ခီဖျိသုးမီၤစိရိၤအသုးခးလီၤကျိဖးဒိၣ်လီၤတဲာ်လၢကၠီၣ်တဲၣ်တကပၤအဃိ ဘၣ်ဒိ ကၠီၣ်တဲၣ်သုး ၁ ဂၤဒီး ၦၤဃ့ၢ်တၢ်ဒုးဖိ ၂ ဂၤ

လါယူၤ ၂ သီႇ ၂၀၂၁ နံၣ်ႇ ခ့ၣ်အဲးစံၣ်

တနံၤညါအံၤ(လါယူၤ ၂)သီ တၢ်ကဲထီၣ်သးလၢမၠၣ်၀တံၣ်၀့ၢ် ကလံၤထံး ဖလူတၢ်ဒုးအပူၤ ခီဖျိသုးမီၤစိရိၤအသုးခးကျိဖးဒိၣ်တဖျၢၣ်လီၤတဲာ်လၢဖလူသ၀ီထံ၀ၢ်ခီကၠီၣ်တဲၣ်ပူၤ မဲၣ်ခိးက့သ၀ီ တစိၢ်တလီၢ်ၦၤဃ့ၢ်တၢ်ဒုးလီၢ်အဃိ ကၠီၣ်တဲၣ်သုးဘၣ်ဒိ ၁ဂၤ ဒီး ၦၤဃ့ၢ်တၢ်ဒုးဖိ ဘၣ်ဒိ ၂ ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်ဖဲမဟါမုၢ်ဃ့ၢ်လီၤ ၁ နၣ်ရံၣ် တုၤလၢ တနံၤအံၤ(လါယူၤ ၂)သီ မုၢ်ထူၣ်အဆၢကတီၢ်န့ၣ် ခီဖျိသုးမီၤစိရိၤအသုးႇ BGF သုးပာ်ဖှိၣ်တဖၣ် ဒီး (DKBA)ထုးဖးသးကရူၢ်တဖၣ်အဘၢၣ်စၢၤ တၢ်ခးလိာ်သးကဲထီၣ်လၢမၠၣ်၀တံၣ် ကလံၤထံး ဖလူသ၀ီအကပၤအဃိ လီၢ်က၀ီၤကမျၢၢ် ထံဖိကီၢ်ဖိတဖၣ််ခီဃီၤ၀ဲသူမှဲကျိဒီး လဲၤဃ့ၢ်ထီၣ်၀ဲဆူကၠီၣ်တဲၣ် မဲၢ်ခိၤက့သ၀ီ တၢ်ဘုၣ်ကျီၢ်အလီၢ်န့ၣ်လီၤႉ

“တကီၢ်ခါ ကမျၢၢ်ထံဖိကီၢ်ဖိ(၆၇၀)ဘျဲၣ် အိၣ်ကဒု၀ဲဒၣ်ဖဲကၠီၣ်တဲၣ်ပူၤ မဲၢ်ခိးက့သ၀ီ တၢ်ဘုၣ်ကျီၢ်အလီၢ်လီၤႉ ကၠီၣ်တဲၣ်သုးမၤစၢၤ၀ဲတၢ်အိၣ်လီၤႉ တနံၤညါအံၤ ခီဖျိသုးမီၤစိရိၤအသုးခး၀ဲကျိဖးဒိၣ်တဖျၢၣ် လီၤတဲာ်၀ဲလၢၦၤဃ့ၢ်တၢ်ဒုးအိၣ်တၢ်လီၢ်အဃိ ဘၣ်ဒိ၀ဲဒၣ်ကၠီၣ်တဲၣ်သုး ၁ ဂၤဒီး ၦၤဃ့ၢ်မှံဟးဖျိးဖိ ၂ ဂၤလီၤ”အဂ့ၢ်န့ၣ် ဖလူလီၢ်က၀ီၤဖိလၢအဃ့ၢ်တၢ်ဒုးတဂၤ စံးခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

စးထီၣ်ဖဲမဟါမုၢ်ဃ့ၢ်လီၤ ၁ နၣ်ရံၣ် တုၤလၢ တနံၤအံၤ(လါယၤူ ၂)သီ မုၢ်ထူၣ်အဆၢကတီၢ် ဖလူတၢ်ခးလိာ်သးကဲထီၣ်အပူၤ သုးမီၤစိရိၤအသုးသံ၀ဲ ၂၉ ဂၤ ဒီး BGF သုးသံ၀ဲ ၃ ဂၤအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲတၢ်ကစီၣ်ဘၣ်ဆၣ် မ့မ့ၢ်ခ့ၣ်အဲးစံၣ်တခီ ပာ်ဂၢၢ်ပာ်ကျၢၤလီၤလီၤဆီဆီတန့ၢ်ဒံးဘၣ်န့ၣ်လီၤႉ

ဖဲတနံၤအံၤ(လါယူၤ ၂)သီ ဂီၤခီ ၄ နၣ်ရံၣ်တခီအဆၢကတီၢ်စ့ၢ်ကီး ဖီၣ်စုက၀ဲၤကရူၢ် တဒူၣ်လဲၤခး၀ဲဒၣ်မၠၣ်၀တံၣ်ကီၢ်ရ့ၣ် ၀ီၤလ့ၤ၀့ၢ်ပၢၤကီၢ်၀ဲၤလီၢ်ဒီး တကတီၢ်ဃီအ၀ဲန့ၣ် ဒွဲၣ်အူစ့ၢ်ကီး၀ဲသုးမီၤစိရိၤအအ့ကၠံၣ်နံၣ်ယၢၣ်သုး GE တၢ်မၤလီၢ်ဒဲတဖၣ်အဃိ ထံဖိကီၢ်ဖိကမျၢၢ်လၢအအိၣ်ဘူးဖဲ၀ီၤလ့ၤ၀့ၢ်တဖၣ် လဲၤဃ့ၢ်အိၣ်၀ဲဒၣ်လၢသီခါဖၠၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ