Home တၢ်ကစီၣ် သုးမီၤစိရိၤအသုးဃ့အီၣ်စ့လၢ၀ီၤလ့ၤလီၢ်က၀ီၤဖိအအိၣ်

သုးမီၤစိရိၤအသုးဃ့အီၣ်စ့လၢ၀ီၤလ့ၤလီၢ်က၀ီၤဖိအအိၣ်

1100
0
Photo: CJ

လါယူၤလံ ၈ သီ, ၂၀၂၁ နံၣ်, ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်ကီၢ်ရ့ၣ် ၀ီၤလ့ၤဟီၣ်က၀ီၤအပူၤ သုးမီၤစိရိၤအသုးကရူၢ်ဒီးပၢၤကီၢ်သုး တဖၣ်ပာ်ဖှိၣ်ထီၣ်သး ဟ့ၣ်တၢ်ဂ့ၢ်လၢကသမံသမိးတၢ်ဆါဘၣ်ဆၣ် တြီ၀ဲသိလ့ၣ်လၢအလ့ၢ်ထီၣ်လ့ၢ်လိၤတဖၣ်ဒီးထၢ၀ဲစ့အဂ့ၢ်န့ၣ် လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်န့ၣ်လီၤ.

စးထီၣ်ဖဲ(လါယူၤလံ ၁)သီအနံၤ သုးမီၤစိရိၤအသုး သုးခိၣ် ယဲယ့ၣ်ပိၤ တီခိၣ်ရိၣ်မဲခီၣ်ချ့သုးရ့ၣ်(ခမရ-၅၅၆)သုးကရူၢ်ဒီး ၀ီၤလ့ၤ ပၢၤကီၢ်မူဒါခိၣ် လၣ်မ့ထိ တီခိၣ်ရိၣ်မဲပၢၤကီၢ်သုးတဖၣ် ဟံးန့ၢ်အလီၢ်ဖဲ၀ီၤလ့ၤပၢၤကီၢ်၀ဲၤလီၢ်အကပၤကျဲဖးဒ့ဒီး ဟ့ၣ်တၢ်ဂ့ၢ်လၢကသမံသမိးတၢ်ဆါဘၣ်ဆၣ် ကိးပတုာ်၀ဲသိလ့ၣ် လၢအလ့ၢ်ထီၣ်လ့ၢ်လိၤတဖၣ်,သမံသမိး၀ဲလံာ်လဲၢ်ဒီးဃ့အီၣ်၀ဲစ့အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤ.

“ပလဲၤပှ့ၤတၢ် အ၀ဲသ့ၣ်မၤဒ်သိးဒီးအိၣ်ခိးသမံသမိးတၢ်ဆါမီၤနီၤ. ဘၣ်ဆၣ်မၢပစံၣ်လီၤဒီးမၢပသ့ဃၢၤစု, မ့ၢ်၀ံၤဘျီကွၢ်ပသိလ့ၣ် အလံာ်တဲ၀ဲလၢ ကဘၣ်ကွဲးသိလ့ၣ်လံာ်, လံာ်တဘ့ၣ်န့ၣ်ဘၣ်ဟ့ၣ်စ့(၃၅၀)ဘးလီၤ. ဘၣ်ဆၣ်ယဲန့ၣ်ယ တတူၢ်ရှူဘၣ် ယစံၣ်လီၤလၢယကစၢ်ဘျီယဟ့ၣ်လီၤသိလ့ၣ်လံာ်တဘ့ၣ် ဘၣ်ဃးလၢတၢ်ကရၢကရိလံာ်မီၤနီၤ. အ၀ဲတဲယၤလၢဘၣ်ဃး လၢတၢ်ကရၢကရိလံာ်န့ၣ်တဘၣ်လိၣ်မၤဆှိးဘၣ်.တဲ၀ဲလၢလံာ်အံၤလဲၤန့ၢ်တုၤလၢ၀့ၢ်တကူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤ.

ဘၣ်ထွဲဒီးတၢ်ဂ့ၢ်ကဲထီၣ်သးအံၤ လီၢ်က၀ီၤကမျၢၢ်တဖၣ်ဒုးသ့ၣ်ညါ၀ဲဟီၣ်က၀ီၤ ကညီဒီကလုာ်စၢဖှိၣ်ကရၢ-KNU ဒီး လၢတၢ်ဂ့ၢ်အံၤအဖီခိၣ်ကဘှါရှဲ၀ဲဒ်လီၢ်က၀ီၤဖိအတၢ်ဘၣ်သးအသိးအဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤ.

“မၤ၀ဲဒ်အံၤလီၤဂာ်ဒ်သိးဒီးမၤတံာ်တာ်၀ဲကမျၢၢ်ထံဖိကီၢ်ဖိလီၤမီၤနီၤ. ကမျၢၢ်တဖၣ်ဒုးသ့ၣ်ညါပှၤ, ဟဲသံကွၢ်ပှၤလၢတၢ်ဂ့ၢ်တခါအံၤပကတီၣ်ထီၣ်လၢတၢ်ကစီၣ်လီၤဒီး ပ၀ဲဒၣ်စ့ၢ်ကီးပက့ၤတဲကဒါလၢဒ်ကမျၢၢ်ထံဖိကီၢ်ဖိတၢ်ဘၣ်သးအသိးဟ့ၣ်တၢ်ကစီၣ်ဘျ့ဘျ့ဆှီဆှီသ့လီၤ”အဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤ.

လၢမၠၣ်၀တံၣ်,ဖလူ,၀ီၤလ့ၤ,စိၣ်ဆံမၠဲၣ် ကျဲမုၢ်လၢကလဲၤထီၣ်လၢမီၣ်လီၣ်အံးကစၢၢ်ခီၣ်ထံးဒီတကျိၤန့ၣ် သုးမီၤစိရိၤအသုးဒီးကလုာ်ဒူၣ်ဖီၣ်စုက၀ဲၤကရူၢ်ကရၢအတြဲၤတနီၤ တြီသိလ့ၣ်,သမံသမိးသိလ့ၣ်လၢကလဲၤထီၣ်ဘါဃိၣ်တဖၣ်ဒီးဃ့အီၣ်၀ဲစ့ဒ်အံၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲအပူၤကွံာ်လါအခါန့ၣ် ၀ီၤလ့ၤဟီၣ်က၀ီၤအပူၤ သုးမီၤစိရိၤအသုးကရူၢ်ဒီး ကညီဒီကလုာ်ဂၢၤသးကရၢ(KNDO)အသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဒံးန့ၣ်လီၤ.

Photo: CJ