Home တၢ်ကစီၣ် KNU လီၢ်ခၢၣ်သးပတုာ်ပတြီာ်ကွံာ် KNDO သုးရိၣ်မဲခိၣ်ကျၢၢ်လၢမူဒါပူၤ

KNU လီၢ်ခၢၣ်သးပတုာ်ပတြီာ်ကွံာ် KNDO သုးရိၣ်မဲခိၣ်ကျၢၢ်လၢမူဒါပူၤ

1447
0

လါယူၤလံ ၁၀ သီ, ၂၀၂၁ နံၣ်, ခ့ၣ်အဲးစံၣ်

ကညီဂၢၤသးကရၢ-KNDO သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤနၢၤဒါမၠး ဒီး သုးခိၣ်ဂီၢ်ဂ့ၢ်စီၤဘး၀ါခံဂၤအံၤ တၢ်ပာ်ပတုာ်ပတြီာ်ကွံာ်လၢမူဒါပူၤအဂ့ၢ်န့ၣ် ကညီဒီကလုာ်စၢဖှိၣ်ကရၢ-KNU တၢ်ဒီတဒၢ၀ဲၤကျိၤ ထုးထီၣ်ဘိးဘၣ်ရၤလီၤ၀ဲဖဲလါယူၤလံ ၈ သီအနံၤန့ၣ်လီၤ,

ဘၣ်ထွဲတၢ်ဟူးတၢ်ဂဲၤလၢဟဲအိၣ်ဖျါထီၣ်ဖဲဒူပျာ်ယာ်ကီၢ်ရ့ၣ် (သုးက့-၆) ကီးတရံးကီၢ်ဆၣ် ဖလူ-၀ီၤလ့ၤဟီၣ်က၀ီၤပူၤ တၢ်ဂ့ၢ်အဖီခိၣ် လီၢ်ခၢၣ်သးပၢဆှၢတၢ်ကမံးတံာ်မၤ၀ဲဂ့ၢ်ဂီၢ်အူတၢ်အိၣ်ဖှိၣ် ဖဲလါယူၤလံ ၅ သီအနံၤဒီး တၢ်အိၣ်ဖှိၣ်တၢ်စံၣ်ညီၣ်တဲာ်လီၤ၀ဲဒ်အံၤအဂ့ၢ်န့ၣ် KNU တၢ်ဒီတဒၢ၀ဲၤကျိၤခိၣ် ပဒိၣ်စီၤရီကၠၢၢ်ခ့ၣ် ဆဲးလီၤစုပနီၣ် ထုးထီၣ်ရၤလီၤ၀ဲန့ၣ်လီၤ.

“တၢ်ဂ့ၢ်တခါအံၤ စီၤနၢၤဒါမၠးစ့ၢ်ကီးတတူၢ်လိာ်၀ဲဒံးဘၣ်အသိး ဖဲလၢတၢ်ဃုသ့ၣ်ညါမၤဖျါထီၣ်တၢ်ဂ့ၢ်အကတီၢ် မ့ၢ်တၢ်ဆိကတီၢ်ကွံာ်လၢမူဒါပူၤလီၤ. ဒ်တၢ်ကစီၣ်ထီၣ်အသိး တမ့ၢ်လၢလ့ၤတက့ၤပာ်ပတုာ်ကွံာ်လၢမူဒါပူၤဒံးဘၣ်. မ့ၢ်၀ံၤဘျီ ခီဖျိဒုၣ်ဒါတကပၤဟ့ၣ်တၢ်ဆီၣ်သနံးအဃိ တမ့ၢ်လၢဆၢတဲာ်လီၤဒ်အံၤဘၣ်”အဂ့ၢ်န့ၣ် တၢ်ဒီတဒၢ၀ဲၤကျိၤ ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်န့ၣ်လီၤ.

ဒ်ဂ့ၢ်ဂီၢ်အူတၢ်အိၣ်ဖှိၣ်တၢ်ဆၢတဲာ် နီၣ်ဂံၢ်(၄) အဆၢဖိ(၁)ဒီး(၂)အသိး ဂၢၤသးခိၣ်ကျၢၢ် သုးခိၣ်ကျၢၢ်ဖိ စီၤနၢၤဒါမၠးဒီး သုးခိၣ်ဂီၢ်ဂ့ၢ်စီၤဘး၀ါ တၢ်ပတုာ်ပတြီာ်အမူဒါဒီး ဖဲန့ၣ်မူဒါတၢ်လီၢ်လီၤဟိလၢဂၢၤသးခိၣ်ကျၢၢ်အလီၢ်န့ၣ် ဂၢၤသးခိၣ်ကျၢၢ်(၂)ကဟံးထီၣ်ပာ်စၢၤမူဒါဒ်ဂၢၤသးခိၣ်ကျၢၢ်(ပတြီာ်)အသိးအဂ့ၢ်န့ၣ် လံာ်ဘိးဘၣ်သ့ၣ်ညါအပူၤပာ်ဖျါ၀ဲန့ၣ်လီၤ.

ဖဲအပူၤကွံာ်(လါမ့ၤ ၃၁)သီအနံၤန့ၣ် မၠၣ်၀တံၣ်ကီၢ်ရ့ၣ် ၀ီၤလ့ၤကီၢ်ဆၣ် ကနဲလ့-မီခံကျဲမုၢ်, KNDO ဖီၣ်၀ဲပှၤမၤတၢ်ဖိလၢအတ့ထီၣ်(အူဟူ)တိၤ ၄၇ ဂၤ၀ံၤအလီၢ်ခံ ပျၢ်လီၤက့ၤ၀ဲ ၂၂ ဂၤဒီး,မၤသံကွံာ်၀ဲ ၂၅ ဂၤအဂ့ၢ်န့ၣ် သုးမီၤစိရိၤထုးထီၣ်ပာ်ဖျါ၀ဲန့ၣ်လီၤ.

သုးမီၤစိရိၤထုးထီၣ်ပာ်ဖျါ၀ဲအဖီခိၣ် KNDO တကပၤစံး၀ဲလၢ ပှၤလၢအသံခဲလၢာ်န့ၣ်တမ့ၢ်ကမျၢၢ်တဖၣ်ဘၣ်ဒီး ပျိာ်လဲအသးလၢပှၤမၤတၢ်ဖိလၢအမ့ၢ်သုးမီၤစိရိၤအပှၤတဖၣ်လီၤ. လၢန့ၣ်အမဲာ်ညါဖဲတၢ်ဖီၣ်အ၀ဲသ့ၣ်အဆၢကတီၢ်တၢ်ထံၣ်န့ၢ်ဃုာ်၀ဲဒီး သုးကူသုးကၤ,သုးတၢ်ပနီၣ်တဖၣ်,မူဒါအပတီၢ်တၢ်ပနီၣ်တဖၣ်,နီၣ်တယၢ်ဒီးလီတဲစိတဖၣ်အဂ့ၢ်န့ၣ် KNDO သုးရိၣ်မဲခိၣ်ကျၢၢ်အနီၢ်ကစၢ်ဒၣ်၀ဲ က့ၤရှဲလဲကဒါ၀ဲန့ၣ်လီၤ.

ဒ်န့ၣ်အသိးဘၣ်ထွဲဒီးတၢ်ဂ့ၢ်ကဲထီၣ်သးအံၤ ဒ်သိးတၢ်ဟံဂ့ၢ်၀ီကန့ၢ်အဂီၢ် ဖဲအပူၤကွံာ်(လါယူၤ ၁၃ သီ)အနံၤ သုးမီၤစိရိၤ မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်ဆှၢထီၣ်လံာ်ဆူ ကညီဒီကလုာ်စၢဖှိၣ်ကရၢ-KNU လီၢ်ကခၢၣ်သးအအိၣ်ဒီး စံး၀ဲလၢ KNDO အံၤမၤကမၣ်၀ဲ(NCA)တၢ်သိၣ်တၢ်သီ,ဒီးပှၤလၢအမၤကမၣ်တၢ်တဖၣ်တၢ်ကဟံဂ့ၢ်၀ီအဂ့ၢ်န့ၣ် လံာ်တၢ်ဒုးသ့ၣ်ညါအပူၤ ပာ်ဖျါ၀ဲန့ၣ်လီၤ.

ဘၣ်ထွဲဒီးတၢ်ဂ့ၢ်အံၤအဖီခိၣ် KNU လီၢ်ခၢၣ်သးဒီးကီၢ်ရ့ၣ်ပှၤဘၣ်မူဘၣ်ဒါတဖၣ်စ့ၢ်ကီး က့ၤထုးထီၣ်ပာ်ဖျါ၀ဲလၢကဃုသ့ၣ်ညါသမံသမိး၀ဲဒီး ဖဲတၢ်ဃိထံသမံသမိးအကတီၢ် ဘၣ်တၢ်ပတုာ်ပတြီာ်ကွံာ် KNDO ခိၣ်နၢ် ၂ ဂၤ အမူအဒါ ဟဲကဲထီၣ်အသးန့ၣ်လီၤ.