Home တၢ်ကစီၣ် ကီးတရံး၀့ၢ် ကလံၤထံး သ၀ီသီအပူၤ တၢ်ထံၣ်န့ၢ်ၦၤပိာ်ခွါအသံစိၣ်တဂၤလၢတၢ်ခူၣ်လီၤဃာ်၀ဲ

ကီးတရံး၀့ၢ် ကလံၤထံး သ၀ီသီအပူၤ တၢ်ထံၣ်န့ၢ်ၦၤပိာ်ခွါအသံစိၣ်တဂၤလၢတၢ်ခူၣ်လီၤဃာ်၀ဲ

1015
0

လါအီးကထိဘၢၣ် ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲအနံၤအံၤ(လါအီးကထိဘၢၣ် ၂၅)သီအနံၤ လၢကညီကီၢ်စဲၣ် ကီးတရံး၀့ၢ် ကလံၤထံး သ၀ီသီအပူၤ တၢ်ထံၣ်န့ၢ်ၦၤပိာ်ခွါအသံစိၣ်တစိၣ်လၢတၢ်ခူၣ်လီၤဃာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်(လါအီးကထိဘၢၣ် ၁၈)သီအနံၤ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် (ခမရ-၅၅၆)(ခမရ-၅၆၀)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၈)တဖၣ်အဘၢၣ်စၢၤတၢ်ခးလိာ်သးကဲထီၣ်အခါန့ၣ် ၦၤသံတဂၤအံၤဘၣ်ဖဲအဟဲက့ၤအိၣ်ခိးန့ၢ်အဘူးတံၢ်အဟံၣ်အခါဒီးလီၤမၢ်ကွံာ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲတၢ်ဒုးကဲထီၣ်အခါန့ၣ်အ၀ဲအိၣ်တပူၤဃီဒီးအကၠီဒီးအဖိဒိၣ်ခွါလီၤႉ တၢ်ဒုးကဲထီၣ်ဘျီအကၠီန့ၣ်ကစံၣ်မီၤနီၤႉ အ၀ဲတဲအကၠီလၢစံၣ်ဆိနၤယကအိၣ်ခိးန့ၢ်နဟံၣ်လီၤႉ ဖဲန့ၣ်၀ံၤအလီၢ်ခံန့ၣ်တနၢ်ဟူအကစီၣ်နီတမံၤလၢၤဘၣ်မီၤနီၤႉ အသိလ့ၣ်ဒီတခိၣ်တၢ်မၤဟးဂီၤကွံာ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ၦၤလၢအသံတဂၤအံၤအမံၤမ့ၢ်၀ဲအူမၠ့ၣ်အီၤဒီးမ့ၢ်စ့ၢ်ကီးအီးဖးဖးဒိၣ်သ၀ီကရူၢ်ၦၤဘၣ်မူဘၣ်ဒါတဂၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ

ၦၤလၢအသံတဂၤအံၤအဘူးအတံၢ်အဟံၣ်န့ၣ်အိၣ်၀ဲဒၣ်လၢသ၀ီသီ သီခါဖၠၣ်ကပၤလၢတကီၢ်ခါပယီၤသုးအိၣ်ဆီလီၤသးအလီၢ်အံၤဒီး အသံအံၤကမ့ၢ်၀ဲဒၣ်ပယီၤသုးဖီၣ်မၤသံ၀ဲလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ