Home တၢ်ကစီၣ် KNLA ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် စူးကွံာ်သး

KNLA ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် စူးကွံာ်သး

1035
0

လါစဲးပထ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤ(လါစဲးပထ့ဘၢၣ် ၈)သီ ဂီၤခီ ၅ နံၣ်အဆၢကတီၢ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ပၢဆှၢသုးဂ့ၢ်၀ီခိၣ်ကျၢၢ် သုးခိၣ််ကျၢၢ်ဂီၢ်ဂ့ၢ် စီၤပံလးစ့ၣ် စူးကွံာ်အသးဖဲကီၢ်ကၠီၣ်တဲၣ် မဲၢ်ဆီးတၢ်ဆါဟံၣ်အဂ့ၢ်န့ၣ် အဟံၣ်ဖိဃီဖိတဖၣ်စံး၀ဲန့ၣ်လီၤႉ

“ယပါန့ၣ်အိၣ်ဃာ်ဒီးဆံၣ်ဆၢႇသွံၣ်ထီၣ်ႇသးတၢ်ဆါမီၤနီၤႉ အဂုၤအဂၤကပၣ်စ့ၢ်ဧါဒုပတသ့ၣ်ညါဘၣ်ႉ သံခဲအံၤန့ၣ်ဘၣ်တဲလၢသးၦၢ်တၢ်ဆါအဃိလီၤႉ ပတတဲလီၤတံၢ်ပသးတအိၣ်နီတမံၤဒံးဘၣ်မီၤနီၤႉ ပာ်လီၤဖဲအံၤ၀ံၤမးတၢ်ရဲၣ်တၢ်ကျဲၤကဟဲတပတီၢ်တပတီၢ်လီၤ”အဂ့ၢ်န့ၣ် အဖိမုၣ်ဒိၣ် နီၢ်ကရှံယၤ စံးဘၣ်ခ့ၣ်အဲးစံၣ်န့ၣ်လီၤႉ

သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ်(၇၅)နံၣ်အံၤ ဖဲ(၁၉၆၄)နံၣ် လါမးရှး ၁၅ သီအနံၤ စးထီၣ်နုာ်လီၤ၀ဲလၢကညီတၢ်ပၢၢ်ဆၢအပူၤအဆိကတၢၢ်ဒ်သုးဖိတဂၤအသိးဒီး ဟံး၀ဲမူဒါဒ်သုးဖိအပတီၢ်ယံၤ၀ဲ(၈)နံၣ်၀ံၤအလီၢ်ခံ ဘၣ်တၢ်သုးထီၣ်န့ၢ်အလီၢ်လးဒ်သုးစကီၤတဂၤအသိးန့ၣ်လီၤႉ

လၢန့ၣ်အမဲာ်ညါဘၣ်တၢ်သုးထီၣ်အလီၢ်လးဒ်ဆၣ်တဖီးႇဆၣ်ခံဖီးႇဆၣ်သၢဖီးဒီးဆူသုးခိၣ်ဒိၣ်ဖိႇသုးခိၣ်ဒိၣ်ဂီၢ်ဂ့ၢ်ႇသုးခိၣ်ဒိၣ်စိႇသုးခိၣ်ကျၢၢ်ဖိအပတီၢ်တဖၣ်န့ၣ်လီၤႉ ဖဲ(၂၀၀၄)နံၣ် ဘၣ်တၢ်သုးထီၣ်ကဒီးအလီၢ်လးဒ် သုးခိၣ်ကျၢၢ်ဂီၢ်ဂ့ၢ်အသိးတုၤလၢအစူးကွံာ်အသးသမူတစုန့ၣ်လီၤႉ

သုးခိၣ်ကျၢၢ်ဂီၢ်ဂ့ၢ်စူးကွံာ်သးအဖီခိၣ် ကဲထီၣ်တၢ်သူၣ်အုးသးအုးဒီး တၢ်လီၤမၢ်ဖးဒိၣ်လၢကညီတၢ်ပၢၢ်ဆၢဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်အဂီၢ်အဂ့ၢ်န့ၣ် သုး၀ဲၤလီၢ်ခိၣ်သ့ၣ် (သ၀ခ)ကွဲးဖျါထီၣ်၀ဲလၢအ(social media)အပူၤန့ၣ်လီၤႉ

သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်အံၤ မ့ၢ်၀ဲဒၣ်ခ့ၣ်အဲၣ်ယူၣ်ကရၢခိၣ်လီၢ်လံၤလၢအမ့ၢ်စ့ၢ််ကီး KNLA သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်စိ စီၤတၢ်မျၢ်ဘီအဖိခွါခံဂၤတဂၤအသိး မ့ၢ်စ့ၢ်ကီးခ့ၣ်အဲၣ်ယူၣ်–ကရၢခိၣ်(၂)လီၢ်လံၤ ပဒိၣ်နီၢ်စံၤဖိရၣ်စ့ၣ်အ၀ဲၢ်တဂၤန့ၣ်လီၤႉ

သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်အစိၣ်အံၤ တၢ်ကကုၢ်ထီၣ်၀ဲဖဲတနံၤအံၤ မဲၢ်ဆီး၀့ၢ် ထ့ၣ်စဘါတၢ်သွၣ်ခိၣ်၀ံၤ အဃံချါတဖၣ်တၢ်ကက့ၤစိာ်၀ဲဆူခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဒီး တၢ်ကမၤ၀ဲ တၢ်ပာ်လီၤအဃံချါတၢ်ရဲၣ်တၢ်ကျဲၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်စူးကွံာ်သးအကတီၢ် အမါနီၢ်စ့စ့ဃုာ်ဒီးအဖိမုၣ်ဖိခွါ(၄)ဂၤဒီးအလံၤတဖၣ်အိၣ်လီၤတဲာ်ကွံာ်၀ဲန့ၣ်လီၤႉ