးစံး၀ဲန့ၣ်လီၤႉ

စးထီၣ်လၢ(NLD)ပဒိၣ် ဒိးန့ၢ်ဘၣ်ထံကီၢ်တၢ်စိတၢ်ကမီၤအခါန့ၣ် တၢ်ဘှီဂ့ၤထီၣ်က့ၤ၀ဲ မၤထူရၤဘျီၣ်လၢအအိၣ်လၢကညီကီၢ်စဲၣ်အပူၤတဖၣ်အံၤ ခဲအံၤသုးမီၤစိရိၤဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ ၃ လါအတီၢ်ပူၤ အဆိကတၢၢ်တဘျီဘၣ်တၢ်မၤလီၤၦီၢ်ကွံာ်၀ဲဒၣ်န့ၣ်လီၤႉ