Home တၢ်ကစီၣ် တၢ်ခးလိာ်သးကဲထီၣ်လၢကွ့ကလ့ သုးမီၤစိရိၤအၦၤသံ ၁ ဂၤႇ ဘၣ်ဒိ ၂ ဂၤဒီး ဖီၣ်က့ၤကိး၀ဲလီၢ်က၀ီၤဖိ ၃ ဂၤ

တၢ်ခးလိာ်သးကဲထီၣ်လၢကွ့ကလ့ သုးမီၤစိရိၤအၦၤသံ ၁ ဂၤႇ ဘၣ်ဒိ ၂ ဂၤဒီး ဖီၣ်က့ၤကိး၀ဲလီၢ်က၀ီၤဖိ ၃ ဂၤ

1089
0

လါအီကူး ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ဖဲမဟါ(လါအီကူး ၂၃)သီအနံၤ တၢ်ခးလိာ်သး ကဲထီၣ်လၢကွ့ကလ့သ၀ီကပၤန့ၣ် သုးမီၤစိရိၤအၦၤသံ ၁ ဂၤႇ ဘၣ်ဒိ ၂ ဂၤဒီး လၢန့ၣ်အမဲာ်ညါဖီၣ်က့ၤကိး၀ဲလီၢ်က၀ီၤဖိ ၃ ဂၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ

ခ့ၣ်အဲၣ်ယူၣ် သုးက့ ၆ စုဒုၣ်တီၤအဖီလာ််ဒီးသုးမီၤစိရိၤအသုးတဖၣ်အဘၢၣ်စၢၤ ဘၣ်သဂၢၢ်ခးလိာ်သးကဲထီၣ်၀ံၤအလီၢ်ခံ ဖဲတနံၤအံၤ(လါအီကူး ၂၄)သီ ဂီၤခီအဆၢကတီၢ်န့ၣ် သုးမီၤစိရိၤအသုးတဖၣ်ဟးထီၣ်ကွံာ်လၢကွ့ကလ့သ၀ီပူၤလံအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်က့ၤကဒါက့ၤဖဲတဂီၤအံၤ ၁၁ နၣ်ရံၣ်ဘျဲၣ်အခါလီၤႉ အ၀ဲသ့ၣ်တကပၤန့ၣ်သံ ၁ ဂၤ ဘၣ်ဒိ ၂ ဂၤႉ က့ၤကိး၀ဲဒၣ်ကီးသနီၣ်သ၀ီသးၦၢ်(၂)ဂၤဒီးယွၤတကိၤသ၀ီဖိ(၁)ဂၤမီၤနီၤႉ ဖဲတဂီၤညါအံၤန့ၣ်က့ၤကိး၀ဲဒၣ်ကွ့ကလ့သ၀ီဖိတဂၤ လၢကနဲၣ်ပၠးကျဲအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တကီၢ်ခဲအံၤ ပယီၤသုးမီၤစိရိၤအသုးလၢအဆီလီၤအသးဖဲကွ့ကလ့သ၀ီပူၤတဖၣ် ဖဲမဟါန့ၣ်က့ၤထီၣ်ကဒါလၢကၠဲးဒိတကပၤဒီး မ့မ့ၢ်ကျ့းသ၀ီပူၤန့ၣ်(BGF)နုာ်လီၤအိၣ်ဆိး၀ဲဒၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါ လၢကီးတရံးကီၢ်ဆၣ် ကမဲၤကိသ၀ီ သီခါဖၠၣ်ကရၢၢ်ပူၤစ့ၢ်ကီး သုးမီၤစိရိၤအသုးဒီး(BGF)သုးပာ်ဖှိၣ်တဖၣ် နုာ်လီၤဟံးန့ၢ်အလီၢ်အကျဲမၤၦဲၤထီၣ်အသုးဂံၢ်ဘါဒီး ဖဲတနံၤအံၤ(လါအီကူး ၂၄)သီ ဂီၤခီအဆၢကတီၢ်စ့ၢ်ကီး တၢ်ခးလိာ်သးကဲထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ