Home တၢ်ကစီၣ် KNLA သုးက့ ၆ ဒီးသုးမီၤစိရိၤအသုးအဘၢၣ်စၢၤတၢ်ခးလိာ်သးကဲထီၣ် ခံခီခံကပၤတၢ်ဘၣ်ဒိဘၣ်ထံးသံအိၣ်

KNLA သုးက့ ၆ ဒီးသုးမီၤစိရိၤအသုးအဘၢၣ်စၢၤတၢ်ခးလိာ်သးကဲထီၣ် ခံခီခံကပၤတၢ်ဘၣ်ဒိဘၣ်ထံးသံအိၣ်

1299
0
Photo: Htoo Htoo

လါအီကူး ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲကီးတရံး၀့ၢ် ကလံၤထံးတကပၤန့ၣ် လီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၆ ဒီး သုးမီၤစိရိၤအသုးတဖၣ်အဘၢၣ်စၢၤတၢ်ခးလိာ်သးကဲထီၣ်ဒီး ဖဲန့ၣ်ခံခီခံကပၤလၢာ်တၢ်ဘၣ်ဒိဘၣ်ထံးသံအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ

ဖဲမဟါ(လါအီကူး ၂၄)သီ ဟါခီအဆၢကတီၢ် လၢကီးတရံး၀့ၢ် ကလံၤထံး ကမဲၤကိဒီးအီးဖးဖိသ၀ီတကပၤန့ၣ် သုးမီၤစိရိၤအသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ–၅၃၁)ဒီး KNLA သုးက့(၆) စုဒုၣ်တီၤအဖီလာ်သုးရ့ၣ်(၁၈)တဖၣ်အဘၢၣ်စၢၤ တၢ်ခးလိာ်သးကဲထီၣ်ဒီး ဖဲန့ၣ်သုးမီၤစိရိၤတကပၤသံ ၂ ဂၤ ဘၣ်ဒိ ၄ ဂၤအသိး မ့မ့ၢ် KNLA တကပၤသံ၀ဲ ၂ ဂၤအဂ့ၢ်န့ၣ် KNU လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲ“ဒ်သိးဒီးပဒိးန့ၢ်တၢ်ကစီၣ်လီၤတံၢ်လီၤဆဲးန့ၣ် ပယီၤသုးဘၣ်ဒိ ၆ ဂၤႇ ဖဲအကျါန့ၣ်သံကွံာ် ၂ ဂၤလီၤႉ တုၤလၢခဲအံၤဖဲအီးဖးဖိဒီးကမဲၤကိအဘၢၣ်စၢၤန့ၣ် အ၀ဲသ့ၣ်ဟူးဂဲၤဒံးထီဘိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါ(လါအီကူး ၂၄)သီ ဟါဂီၤ ၆ နၣ်ရံၣ်တခီအဆၢကတီၢ်န့ၣ်လီၤႉ

တၢ်ခးလိာ်သးကဲထီၣ်လၢဘျီ၀ဲအံၤန့ၣ် သုးခိၣ်စီၤကၠီၤသဲၣ်တီခိၣ်ရိၣ်မဲ(DKBA)ထုးဖးသးကရူၢ်တနီၤ နုာ်လီၤခးစၢၤ၀ဲ(KNLA)သုးရ့ၣ်(၁၈)စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲကၠၤအ့စ့ၣ်ကၠံကီၢ်ဆၣ် ကၠဲးဒိ၀့ၢ်ကပၤစ့ၢ်ကီး ဖဲမဟါ(လါအီကူး ၂၄)သီ ဟါခီ ၄ နၣ်ရံၣ်ဘျဲၣ်အဆၢကတီၢ် သုးမီၤစိရိၤသုး(ခမရ–၄၀၉)သုးရ့ၣ်ဒီး KNLA သုးရ့ၣ်(၁၈)တဖၣ်အဘၢၣ်စၢၤတၢ်ခးလိာ်သးကဲထီၣ်ကဒီး၀ဲ ဖဲန့ၣ်သုးမီၤစိရိၤအၦၤသံ ၁ ဂၤ ဘၣ်ဒိ ၂ ဂၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ

ဖဲမဟါ(လါအီကူး ၂၄)သီ ဂီၤခီအဆၢကတီၢ် သုးမီၤစိရိၤလၢအအိၣ်လၢကွ့ကလ့သ၀ီပူၤတဖၣ် က့ၤထီၣ်လၢကၠဲးဒိ၀့ၢ်တကပၤဒီးဖဲတလၢထီၣ်ကီးသနီၣ်သ၀ီအခါ (KNLA)အၦၤထုးအ၀ဲသ့ၣ်ဒီးမ့ၣ်ပိၢ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ

ဖဲလါအီကူး ၂၃ သီအနံၤစ့ၢ်ကီး သုးမီၤစိရိၤအသုးတဖၣ်အံၤဒီး(KNLA)သုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဖဲကွ့ကလ့သ၀ီကပၤ သုးမီၤစိရိၤအၦၤသံ ၁ ဂၤ ဘၣ်ဒိ ၂ ဂၤန့ၣ်လီၤႉ လၢန့ၣ်အမဲာ်ညါသုးမီၤစိရိၤအသုးတဖၣ်အံၤဖီၣ်က့ၤကိး၀ဲဒၣ်လီၢ်က၀ီၤသ၀ီဖိ ၃ ဂၤဘၣ်ဆၣ် ဖဲလဲၤတုၤ၀ဲလၢကီးသနီၣ်သ၀ီန့ၣ်ပျၢ်လီၤက့ၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခဲအံၤသုးမီၤစိရိၤအသုးလၢအအိၣ်ဟဲလီၤလၢကၠဲးဒိတဖၣ်က့ၤကဒါလံဘၣ်ဆၣ် မ့မ့ၢ်ကီးတရံးကီၢ်ဆၣ် အီးဖးဖိဒီးကမဲၤကိသ၀ီအဘၢၣ်စၢၤ သုးမီၤစိရိၤအသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် မၤၦဲၤမၤအါထီၣ်သုးဂံၢ်ဘါတဘိယူၢ်ဃီအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ