ခီဖျိပယီၤသုးသမံသမိးမၤဃံးထီၣ်တၢ်ဘံၣ်တၢ်ဘၢလၢမၠၣ်၀တံၣ်ကလံၤထံးတကပၤအဃိ လီၢ်က၀ီၤဖိတဖၣ်ဟးထီၣ်က့ၤလီၤကီခဲထီၣ်

လါအီကထိဘၢၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤ(လါစဲးပထ့ဘၢၣ် ၃)သီ ဂီၤခီအဆၢကတီၢ် လၢကညီကီၢ်စဲၣ် မၠၣ်၀တံၣ်ကလံၤထံး သ၀ီတဖၣ်လၢအမ့ၢ် ပဟံၣ်ကျီးႇထံမဲး၀ါခံႇလ့က့ၣ်ကီာ်ႇဖလူဖးဒိၣ်ႇဖလူဖိႇသ့ၣ်ဘီဘိသ၀ီႇ ၀ီၤလ့ၤလီၢ်က၀ီၤဒီတကျိၤ သ၀ီဖိတဖၣ်ဖဲအ၀ဲသ့ၣ်လဲၤလၢမၠၣ်၀တံၣ်အခါ ခီဖျိပယီၤသုးတဖၣ်မၤဃံးထီၣ်တၢ်ဘံၣ်တၢ်ဘၢသမံသမိးတၢ်အဃိ လီၢ်က၀ီၤဖိတဖၣ်ဟးထီၣ်က့ၤလီၤကီခဲထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးခိၣ်ချ့သုးရ့ၣ်(ခမရ–၅၆၀)သုးဂံၢ်ဘါကအိၣ်အဂၤ(၃၀)ဃၣ်ဃၣ်အံၤ အိၣ်ခိးသမံသမိးလီၢ်က၀ီၤဖိ အသိလ့ၣ်ဖဲမဲၢ်ထီးသလ့ကျဲဖးဒ့န့ၣ်လီၤႉ

“ဖဲတနံၤအံၤဖဲဂီၤခီ ၉ နၣ်ရံၣ်န့ၣ် လၢတၢ်ကလဲၤမဲၢ်ထီးသလ့သ၀ီဒီပဟံၣ်ကျီးႇလ့က့ၣ်ကီာ်သ၀ီကျဲဖးဒ့န့ၣ် ကယဲၢ်မ့ၢ်သိလ့ၣ်ဒီးသိလ့ၣ်ယီၢ်ဟဲတဖၣ်န့ၣ်သမံသမိး၀ဲခဲလၢာ်လီၤႉ သံကွၢ်၀ဲလၢနအိၣ်ဟဲဖဲလဲၣ်ႇ နကလဲၤဖဲလဲၣ်ႇနအိၣ််သ၀ီဖဲလဲၣ်တဖၣ်လီၤႉ မ့ၢ်လီၢ်က၀ီၤဖိမ့ၢ်ဧါႇတမ့ၢ်ဧါန့ၣ်သမံသမိး၀ဲလီၤႉ ပလဲၤလၢမၠၣ်၀တံၣ်တဘူၣ်လၢၤဘၣ်ဒီးပဟဲက့ၤကဒါလၢသ၀ီလီၤႉ ဖဲစှၤသီအတီၢ်ပူၤခီဖျိပယီၤသုးကျိၤတဖၣ် ဟဲလၢလ့က့ၣ်ကီာ်ႇဖလူႇမ့လဲၣ်ပၤသ၀ီတကပၤတလီၢ်လီၢ်အဃိ ဘၣ်ယိၣ်လၢတၢ်ဒုးကဟဲကဲထီၣ်လီၤ”အဂ့ၢ်န့ၣ် ပဟံၣ်ကျီးသ၀ီဖိ စီၤဒံပ့ၤ စံး၀ဲန့ၣ်လီၤႉ

KNU–ကညီဒီကလုာ်စၢဖှိၣ်ကရၢ သုးက့(၆)ဟီၣ်က၀ီၤအပူၤ ဖဲပယီၤသုးကျိၤတဖၣ် ဟဲသမံသမိးတၢ်လၢသ၀ီပူၤအိၣ်၀ဲတလီၢ်လီၢ်အဆၢကတီၢ် တၢ်အိၣ်သးအံၤအိၣ်လၢတၢ်ဒုးကဟဲကဲထီၣ်ဒီး ဟီၣ်က၀ီၤကညီဖီၣ်စုက၀ဲၤကရူၢ်တဖၣ်သ့၀ဲအဃိ လီၢ်က၀ီၤဖိတဖၣ်လၢတၢ်လုၢ်အီၣ်နီၢ်ခိသးသမူဒီး တၢ်လဲၤထီၣ်က့ၤလီၤအဂီၢ် တၢ်ကီတၢ်ခဲဟဲအိၣ်ထီၣ်၀ဲဒၣ်န့ၣ်လီၤႉ