လါယူၤလံ ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤ(လါယူၤလံ ၂၉)သီ ဂီၤခီအဆၢကတီၢ် ကညီကီၢ်စဲၣ် သုးခိးကီၢ်ဆၢ(BGF) နီၣ်ဂံၢ် ၃ သုးဟီၣ်က၀ီၤခိၣ် သုးခိၣ်ဒိၣ်ဂီၢ်ဂ့ၢ် စီၤကၠီၤမၠ့ၣ်(ကိး)ဘိၤကတိ လၢအသးနံၣ်အိၣ်(၆၂)နံၣ်အံၤ လဲၤပူၤကွံာ်သးခီဖျိခိ၀ံၣ်တၢ်ဆါအဃိအဂ့ၢ်န့ၣ် သ့ၣ်ညါဘၣ်န့ၣ်လီၤႉ
စီၤကၠီၤမၠ့ၣ်(ကိး)ဘိၤကတိအံၤ စးထီၣ်ဖဲခိ၀ံၣ်တၢ်ဆါဘၣ်ကူဘၣ်ဂာ်အီၤ၀ံၤအလီၢ်ခံ(၈)သီတသီ ဖဲတနံၤအံၤ လါယူၤလံ ၂၉ သီ ဂီၤခီ ၁၁း၃၃ မံးနံးအဆၢကတီၢ်န့ၣ်အ၀ဲလဲၤပူၤကွံာ်အသးဒီး ဖဲတနံၤအံၤမုၢ်ဃ့ၢ်လီၤ ၁ နၣ်ရံၣ်အဆၢကတီၢ် တၢ်ပာ်လီၤကွံာ်အစိၣ်ဖဲစွ့ၤကိၣ်ကိၤတၢ်သွၣ်ခိၣ်လီၢ်အဂ့ၢ်န့ၣ် ၦၤလၢအဘူးဒီးအဟံၣ်ဖိဃီဖိတဂၤစံး၀ဲန့ၣ်လီၤႉ
သုးခိးကီၢ်ဆၢ(BGF) နီၣ်ဂံၢ် ၃ သုးဟီၣ်က၀ီၤခိၣ် ဘိၤကတိအံၤအိၣ်ဖျဲၣ်ထီၣ်၀ဲဖဲ ကီးတရံးကီၢ်ဆၣ်ႇနီၤကဲသ၀ီဒီး ဖဲ(၁၉၉၄)နံၣ် တၢ်စးထီၣ်ဒုးအိၣ်ထီၣ်ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)အခါ အ၀ဲဟံးထီၣ်ဖီၣ်ထီၣ်၀ဲမူဒါဒ်(၉၉၉)သုးရ့ၣ်လီၤဆီ အသုးရ့ၣ်ခိၣ်(၂)တဂၤအသိးတုၤလၢ(၂၀၁၀)နံၣ်တစုန့ၣ်လီၤႉ
ဖဲန့ၣ်၀ံၤအလီၢ်ခံ ဖဲ(၂၀၁၀)နံၣ် တၢ်ပျိာ်လဲက့ၤ(DKBA)ဆူကညီကီၢ်စဲၣ်သုးခိးကီၢ်ဆၢ(BGF)အခါ ဖဲ(၂၀၁၀) နံၣ်ႇလါအီကူး ၁၈ သီ အ၀ဲစးထီၣ်ဟံး၀ဲမူဒါဒ်သုးခိးကီၢ်ဆၢ(BGF)နီၣ်ဂံၢ်(၃)သုးဟီၣ်က၀ီၤခိၣ် တုၤလၢအစူာ်ကွံာ်အသးခဲအံၤတစုန့ၣ်လီၤႉ
ခီဖျိသုးခိၣ်ဒိၣ်ဂီၢ်ဂ့ၢ်ဘိၤကတိလဲၤပူၤကွံာ်သးလံအဃိ အလီၢ်လၢအလီၤဟိ၀ဲအံၤန့ၣ် တကီၢ်ခါခဲအံၤလၢကဟံးထီၣ်ဖီၣ်ထီၣ် အလီၢ်အဂီၢ်တအိၣ်ဒံးဘၣ်အဃိ ကညီကီၢ်စဲၣ် သုးခိးကီၢ်ဆၢ နဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠံၣ်သူၤ ကဟံးထီၣ်ဖီၣ်ထီၣ်ဃာ်၀ဲမူဒါတစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးခိၣ်ဒိၣ်ဂီၢ်ဂ့ၢ်ဘိၤကတိလဲၤပူၤကွံာ်သးအကတီၢ် အမါဒီးအဖိမုၣ်ဖိခွါ(၄)ဂၤအိၣ်လီၤတဲာ်ကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
