Home တၢ်ကစီၣ် ပယီၤသုးရဲၣ်ကျဲၤ၀ဲလၢကခူၣ်လီၤသုးဖိလၢအသံ ၆ ဂၤဖဲအသံတၢ်လီၢ်

ပယီၤသုးရဲၣ်ကျဲၤ၀ဲလၢကခူၣ်လီၤသုးဖိလၢအသံ ၆ ဂၤဖဲအသံတၢ်လီၢ်

417
0

လါအီးကထိဘၢၣ် ၂၂ သီႇ ၂၀၂၁ နံၣ်ႇ ခ့ၣ်အဲးစံၣ်

ပယီၤသုးဒွဲၣ်အူကံ၁်ခ့ၣ်အဲၣ်ယူၣ် သုးက့(၁)တၢ်သမံသမိးတြဲၤတဖျၢၣ်ဒီးၦၤသ၀ီဖိအဟံၣ်တဖျၢၣ်လၢအအိၣ်ဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သထူၣ်ဒီးဘံလ့ကီၢ်ဆၣ်ခံဘ့ၣ်အဘၢၣ်စၢၤအံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ

ဖဲအပူၤကွံာ်(လါအီးကထိဘၢၣ် ၂၁)သီ မုၢ်ဃ့ၢ်လီၤအဆၢကတီၢ် ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၈)စုဒုၣ်တီၤအဖီလာ်ခီၣ်ချ့သုးရ့ၣ်(ခမရ-၄၀၆)ဒီးသုးခိးကီၢ်ဆၢ(BGF)သုးပာ်ဖှိၣ်လၢအအိၣ်ဖဲလ့က့ၣ်ဒီးတၤပီသ၀ီလၢကဟဲက့ၤဆူပနွဲၢ်ကျါသ၀ီအံၤ တၢ်ဘၣ်သဂၢၢ်ခးလိာ်သးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၁)ႇသုးရ့ၣ်(၁)ဖဲသထူၣ်-ဘံလ့ကီၢ်ဆၣ်အဘၢၣ်စၢၤန့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးပာ်ဖှိၣ်တဖၣ်နုာ်လီၤဒွဲၣ်အူမၤဟးဂီၤ၀ဲဘံလ့ကီၢ်ဆၣ်(KNLA)သုးရ့ၣ် ၁ ကါမဲတၢ်သမံသမိးတြဲၤဒီး သထူၣ်ကီၢ်ဆၣ်မီၤဖိကျိသ၀ီပူၤဟံၣ်တဖျၢၣ်အဂ့ၢ်န့ၣ် ခ့ၣ်အဲၣ်ယူၣ် သထူၣ်ကီၢ်ဆၣ် ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ

“ဖဲမုၢ်ဃ့ၢ်လီၤ ၂ နၣ်ရံၣ်အဆၢကတီၢ်န့ၣ် တၢ်ခးလိာ်သးကဲထီၣ်ဖဲ ကါမဲတၢ်သမံသမိးတြဲၤတဘျီဒီးလါခိတၢ်လီၢ်တဘျီ တၢ်ဒုးကဲထီၣ်(၂)ဘျီမီၤနီၤႉ တၢ်ခးလိာ်သးကဲထီၣ်၀ံၤန့ၣ်ပယီၤသုးနုာ်လီၤဒွဲၣ်အူ၀ဲတၢ်သမံသမိးတြဲၤလီၤႉ မ့၀ံၤဘျီဒွဲၣ်အူ၀ဲမီၤဖိကျိသ၀ီဖိအဟံၣ်တဖျၢၣ်လီၤႉ ဟံၣ်လၢတၢ်ဒွဲၣ်အူကွံာ်၀ဲန့ၣ်မ့ၢ်၀ဲမုၣ်ကမဲအဟံၣ်လီၤႉ အကဲ၀ဲဟံၣ်န့ၣ်အ၀ဲသ့ၣ်စ့ၢ်ကီးသ့ၣ်ညါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ခးလိာ်သးကဲထီၣ်အခါန့ၣ် ပယီၤသုးတကပၤသံ(၄)ဂၤႇဘၣ်ဒိ(၅)ဂၤဒီး မ့မ့ၢ်(KNLA)တကပၤတၢ်ဘၣ်ဒိဘၣ်ထံးတအိၣ်ဘၣ်အဂ့ၢ်န့ၣ် ခ့ၣ်အဲၣ်ယူၣ် သထူၣ်ကီၢ်ဆၣ်ၦၤဘၣ်မူဘၣ်ဒါစံး၀ဲန့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးဒီး(BGF)သုးပာ်ဖှိၣ်တနီၤ က့ၤနုာ်လီၤ၀ဲလၢပနွဲၢ်ကျါပယီၤသုးကလၢၤပူၤအသိး တနီၤနုာ်လီၤဟံးန့ၢ်အလီၢ်အကျဲလၢသ၀ီပူၤသီခါဖၠၣ်လၢအအိၣ်ဘူးဖဲန့ၣ်သ့ၣ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ

Photo: KNLA