လါယူၤလံ ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူထူၣ်ကီၢ်ရ့ၣ်(သုးက့ ၁)ကၠိၤမသွဲၤကရူၢ်ပူၤ ဖဲလါယူၤလံ ၂၅ သီအနံၤ တၢ်ခးလိာ်သးကဲထီၣ်လၢ၀ၣ်ကၠံသ၀ီအကပၤဒီး ဖဲန့ၣ်တၢ်ဖီၣ်ချုးသံန့ၢ်၀ဲဂၢၤကီၢ်အခိၣ် ၁ ဂၤအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါ(လါယူၤလံ ၂၇)သီအနံၤန့ၣ်လီၤႉ
ဘၣ်ထွဲဒီးတၢ်ခးလိာ်သးကဲထီၣ်အဂ့ၢ်အံၤ ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါတဂၤစံး၀ဲ“တၢ်ကဲထီၣ်န့ၣ်ဖဲ ၂၅ သီ ဂီၤခီ ၁၀း၄၅ မံးနံးအခါလီၤႉ သုးရ့ၣ်(၁)လဲၤခး၀ဲႉ ၦၤသံန့ၣ်မ့ၢ်၀ဲဂၢၤကီၢ်အခိၣ်လီၤႉ တၢ်မၤန့ၢ်၀ဲ(M 16)တခိၣ်ဒီးကျိချံတနီၤလၢအအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
စးထီၣ်ဖဲသုးမီၤစိရိၤဟံးန့ၢ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ ကညီတၢ်ထူၣ်ဖျဲးသုးမုၢ်ဒိၣ်(KNLA)သုးဒီး သုးမီၤစိရိၤအသုး ႇသုးခိးကီၢ်ဆၢ(BGF)သုးပာ်ဖှိၣ်တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲတလီၢ်လီၢ်န့ၣ်လီၤႉ
ဒ်(KNU)ဒူသထူၣ်ကီၢ်ရ့ၣ်တၢ်ပာ်ဖှိၣ်မၤနီၣ်စရီအသိး ဖဲအပူၤကွံာ်လါယူၤအတီၢ်ပူၤ ဒူသထူၣ်ကီၢ်ရ့ၣ်အပူၤတၢ်ဒုးကဲထီၣ်ပာ်ဖှိၣ်ခဲလၢာ်အိၣ်၀ဲ(၂၃)ဘျီဒီး ဖဲန့ၣ်သုးမီၤစိရိၤအသုးသံ၀ဲ(၃၂)ဂၤအကျါပၣ်ဃုာ်၀ဲဒီးသုးခိၣ်ဒိၣ်စိ ၁ ဂၤႇသုးခိၣ်ဒိၣ်စိ(၂) ၁ ဂၤဒီး ဘၣ်ဒိအဂၤ(၂၀)အမဲာ်ညါ သုးမီၤစိရိၤအၦၤ(၂)ဂၤဟဲက့ၤပာ်လီၤစုက၀ဲၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ KNU သုးက့ ၅ ဟီၣ်က၀ီၤအပူၤစ့ၢ်ကီး ဖဲတလါအံၤလါယူၤလံ ၂၅ သီဒီး ၂၆ သီအနံၤ ကညီတၢ်ထူၣ်ဖျဲးသုးမုၢ်ဒိၣ်(KNLA)သုးဒီး သုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲ(၉)ဘျီဒီး သုးမီၤစိရိၤအသုးသံ၀ဲ(၇)ဂၤအကျါပၣ်ဃုာ်၀ဲဒီးသုးဒ့ခိၣ် ၁ ဂၤဒီး ဘၣ်ဒိ၀ဲ(၄)ဂၤအဂ့ၢ်န့ၣ် KNU မုၢ်တြီၢ်ကီၢ်ရ့ၣ် ထုးထီၣ်ဘိးဘၣ်ရၤလီၤ၀ဲဖဲမဟါ(လါယူၤလံ ၂၇)သီအနံၤန့ၣ်လီၤႉ
